قارا تەڭىزدە جۇك كەمەسى اپاتقا ۇشىرادى

قارا تەڭىزدەگى كەرچ بۇعازى ماڭىندا قۇرعاق جۇك تاسىمالدايتىن  «گەروي ارسەنالا» جۇك كەمەسى اپاتقا ۇشىرادى. دەرەكتەر بويىنشا، بورتىندا 12 ادام بولعان. ولاردىڭ بەسەۋى تابىلدى، ال قالعاندارىنىڭ جاعدايى ازىرگە بەلگىسىز.

جۇك كەمەسى راداردان بۇگىن تۇندە جوعالىپ كەتكەن. وسى ۋاقىتتا كەمە ءجۇزىپ وتكەن ايماقتا 3,5 باللدىق داۋىل بولعان. كەمە جوعالاردان بۇرىن توتەنشە جاعداي ورىن العاندىعى جايلى SOS حابارلاماسىن جىبەرگەن بولاتىن.

كراسنودار ولكەسىنىڭ توتەنشە بولىمىندە اپات  شامامەن تامان ەلدىمەكەنىنەن 15 ميل  قاشىقتىقتا ورىن العاندىعىن ايتۋدا. بيىكتىگى 3 مەترگە دەيىن جەتەتىن تولقىندار مەن سەكۋندىنا 20 مەترگە دەيىن سوققان جەلدىڭ سالدارىنان  قۇتقارۋشى كەمەلەر دەر كەزىندە اپات ورىن العان ايماققا جەتە الماعان.

بۇگىندە بارلىق قۇتقارۋشى توپ جۇمىلدىرىلىپ، قالعان جەتى ادام ىزدەستىرىلۋدە.

“The Qazaq Times”