قازاقستان پرەزيدەنتى قاسىم-جومارت توقاەۆ ەل سپورتشىلارىنىڭ وليمپياداداعى كورسەتكىشى "سپورت سالاسىندا شۇعىل ءارى ءتيىمدى رەفورمالار جۇرگىزۋ قاجەت ەكەنىن كورسەتتى" دەپ مالىمدەدى. بۇل تۋرالى ول كەشە، 10 تامىزدا ءوزىنىڭ Twitter جەلىسىندەگى پاراقشاسىندا جازدى. 

"توكيودا وتكەن وليمپيادا ويىندارىنا قازاقستاننان 93 سپورتشى قاتىستى. جەڭىسكە جەتۋ جولىندا بار كۇش-جىگەرى مەن شەبەرلىگىن كورسەتكەن اتلەتتەرگە العىسىمدى بىلدىرەمىن. وليمپيادانىڭ قولا جۇلدەگەرلەرىن قۇتتىقتايمىن. الايدا، 8 قولا مەدال الىپ، جالپى كوماندالىق ەسەپتە 83-ورىنعا تابان تىرەگەن ۇلتتىق قۇرامانىڭ بۇل كورسەتكىشى قازاقستاننىڭ سپورتتاعى الەۋەتىنە جانە مەملەكەت تاراپىنان سپورتتى دامىتۋعا ءبولىنىپ وتىرعان مول قاراجاتقا سايكەس كەلمەيدى. ۇلتتىق قۇرامنىڭ وليمپياداداعى كورسەتكىشى سپورت سەكىلدى اسا ماڭىزدى سالادا شۇعىل ءارى ءتيىمدى رەفورمالار جۇرگىزۋ قاجەت ەكەنىن كورسەتتى. بۇقارالىق جانە بالالار سپورتىن دامىتۋعا كوڭىل ءبولىپ، سول ارقىلى الەمدىك ارەنادا ۇلكەن تابىستارعا قول جەتكىزۋگە ۇمتىلۋ قاجەت. توكيو وليمپياداسىنان ساباق الىپ، پاريجدە وتەتىن كەلەسى ويىنداردا حالىق ءۇمىتىن اقتايتىنداي ناتيجەگە قول جەتكىزۋ كەرەك" دەلىنگەن توقاەۆتىڭ جازباسىندا.

توكيو وليمپياداسىندا قازاقستان سەگىز قولا مەدالمەن جالپى كوماندالىق ەسەپتە 83-ورىننان كورىندى. بۇل قازاقستان قۇراماسىنىڭ ءوزى قاتىسقان وليمپيادالارداعى ەڭ تومەنگى كورسەتكىشى.

"The Qazaq Times"