كارانتين كۇشەيتىلگەن دەمالىس كۇندەرى الماتى قالاسىنداعى ورتالىق كوشەلەردىڭ ءبىرى. 8 تامىز 2021 جىل. فوتو: QT / كۇلتەگىن اسپانۇلى

الماتى قالاسىندا ءتورتىنشى تولقىن قاۋپى ارتا باستادى. قازىر رەزەرۆتەگى توسەك-ورىندا قوسا ەسەپتەگەندە 64% ورىن تولعان.

قوعامدىق دەنساۋلىق ساقتاۋ باسقارماسىنىڭ مالىمەتىنشە، وتكەن تاۋلىكتە تىركەلگەن 1486 ادامنىڭ 1405-ىندە سيمپتوم بەلگىلەرىمەن، تاعى 81 ادام سيمپتومسىز تۇردە تىركەلگەن. 9 تامىزدا 641 ادام اۋرۋحاناعا جاتقىزىلعان. بۇل شىلدە ايىنداعى كورسەتكىشتەن الدەقايدا جوعارى.

جالپى قالادا سىيىمدىلىعى 8230 ورىن بولاتىن ينفەكتسيالىق ستاتسيونارلاردا 5259 ادام ەمدەلىپ جاتىر. توسەككە تاڭىلعان بالالاردىڭ سانى كۇرت ارتىپ 217-گە جەتتى. ال رەانيماتسيا جانە قارقىندى تەراپيا بولىمدەرىندە 403 ناۋقاس جاتىر. 58 ادام ءوجج، 168 ناۋقاس ءينۆازيۆتى ەمەس ءوجج-ىمەن جانە 153 سىرقات High flow اپپاراتىمەن تىنىستاپ جاتىر. سونداي-اق، بمسك مەن تەلەمەديتسينا ورتالىعىنىڭ ءموبيلدى توپتارىمەن بىرگە ءۇي جاعدايىندا 11 632 ناۋقاس امبۋلاتورلىق دەڭگەيدە باقىلاۋعا الىنعان.

رەسمي دەرەككە قاراعاندا، جالپىحالىقتىق ۆاكتسيناتسيالاۋ ناۋقانى باستالعالى، ياعني اقپان ايىنان بەرى مەگاپوليستە 612 مىڭ ادام ەكپەنىڭ تولىق دوزاسىن العان. اكىمدىك مالىمەتىنشە، ازىرگە 160 ەگۋ پۋنكتى مەن 237 ەگۋ بريگاداسىندا 1028 مەدقىزمەتكەر جۇمىس ىستەيدى.

وسىعان دەيىن باس سانيتار دارىگەر جانداربەك بەكشين ءبىر كۇندە اۋرۋحاناعا جاتقىزىلعاندار سانى 500-دەن اسسا، قالادا لوكداۋن كۇشەيتىلىپ، بلوك-بەكەت قويىلاتىنى تۋرالى ناۋرىز ايىنداعى كريتەريدى قازىر كۇشىن جويعانىن مالىمدەگەن.

الماتىدا پاندەميا كەزىندە كوروناۆيرۋس پەن پنەۆمونيا سىرقاتتارىنىڭ قاتارى 120 مىڭعا (113 مىڭى كۆي+, 6 مىڭى كۆي-) جۋىقتادى. بەكشيننىڭ بولجاۋىنشا, شىلدە ايىندا باستالعان ءتورتىنشى تولقىننىڭ شارىقتاۋ شەگى الداعى بىرەر كۇندە وتەدى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 649 مىڭنان، 1 تامىزدان بىلايعى كوروناۆيرۋس پنەۆمونياسى 63 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 712 مىڭعا جەتتى. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردان 13,5 مىڭ ادام (كۆي+ / U07.1 – 6973, كۆي- / U07.2 – 3925, ىلەسپە اۋرۋلاردان – 2633) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى.

"The Qazaq Times"