اقىلىڭ جەتسە، زاڭدى دا "زاڭمەن" بۇزۋعا بولادى

ءۇندىستان - الكوگولدى ىشىمدىكتەردى ەڭ كوپ تۇتىناتىن ەلدەردىڭ ءبىرى بولىپ تابىلادى. ءتىپتى ىشىمدىك ىشكەندەر رولگە وتىرىپ، اكىمشىلىك جاۋاپكەرشىلىكتەن دە ەش قاشىپ وتىرعان جوق. سودان ەلدە ماس كۇيىندە كولىك ايداپ، ءوزىنىڭ جانە وزگەنىڭ اجالىنىڭ سەبەپشىسى بولىپ جاتاتىن جاعدايلاردىڭ سانى ارتقان.

2017 جىلى ەل بيلىگى وسى زاڭبۇزۋشىلىقتىڭ الدىن الۋ ءۇشىن، زاڭناماعا جاڭا وزگەرتۋلەر ەنگىزىپ وتىر. جاڭا زاڭعا سايكەس جۇرگىزۋشىنىڭ كوڭىلىن اۋداراتىن، جانە ىشىمدىك زاتتارى ساتىلاتىن بار، كلۋب، سىراحانا جانە باسقا دا كوڭىل كوتەرەتىن ورىندار  كولىكتەر قاتىنايتىن ۇلكەن تراسسالاردان كەمىندە 500 مەتر قاشىقتىقتا ورنالاسۋى قاجەت. بۇل زاڭنىڭ كوپتەگەن مەكەمەلەردىڭ قالتاسىن قاعىپ، كاسىبىن توقىراۋعا ۇشىراتاتىنى بەلگىلى.

ۇندىستاندىق ءبىر كاسىپكەر جەكە كاسىبىنىڭ جاڭا زاڭ نورمالارىنا ساي كەلمەيتىنىن بىلگەن سوڭ ەرەكشە ارەكەتكە بارعان. ونىڭ سىراحاناسى جولدىڭ بويىندا ورنالاسقان. ال باسقا جەرگە كوشۋ ءۇشىن ۇلكەن قارجى قاجەت جانە تۇراقتى كەلۋشىلەرىن دە جوعالتىپ الاتىن بولعاسىن زاڭنىڭ الدىن وراۋدى ويلاستىرعان.

ول سىراحاناسىنىڭ الدىنا 520 مەترلىك لابيرينت جاساپ الدى. ءسويتىپ، كەلۋشىلەرگە سىراحاناعا كىرۋ ءۇشىن 520 مەتردى ءجۇرىپ وتۋگە تۋرا كەلەدى. زاڭ ورگاندارىنىڭ وكىلدەرى سىراحانانىڭ يەسىنە ەشقانداي سىن ايتا الماي وتىر. ويتكەنى، زاڭعا سايكەس، سىراحانا جولدان 500 مەتردەن كەم ەمەس قاشىقتىقتا ورنالاسقان. بۇگىندە سىراحانانىڭ تۇراقتى كەلۋشىلەرى كوبەيگەن، كوبىنە 520 مەترلىك لابيرينتتەن ءجۇرىپ ءوتۋ قىزىققا اينالدى. ءسويتىپ، ۇندىستاندىق كاسىپكەر ءوز كاسىبىن ساقتاپ قانا الماي، زاڭنىڭ الدىن وراپ، كەلۋشىلەرىن دە كوبەيتتى.

“The Qazaq Times”