اقش مەملەكەتتىك حاتىشىسىنىڭ 12 ساعات بۇرىن جاسعان مالىمدەمەسى. فوتو: TRT WOrld

امەريكا قۇراما شتاتتارى اۋعانستاننان ازاماتتاردى ەۆاكۋاتسيالاۋدى بۇگىن تولىعىمەن توقتاتادى. بۇعان قوسا اقش مەملەكەتتىك دەپارتامەنتى اۋعانستانداعى ديپلوماتيالىق قىزمەتىن رەسمي تۇردە توقتاتقانىن مالىمدەدى.

اقش مەم. حاتشىسى انتوني بلينكەن رەسمي مالىمدەمەسىندە، اۋعانستانداعى ديپلوماتيالىق قىزمەتى كاتار ورتالىق قالاسى دوحاعا كوشىرىلگەنىن ايتتى. بلينكەننىڭ ءباسپاسوز مالىمدەمەسىنەن بىرەر ساعات بۇرىن عانا اقش ورتالىق قارۋلى كۇشتەرىنىڭ قولباسشىسى گەنەرال ماككەنزي اۋعانستانداعى اسكەري شەگىنىستى تولىق اياقتاعاندارىن مالىمدەگەن بولاتىن.

بلينكەن مالىمدەمەسىندە ەۆاكۋاتسيا باستالعان 14 تامىزدان بەرى قاراي اقش تارابى 123 مىڭعا جۋىق ادامدى اۋعانستاننان الىپ شىققانىن، ونىڭ 6 مىڭنان استامى اقش ازاماتى ەكەنىن ايتتى.

پەنتاگون مالىمەتتەرىنە قاراعاندا سوڭعى 24 ساعات ىشىندە اقش اسكەري جانە ازاماتتىق ۇشاقتارى، سونداي-اق وداقتاس ەلدەردىڭ ۇشاقتارىن پايدالانا وتىرىپ اۋعانستاننان 1250 ادامدى الىپ شىققان. وسىمەن ەۆاكۋاتسيا وپەراتسياسىن تامامداعان. جالپى مالىمەتكە سايكەس 14 تامىزدان بەرى قاراي اۋعانستاننان 122 مىڭ 600 ادام شىعارىلعان. ولاردىڭ 117 مىڭنان استامى اقش تارابىنان ەۆاكۋاتسيالاندى.

ءالى دە 100-گە جۋىق امەريكالىق اۋعانستاندا قالعان بولۋى مۇمكىن دەپ مالىمدەدى بلينكەن سوزىندە. «اسكەري ميسسيانى اياقتادىق، جاڭا ءبىر ديپلوماتيالىق ميسسيامىز باستالدى. الدىمەن وسى ميسسيامىزدى ورىنداۋ ءۇشىن جەدەل توپ قۇرىلدى. جاڭا جوسپاردى الداعى ۋاقىتتا كونگرەسكە ۇسىناتىن بولامىز»، – دەدى اقش مەملەكەتتىك حاتشىسى.

اقش باس ديپلوماتى سوزىندە اۋعانستاننان تولىق شىققانىمەن قۇراما شتاتتار تارابى اۋعانستاننان كەتكىسى كەلەتىن امەريكالىق جانە اۋعانستاندىق ازاماتتارعا قولداۋدى جالعاستىراتىنىن جەتكىزگەن.

The Qazaq Times