Иерусалимде жанжал. Фото: әл-Жазира.

Иерусалим қаласында тағы да жанжал. Ондағы Ислам қорлары жүзден астам еврей азаматы әл-Ақса мешітіне күшпен басып кіргенін мәлімеді.

Иерусалимдегі Ислам қорларының таратқан мәліметіне қарағанда, Израиль полициясының қолдауына сүйенген 116 еврей азаматы әл-Ақса мешітіне күшпен басып кіріп, ондағы мұсылмандардың қарсылығына тап болған. Ислам қорлары еврей азаматтарының әрекеттерін мақсатты арандатушылық деп айыптаған.

Израиль ресмилері берген түсініктемеде еврей азаматтары әл-Ақсаға туристік мақсатта кіргенін айтқан. Алайда, бұндай әрекет бір күн ішінде бірнеше рет қайталанған.

Әл-Ақса мешіті мұсыландар жағынан киелі орын саналады. Еврейлер үшін де тарихи символдық мәні бар. Соңғы кезде әл-Ақса мешітіне кіру бойынша Шығыс Иерусалимдегі мұсылмандар мен еврейлер арасында жанжал ауық-ауық қайталануда. Бұл онсызда нашар күйдегі Израиль мен Палестина қатынасты одан арман ушықтырып келеді.

“The Qazaq Times”