پاكىستان: اۋعانستاندا ەشكىم دە جەڭىسكە جەتپەيدى

اقش اسكەرىنىڭ اۋعانستاننان تولىقتاي شىعارىلاتىن ۋاقىتى جاقىندادى. وسى كەزدە ۇكىمەت پەن «تاليبان» اراسىنداعى قاقتىعىس تا كۇشەيە ءتۇستى. ەلدەگى بۇل جاعداي قۇراما شتاتتاردىڭ اۋە كۇشتەرىن اۋعان ۇكىمەتىن قولداۋ ماقساتىندا اۋە سوققىلارىن كوبەيتۋگە يتەرمەلەپ وتىر. ال، ءدال وسى كەزدە اۋعانستان ماسەلەسىندە اسا ماڭىزدى ءرول وينايتىن پاكىستان داعدارىسقا قاتىستى ەسكەرتۋ جاساپ جاتتى.

بەيسەنبى كۇنى پاكىستاننىڭ ۇلتتىق قاۋىپسىزدىك جونىندەگى كەڭەسشىسى موەد يۋسۋف امەريكالىق شەنەۋنىكتەرمەن ونلاين كەزدەستى. كەزدەسۋدە اۋعانستان ماسەلەسى تالقىلاندى. پاكىستان شەنەۋنىگى كەزدەسۋدە ۋاشينگتوننىڭ «ىشكى كەلىسىم» تۋرالى مالىمدەمەسىن قۋاتتاپ سويلەدى. ول اۋعانستانداعى ەكى تاراپتىڭ ەشقايسىسى دا تولىق جەڭىسكە جەتە المايتىنىن باسا ايتتى. پاكىستان تارابىنىڭ پىكىرىنشە، قازىرگى جاعدايدان الىپ قاراعاندا كەلىسسوزدى قايىرىپ قويىپ، قارۋلى وپەراتسيالاردى العا جىلجىتۋ ەكى جاقتى دا مۇددەسىنەن ايىرادى.

يۋسۋفتىڭ كەزدەسۋدەگى پىكىرىنە قاراعاندا، يسلاماباد بيلىگى ءۇشىن اۋعانستانداعى قوس تاراپتىڭ قاقتىعىسى ءتيىمسىز. سوندىقتان، پاكىستان اۋعانستانداعى بەيبىتشىلىكتى قالپىنا كەلتىرۋ بويىنشا اقش-پەن ىنتىماقتاستىق ورناتۋعا دايىن.

ارينە، تاراپتاردىڭ رەسمي كەزدەسۋلەرىندە بۇنداي سوزدەر ايتىلۋى قالىپتى. دەگەنمەن، ساياسي ءسوزدىڭ ناقتى بولمىستاعى كورىنىسى ءبىز ەلەستەتكەندەي بولماي شىعىپ جاتادى. اۋعانستان جاعدايى ءالى دە تالاي ۋاقىتقا دەيىن وزىنە جاقىن ەلدەر مەن ايماقتارعا ءوز ىقپالىن تيگىزەتىنى انىق.

“The Qazaq Times”