قوجاعاپپانوۆ: سپورت فەدەراتسيالارىن وليگارحتار مەن وزگە سالاداعى شەنەۋنىكتەر باسقارعاننان ەش زيان جوق

مادەنيەت جانە سپورت ۆيتسە-ءمينيسترى ەرلان قوجاعاپپانوۆ ەلدەگى سپورت فەدەراتسيالارىن وليگراحتار باسقارعاننان ەش زيان جوق دەپ ەسەپتەيدى. بۇل تۋرالى ول 13 تامىز كۇنى توكيو وليمپياداسىنىڭ قورىتىندىسىنا بايلانىستى وتكەن بريفينگ كەزىندە ايتتى. 

– سپورت فەدەراتسيالارىن ءبىزدىڭ كاسىپكەرلەر باسقارعاننان ەشقانداي زيان جوق. بىرىنشىدەن، ولار ءوز قارجاتىن سالادى. كوپ ءمان بەرەدى، – دەدى ۆيتسە-مينيستر.

ونىڭ ايتۋىنا قاراعاندا، سپورت فەدەراتسيالارانىڭ پرەزيدەنتى سايلاۋ اراقىلى تاڭدالادى.

– فەدەراتسيا توراعالارىن قوعام تاعايىندايدى. سايلاۋ بولادى. سايلاۋعا بۇكىل وبلىس فەدەراتسيالارى قاتىسادى. كانديداتتار ءوز باعدارلامالارىن ءتۇسىندىرىپ بەرەدى. سايلاۋ ناتيجەسىندە ءار فەدەراتسيانىڭ باسشىسى تاعايىندالادى، – دەدى قوجاعاپپانوۆ.

بۇعان قوسا، ول سپورت كوميتەتى فەدەراتسيالاردىڭ بارلىعىمەن تىعىز بايلانىستا جۇمىس ىستەپ جاتقانىن جەتكىزدى.

– سپورت كومميتەتىنىڭ فەداراتسيالارمەن قارىم-قاتىناسى وتە تىعىز. كۇندە سويلەسىپ تۇرادى. اي سايىن تىڭداۋ جاسايدى. فەدەراتسيالار بىزگە كەلەدى. ءبىز قانداي پروتسەس بولىپ جاتقانىن، اسىرەسە، سپورت جارىستارىنىڭ كۇنتىزبەسىن قارايمىز. قارجات ماسەلەلەرىن قارايمىز. ءبارىن باقىلاۋدا ۇستايمىز، – دەدى قوجاعاپپانوۆ.

ال 12 تامىزدا بەرگەن سۇحباتىندا بوكس فەدەراتسياسىنىڭ ۆيتسە-پرەزيدەنتى، بوكستان افينا وليمپياداسىنىڭ چەمپيونى باقتيار ارتاەۆ سپورت كوميتەتى مەن سپورت فەدەراتسيالارى اراسىندا تىعىز بايلانىس جوق ەكەنىن ايتقان.

قازاقستانداعى سپورت فەدەراتسيالارىنىڭ ءبىرازىن وزگە سالاداعى شەنەۋنىكتەر مەن وليگارتار باسقارادى. مىسالى، ۇلتتىق وليمپيادا كومميتەتىنىڭ توراعاسى – قازاقستاننىڭ ەكس-پرەزيدەنتى نۇرسۇلتان نازارباەۆتىڭ كۇيەۋ بالاسى، وليگارح تيمۋر قۇلىباەۆ، بوكس فەدەراتسياسىنىڭ پرەزيدەنتى كاسىپكەر كەڭەس راقىشەۆ، كۇرەس فەدەراتسياسىنىڭ باسشىسى "قازاقستان تەمىر جولى" اق-نىڭ ەكس-توراعاسى ساۋات مىڭباەۆ، دزيۋدو فەدەراتسياسىنىڭ پرەزيدەنتى سەنات دەپۋتاتى قايرات قوجامجاروۆ، جەڭىل اتلەتيكا فەدەراتسياسىنىڭ پرەزيدەنتى شىعىس قازاقستان وبلىسىنىڭ اكىمى دانيال احمەتوۆ، ۆولەيبول فەدەراتسياسىنىڭ پرەزيدەنتى ۇقك-ءنىڭ ەكس-توراعاسى نۇرتاي ابىقاەۆ.

سپورت فەدەراتسيالارانىڭ بارلىعىنا دەرلىك جوعارى بيلىكتەگى شەنەۋنىكتەر جانە وليگارحتار باسشىلىق ەتەتىن قازاقستان توكيو وليمپياداسىندا 8 قولا مەدال الىپ، جالپى ەسەپتە 83-ورىننان كورىندى.

The Qazaq Times