قاپشاعاي سوتى «ساياسي تۇتقىن» كەنجەبەك ابىشەۆتىڭ جازاسىن جەڭىلدەتۋگە كەلىستى

كەشە، 27 قىركۇيەكتە قاپشاعاي قالالىق سوتى "تەرروريزمدى ناسيحاتتادى" دەگەن ايىپپەن سوتتالعان بەلسەندى كەنجەبەك ابىشەۆتىڭ شارتتى تۇردە مەرزىمىنەن بۇرىن بوساپ شىعۋ تۋرالى ءوتىنىشىن ءۇشىنشى مارتە قاناعاتتاندىردى. بۇل تۋرالى قۇقىق قورعاۋشى باحىتجان تورەعوجينانىڭ مالىمەتىن نەگىزگە العان ازاتتىق راديوسى حابارلادى. 

قۇقىق قورعاۋشىنىڭ ايتۋىنشا، ەگەر پروكۋراتۋرا قارسىلىق تانىتپاسا، سوت شەشىمى 15 كۇننەن سوڭ كۇشىنە ەنەدى.

ازاتتىق راديوسى قۇقىق قورعاۋشىنىڭ بۇل حابارىن الماتى وبلىستىق سوتىنىڭ ءباسپاسوز حاتشىسى سامات اۆگانوۆ راستاعانىن جازدى.

"لا-155/14 مەكەمەسىندە جازاسىن وتەپ جاتقان سوتتالۋشى ابىشەۆ جازاسىنىڭ قالعان بولىگىن – 2 جىل 4 اي 20 كۇندى جازانىڭ جەڭىل تۇرىنە اۋىستىرۋدى سۇراعان ارىز ءتۇسىردى. 2021 جىلعى 27 قىركۇيەكتە قاپشاعاي قالالىق سوتىنىڭ قاۋلىسىمەن قىلمىستىق كودەكستىڭ 73-بابىنا ساي، ابىشەۆتىڭ ارىزى قاناعاتتاندىرىلدى. قاۋلى ازىرگە زاڭدى كۇشىنە ەنگەن جوق" دەلىنگەن سوتتىڭ ءباسپاسوز مالىمدەمەسىندە.

كەنجەبەك ابىشەۆتىڭ وسىعان ۇقساس وتىنىشتەرىن سوت 1 اقپاندا جانە 29 ساۋىردە ەكى رەت قاناعاتتاندىرعان. بىراق ەكەۋىندە دە پروكۋراتۋرا سوت شەشىمىنە شاعىم ءتۇسىرىپ، قۇجاتتىڭ كۇشىن جويدىرعان.

الماتى وبلىستىق سوتى كەنجەبەك ابىشەۆ 2018 جىلعى 21 جەلتوقساندا "تەرروريزمدى ناسيحاتتادى" دەگەن ايىپپەن جەتى جىلعا سوتتاعان ەدى. 2019 جىلى اپەللياتسيالىق سوت ۇكىمدى وزگەرىسسىز قالدىردى.

2020 جىلعى 13 ناۋرىزدا قاپشاعاي قالالىق سوتى الماتى وبلىسىنىڭ زارەچنىي كەنتىندەگى جالپى رەجيمدەگى كولونيادا (لا-155/14 ورتاشا قاۋىپسىزدىك مەكەمەسى) قاماۋدا وتىرعان بەلسەندى كەنجەبەك ابىشەۆتىڭ جازا مەرزىمىن ازايتقان بولاتىن.

قازاقستاندىق قۇقىق قورعاۋشىلار كەنجەبەك ابىشەۆتى ساياسي تۇتقىن دەپ تانىعان. قازاقستان بيلىگى ەلدە ساياسي تۇتقىندار جوق دەپ ەسەپتەيدى.

The Qazaq Times