بۇگىن، 15 شىلدەدە شىمكەنتتىڭ قاراتاۋ اۋداندىق سوتى قالالىق مادەنيەت ءۇيىنىڭ جەتەكشىسى، ءانشى ساكەن مايعازيەۆتىڭ تىركەلمەگەن "قازاقستاننىڭ دەموكراتيالىق پارتياسىنىڭ" بەلسەندىسى ارۋجان دۇيسەباەۆانىڭ ۇستىنەن تۇسىرگەن شاعىمى قاراي باستادى. العاشقى سوت وتىرىسى ونلاين ءوتتى. ءىستى سۋديا مومبەك امىربەكوۆ قاراپ جاتىر.

سۋديا سوت تەرگەۋى باستالماستان بۇرىن ەكى جاقتى تاتۋلاستىرۋعا تىرىستى، الايدا تاراپتار كەلىسىمگە كەلۋدەن باس تارتتى.

ساكەن مايعازيەۆ ەگەر جاۋاپكەر "اقپارات دۇرىس جەتپەگەندىكتەن" وزىنە نەگىزسىز جالا جاپقانىن مويىنداپ، جاريا تۇردە كەشىرىم سۇراسا ءىستى توقتاتاتىنىن ايتتى. دۇيسەباەۆا كەشىرىم سۇراۋدان باس تارتىپ، جابىرلەنۋشىنىڭ تالابىن ورىندامايتىنىن جەتكىزدى.

سوت تىڭداۋى كەزىندە ساكەن مايعازيەۆتىڭ قورعاۋشىلارى سۋديادان ءىس قارالىپ بىتكەنشە باق وكىلدەرىن اقپارات تاراتپاۋعا مىندەتتەۋىن سۇرادى. بىراق سۋديا ءوتىنىشتى ماقۇلدامادى.

قوعامدا مايعازيەۆ باسقاراتىن مادەنيەت ءۇيىنىڭ ناۋرىز مەرەكەسىن وتكىزۋگە 595 ملن تەڭگە بولگەنى قىزۋ تالقىلانىپ جاتقاندا ارۋجان دۇيسەباەۆا تىركەلمەگەن "دەمپارتيانىڭ" Youtube ۆيدەو جەلىسىندەگى رەسمي ارناسىندا "ساكەن مايعازيەۆ شىمكەنتتە قانشا اقشا تونادى؟" دەگەن تاقىرىپتا ۆيدەو جاريالاعان. ول اتالعان ۆيدەودا مايعازيەۆ باسقاراتىن مەكەمەنىڭ شىمكەتتەگى ناۋرىز تويىنا جارتى ملرد تەڭگەدەن استام قارجى بولگەنىن سىناپ، ءانشىنى "جەمقور" دەپ اتاعان.

"دەموكراتيالى قازاقستان" Youtube ارناسىندا جاريالانعان ارۋجان دۇيسەباەۆانىڭ ساكەن مايعازيەۆ جايلى ۆيدەوسى. 

ايىپتاۋ شاعىمىنا قاراعاندا، مايعازيەۆ سول ۆيدەودا وزىنە قاراتا ايتىلعان "جەمقور", "قازاقستاندى توناپ جاتىر، ءولتىرىپ جاتىر", دەگەن سوزدەر "ار-نامىسىمدى، قادىر-قاسيەتىمدى، بەدەلىمدى قورلادى" دەپ شاعىم تۇسىرگەن. ول ايىپتالۋشى دۇيسەباەۆادان اتالعان ۆيدەونى ينتەرنەتتەن ءوشىرىپ، وزىنەن جاريا تۇردە كەشىرىم سۇراۋىن تالاپ ەتىپ وتىر. بۇعان قوسا، مايعازيەۆ دۇيسەباەۆانىڭ قىلىمىستىق كودەكستىڭ 131-بابى، 2-تارماعى بويىنشا جاۋاپقا تارتىلعانىن قالايدى. (اتالعان باپتىڭ ۇكىمى: ەكى ءجۇز ايلىق ەسەپتiك كورسەتكiشكە دەيiنگi مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە ءبىر ءجۇز سەكسەن ساعاتقا دەيىنگى مەرزىمگە قوعامدىق جۇمىستارعا تارتۋعا جازالانادى)

ءبىر كۇن بۇرىن ارۋجان دۇيسەباەۆا وزىنە تاعىلعان ايىپتارمەن كەلىسپەيتىنىن جەتكىزىپ، "565 ملن تەڭگەنىڭ ەسەبىن سۇراعانىم ءۇشىن ءىستى بولدىم، ءانشىنىڭ ارى تازا بولسا، سوتتاسقانشا حالىق الدىندا ەسەپ بەرسىن" دەپ مالىمدەگەن.

ءۇش جارىم اي بۇرىن مەملەكەتتىك ساتىپ الۋ پورتالىنداعى رەسمي دەرەكتەردى نەگىزگە العان جۋرناليستەر مەن بەلسەندىلەر ءانشى ساكەن مايعازيەۆ باسقاراتىن شىمكەنت قالالىق مادەنيەت ءۇيىنىڭ ناۋرىزعا ارنالعان ءىس-شارالارعا 595 ملن تەڭگە قارجى بولگەنىن انىقتاعان. سول كەزدە بۇل وقيعا قوعامدا ۇلكەن شۋ تۋدىرعان ەدى. اكىمدىك جۋرناليستەر كەلتىرگەن دەرەكتى جوققا شىعاردى. ولار "ناۋرىزعا تەك 213  ملن تەڭگە بولىنگەنىن، جۋرناليستەر كەلتىرگەن 595 ملن تەڭگە جىل بويى وتەتىن ءىس-شارالارعا قاراستىرىلعانىن" ءۋاج ەتتى. بىراق شىمكەنت اكىمدىگىنىڭ بۇل مالىمەتى مەملەكەتتىك ساتىپ الۋ پورتالىنداعى رەسمي دەرەككە قايشى. ويتكەنى قالالىق مادەنيەت ءۇيى ءتۇرلى كومپانيالارمەن جاساسقان 7 كەلىسىمشارتتا دا ءىس-شارالاردىڭ ناۋرىز مەرەكەسىنە وراي ەكەنى انىق جازىلعان. بۇعان قوسا، مەمساتىپ الۋ پورتالىنان 595 ملن تەڭگەنىڭ 570 ميلليوننان استامى جەكە كومپانيالاردىڭ شوتىنا اۋدارىلىپ قويعانىن بايقاۋعا بولادى.

"The Qazaq Times"