رەسەي قارا تەڭىزدەگى كەمەلەرىن كوبەيتتى. فوتو: VITALY NEVAR/TASS

باتىس اقپارات قۇرالدارى قىرىمداعى جانە ۋكراين-رەسەي شەكاراسىنداعى قىلت ەتكەن وزگەرىستى قالت ەتكىزبەي قاراپ وتىر. كەشە عانا BBC, AIPS جانە Agence France-Presse اقپارات اگەنتتىكتەرى قىرىم مەن قارا تەڭىزدەگى رەسەيلىك اسكەر مەن اسكەري تەحنيكالاردىڭ تاعى دا كوبەيىپ جاتقانىن جازدى. حابارلاردا تۇبەك شىعىسىندا جاڭا اسكەري لاگەر پايدا بولعانى دا ايتىلدى. بۇل ەو، اقش جانە ناتو-نىڭ مازاسىن ءتىپتى دە قاشىرا ءتۇستى.

حابارعا قاراعاندا، رەسەي قارا تەڭىزگە بۇل ايماقتاعى اسكەري كۇشتەرىنە ءتان ەمەس كەمەلەردى دە كىرگىزگەن. ماسكەۋ بولعان جاعدايدى قالىپتى اسكەري جاتتىعۋ دەگەننەن تانباي وتىر. قازىر قىرىم مەن قارا تەڭىزدىڭ كەيبىر كەڭىستىكتەرى ۇشۋعا ۋاقىتشا تىيىم سالىنعان ايماققا اينالدى.

رەسەي اننەكتسيالاپ العان قىرىمداعى قازىرگى اسكەري جاتتىعۋلاردى باتىس ساراپشىلارى كەڭەس وداعى ىدىراعاننان كەيىنگى ەڭ اۋقىمدى اسكەري جاتتىعۋ دەپ باعالاپ وتىر. دەگەنمەن، كوپشىلىك ساراپشىلار رەسەيدىڭ بۇل اسكەري ارەكەتى ۋكرايناعا قارسى قولدانىلمايدى دەپ سانايدى. بار بولعانى كيەۆتىڭ بيلىگىن يلىكتىرىپ، ەندى ءبىر جاعىنان ناتو-نىڭ ۋكراينا ءۇشىن قانشالىقتى قولداۋ كورسەتە الاتىنىن كورسەتكىسى كەلەدى دەگەن بولجامدار ايتىلادى.

ارينە، ماسكەۋ بيلىگى دە قازىر اشىق سوعىسقا كىرۋگە دارمەنسىز. ەلدىڭ ەكونوميكالىق جاعداي، ءوندىرىس قۋاتى سەكىلدى سوعىس تاعدىرىن شەشەتىن ماڭىزدى فاكتورلاردا رەسەيدىڭ بۋىنى بوس تۇرعانىن كوپ جۇرت بىلەدى. ونىڭ ۇستىنە اقش-تىڭ جاڭا سانكتسيا داۋىلى الداعى ۋاقىتتا مەملەكەت بيۋدجەتىن ورتايتىپ، قارۋلى كۇشتەردىڭ شىعىنىن وتەۋدىڭ ءوزى قيىنعا تۇسەرى كۇتىلىپ وتىر. دەگەنمەن، ايماقتاعى جانە وعان جاقىن ەلدەردى سوعىستىڭ كۇتپەگەن وقيعالاردان تۇتانىپ كەتۋ مۇمكىندىگى الاڭداتادى. بۇنداي قىراۋار اسكەر مەن اسكەري تەحنيكا توپتالعان ايماقتى قىزۋى از عانا جەتپەي تۇرعان جارىلعىش زات دەسە بولاتىنداي. ءسال عانا شاشىراعان ۇشقىن جويقىن قۋاتتى جارىلعىشتى وتالدىرىپ جىبەرۋى دە مۇمكىن. ونداي جاعدايدا تاراپتار ءوزىنىڭ السىزدىگىن كورسەتپەس ءۇشىن اشىق سوعىسقا وتۋدەن باسقا شاراسى قالماي قالادى.

دەگەنمەن، ءبىر وسى ماسەلە بويىنشا باتىستىڭ دا ۇستانىم-پىكىرلەرى بولىنە تۇسكەندەي. ناتو-نىڭ ەۋروپاداعى مۇشەلەرى شىر-پىر بولىپ قاۋىپ دابىلىن قاقسا، بريتان مەن اقش سالقىنقاندىلىق تانىتقانداي بولدى. ءتىپتى، رەسەيدىڭ اسكەري بەلسەندىلىگىنە قاراماستان جاڭا سانكتسيالار پاكەتىن دە اشىپ سالدى. وسىنىڭ ءبارى رەسەيدىڭ ۋكراينا ماڭىنداعى اسكەري بەلسەندىلىگى «باسىپ الۋدان» كورى ساياسي ويىنداردىڭ جۇرىسىنە كوبىرەك ۇقساعانىن كورسەتتى.

“The Qazaq Times”