قازاقستان پرەزيدەنتى اكىمشىلىگى جەتەكشىسىنىڭ ءبىرىنشى ورىنباسارى داۋرەن اباەۆ "قازاقستان ۇكىمەتى Pegasus باعدارلاماسى ارقىلى 2 مىڭداي تەلەفوندى اڭدىعان بولۋى مۇمكىن" دەگەن اقپارات دالەلسىز دەپ ەسەپتەيدى. بۇل جايلى ول مەملەكەتتىك "حابار" ارناسىنان كورسەتىلەتىن "وتكرىتىي ديالوگ 2.0" باعدارلاماسىندا ايتتى. 

"انىق-قانىعى بەلگىسىز نارسە جونىندە پىكىر ايتۋ قيىن. بىزگە دالەلسىز جەتكىلىكتى دارەجەدە ينتريگا تۋدىراتىن اقپاراتتى بەرىپ، انشەيىن سوعان سەنۋدى ۇسىنادى. بۇل تىزىمگە كەز كەلگەن ادامدى ەنگىزۋگە بولادى، وسىلايشا ەليتا، جۋرناليستەر جانە وزگە توپتار اراسىندا كۇدىك جايۋ[عا بولادى]. مەنىڭ ويىمشا، بۇل جەردە اقىلعا قونىمدى سكەپتيتسيزم ءپرينتسيپىن ۇستانعان ءجون. ازىرگە ايتارىم وسى" دەدى داۋرەن اباەۆ.

جەمقورلىق پەن ۇيىمداسقان قىلمىستى زەرتتەۋ ورتالىعى (OCCRP) باستاعان جۋرناليستەر توبى 18 شىلدەدە زەرتتەۋ جاريالاپ، ءيزرايلدىڭ NSO Group توبى الەم ۇكىمەتتەرىن تىڭشىلىق باعدارلاماسىمەن قامتاماسىز ەتتى دەپ تۇجىرىم جاساعان. زەرتتەۋگە سايكەس، 2016 جىلدان بەرى الەم بويىنشا وسى باعدارلامانىڭ كومەگىمەن 50 مىڭعا دەيىن تەلەفون ءنومىرى تىڭدالعان. ونىڭ ىشىندە 2 مىڭ شاقتى ءنومىردى تىڭداۋ تۋرالى تاپسىرىستى قازاقستان ۇكىمەتى بەرگەن دەگەن بولجام بار.

ازىرگە، جوبا اۆتورلارى تەلەفونى تىڭدالعان بولۋى مۇمكىن 8 ادامنىڭ اتى-ءجونىن جاريالادى. بۇلار: پرەزيدەنت قاسىم-جومارت توقاەۆ، ۇكىمەت باسشىسى اسقار مامين، الماتى قالاسىنىڭ اكىمى باقىتجان ساعىنتاەۆ، قۇقىق قورعاۋشى باقىتجان تورەعوجينا، جۋرناليست سەرىكجان ماۋلەتباي، Central Asia Monitor گازەتىنىڭ بۇرىنعى باس رەداكتورى بيگەلدى عابدۋللين.

بۇعان قوسا قازاقستان تىزىمىندە كۆەنتين گيومە مەن مارتين ۆيوم دەگەن كىسىلەردىڭ ەسىمى اتالادى. بۇلار قازاقستاندا بەيمالىم ادامدار بولعانىمەن، بولجام بويىنشا، ۇكىمەت قۋعىنداعى بانكير مۇحتار ابليازوۆقا بولا وسى كىسىلەردى اڭدۋعا تاپسىرما بەرگەن بولۋى ىقتيمال.

"The Qazaq Times"