جول پوليتسەيلەرى «نانىنان» ايىرىلاتىن بولدى

قازداڭ قاققان قىزىل تاياق تالاي شوفەرعا تانىس بولار. تانىسىڭىز نە، تۇسىنە كىرەتىندەي تانىمال دەگەن دۇرىس-اۋ. ول قولىندا تۇرعاندا جول پوليتسەيلەرى تىم «قۇدىرەتتى». ءبىر سەرمەپ، تالاي كولىكتى مۇرنىنان ءتىزىپ تاستايدى. ەندى، ساقشى مىرزالار سول قۇدىرەتتى تاياقتى قولدانبايتىن بولىپتى.

بۇل تۋرالى ىشكى ىستەر مينيسترلىگى مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋباەۆ ايتقان. تاياعىنان ايىرىلعان پوليتسەي نە ىستەمەك؟ ارينە، كولىكتەردى قول كوتەرىپ توقتاتادى ەكەن. ابدەن قىزىل تاياققا ۇيرەنىپ العان جۇرگىزۋشىلەر، قولىن عانا كوتەرىپ تۇرعان ماي-دى كوزگە ىلمەي قويماي ما؟ ايتەۋىر، جولپولداردىڭ ىسقىرىعى قالىپتى. سونىمەن بىرگە، ارنايى جارىق تۇسىرەتىن، داۋىس زورايتقىش اسپاپ تا قولدانادى. پوليتسەي كولىگىمەن كەلىپ تە توقتاتۋعا قۇقى بار.

بۇنداي وزگەرىس، ىشكى ىستەر ورگاندارىن مودەرنيزاتسيالاۋ نەگىزىندە جۇزەگە اسپاق. وندا الەمدىك جول-قاتىناس قاۋىپسىزدىگىنە بايلانىستى تاجىريبەلەر نەگىزگە الىنعان. ا.ساۋدادابەۆ ەۋروپا ەلدەرىنىڭ پوليتسەيلەرى مۇنداي تاياقشانى قولدانبايتىنىن ايتىپتى. ءيا، وركەنيەتتى ەلدەردى ۇلگى ەتكەن دۇرىس. ءبىزدىڭ ايتپاعىمىز، سول وزگەرىس سىرتقى فورمادا عانا ەمەس، ىشكى وي-بولمىسىمىزدا دا بولسا دەگەن تىلەك. ولاي دەيتىنىمىز، جۇرت جەمقورلىققا جاقىن جولپولداردى سان ءتۇرلى قىجىرتپا اڭگىمەگە قوسىپ العان. سونىڭ ىشىندە جاڭاعى قىزىل تاياقشا دا بار. «سيقىرلى تاياقپەن» تالاي ماشينانى توقتاتىپ، جول ەرەجەسىن بۇزعانداردان پارا الۋعا قۇمار ساقشىلاردىڭ تاياعى، ولاردىڭ «نانى» اتالىپ كەتكەن. ارينە، كەكەسىن ماعىنادا.

ەندى، ەۋروپا پوليتسەيلەرى قۇساپ، تاياقشاسىن تاستاعان ءبىزدىڭ جولپولدار تويداعى بەتاشاتىن تامادالار قۇساپ، تاباقشاسىن الىپ شىقپاسا بولعانى. سىرت قانا ەمەس، ىشكى سانامىز دا وزگرەسە دەپ وتىرعانىمىز سول.

اقتامبەردى اسپان

«The Qazaq Times»