كقرنەكى سۋرەت. قازاقستان مەكتەپتەرىندە العاشقى قوڭىراۋ سوعىلدى. فوتو: اشىق دەرەككوز

قازاقستان وقۋشىلارى پاندەميانىڭ ەكىنشى وقۋ جىلىندا مەكتەپكە بارىپ ءبىلىم الادى.

بۇگىننەن باستاپ جاڭا وقۋ جىلىنىڭ باستالۋىنا وراي العاشقى قوڭىراۋ سوعىلىپ، رەسپۋبليكاداعى 7,4 مىڭ مەكتەپتە 3,6 ملن وقۋشى ءداستۇرلى فورماتتا ساباق وقۋعا كوشتى. ونىڭ اراسىندا 394 مىڭعا جۋىق وقۋشى مەكتەپ تابالدىرىعىن العاش رەت اتتاپ تۇر. بىلتىر بۇل كورسەتكىش 380 مىڭ ءبۇلدىرشىن بولعان. سونىمەن قوسا، 2021-2022 وقۋ جىلىنىڭ اياعىندا 165 مىڭنان اسا تۇلەك مەكتەپ قابىرعاسىنان «تاۋداي» بولىپ تۇلەپ ۇشپاق.

ساراپشىلار ارالاس، نەگىزىنەن ونلاين فورماتتا وتكەن 2020 جانە 2021 جىلدارى وقۋشىلاردىڭ وقۋ ۇلگەرىمى ەلەۋلى دەڭگەيدە ناشارلاپ، پسيحولوگيالىق توسىن جاعدايعا دۋشار بولعانىن ءجيى كوتەردى. ورتا ءبىلىم بەرۋ سالاسىندا – مەكتەپ ماڭىزىن اتا-انا، وقۋشى جانە مۇعالىم ۇشتىگى ابدەن سەزىنگەندەي بولدى. دەگەنمەن ىندەتتىڭ ءتورتىنشى تولقىنى بارىسىندا، كۇنىنە 4-5 مىڭ ناۋقاس تىركەلىپ جاتقان تۇستا بالاسىنىڭ دەنساۋلىعىنا الاڭدايتىن جۇرت تا از ەمەس. ۇكىمەت بارلىق الگوريتم جاساقتالعانىن، ءبىلىم سالاسىندا اۋرۋ تاراتپاس ءۇشىن بار امال قاراستىرعانىن العا تارتىپ، كەز كەلگەن جاعدايعا دايىن ەكەنىن ايتادى.

ءبىلىم جانە عىلىم ءمينيسترى اسحات ايماعامبەتوۆ ءبىلىم بەرۋ ۇيىمدارىندا وقۋ جىلى «قاتاڭ سانيتارلىق تالاپتاردى ساقتاي وتىرىپ» ۇيىمداستىرىلاتىنىنا سەنىمدى.

«بالالار ءوز مەكتەپتەرىن، دوستارى مەن سىنىپتاستارىن، ال مۇعالىمدەرىمىز وقۋشىلارىن ساعىندى. بارلىعى مەكتەپتەردىڭ اشىلۋىن اسىعا كۇتتى.

الەمدىك پاندەميا ءبىلىم بەرۋ ۇردىسىندەگى مۇعالىمنىڭ باعا جەتپەس ءرولىن ايقىنداي ءتۇستى. اتاپ ايتساق، مۇعالىمنىڭ كاسىبيلىگى، تاجىريبەسى، بالاعا دەگەن سۇيىسپەنشىلىگى مەن وقۋشىنىڭ ومىرىندەگى اتقاراتىن ءرولى ايقىندالدى. البەتتە، مۇعالىمدەر گادجەت ەكراندارى ارقىلى ەمەس، بالالارمەن تىكەلەي بايلانىستا بولا وتىرىپ بەرەتىن ءبىلىمدى زاماناۋي تەحنولوگيالارمەن سالىستىرۋ قيىن.

...جاڭا وقۋ جىلى ءاربىر وقۋشى، ستۋدەنت، مۇعالىم جانە وقىتۋشى، جالپى ءبىلىم بەرۋ سالاسىنا قاتىسى بار ءاربىر ادام ءۇشىن قىزىقتى ءارى پايدالى بولۋىن تىلەيمىن»، – دەيدى مينيستر ءوز قۇتتىقتاۋىندا.

The Qazaq Times