Päkistan wlttıq qauipsizdik jönindegi keñesşisi Moed YUsuf. Foto; VOA

AQŞ äskeriniñ Auğanstannan tolıqtay şığarılatın uaqıtı jaqındadı. Osı kezde ükimet pen «Taliban» arasındağı qaqtığıs ta küşeye tüsti. Eldegi bwl jağday Qwrama Ştattardıñ äue küşterin auğan ükimetin qoldau maqsatında äue soqqıların köbeytuge itermelep otır. Al, däl osı kezde Auğanstan mäselesinde asa mañızdı röl oynaytın Päkistan dağdarısqa qatıstı eskertu jasap jattı.

Beysenbi küni Päkistannıñ wlttıq qauipsizdik jönindegi keñesşisi Moed YUsuf amerikalıq şeneuniktermen onlayn kezdesti. Kezdesude Auğanstan mäselesi talqılandı. Päkistan şeneunigi kezdesude Uaşingtonnıñ «işki kelisim» turalı mälimdemesin quattap söyledi. Ol Auğanstandağı eki taraptıñ eşqaysısı da tolıq jeñiske jete almaytının basa ayttı. Päkistan tarabınıñ pikirinşe, qazirgi jağdaydan alıp qarağanda kelissözdi qayırıp qoyıp, qarulı operaciyalardı alğa jıljıtu eki jaqtı da müddesinen ayıradı.

YUsuftıñ kezdesudegi pikirine qarağanda, Islamabad biligi üşin Auğanstandağı qos taraptıñ qaqtığısı tiimsiz. Sondıqtan, Päkistan Auğanstandağı beybitşilikti qalpına keltiru boyınşa AQŞ-pen ıntımaqtastıq ornatuğa dayın.

Ärine, taraptardıñ resmi kezdesulerinde bwnday sözder aytıluı qalıptı. Degenmen, sayasi sözdiñ naqtı bolmıstağı körinisi biz elestetkendey bolmay şığıp jatadı. Auğanstan jağdayı äli de talay uaqıtqa deyin özine jaqın elder men aymaqtarğa öz ıqpalın tigizetini anıq.

“The Qazaq Times”