جۇت جايلاپ، جۇرت شىعىندانىپ جاتقان شاقتا وزىنە شاڭ جۋىتپاعان اۋىل شارۋشاىلىعى ءمينيسترى ساپارحان وماروۆ ورنىنان بوسادى. فوتو: قر پارلامەنتى

سەنبى كۇنگى ۇكىمەتتىڭ كەڭەيتىلگەن وتىرىسىندا پرەزيدەنت توقاەۆ اۋىل شارۋاشىلىعى ءمينيسترى ساپارحان وماروۆتى لاۋازىمىنان بوساتاتۋ تۋرالى ءسوز قوزعادى. مال قىرعىنىنا ءوزىن كىناسىز دەپ ەسەپتەيتىن وماروۆ بىردەن  وتستاۆكاعا كەتتى.

«بيىل جەم-شوپپەن قامتۋ قانشالىقتى ماڭىزدى ەكەنىن ءبارىمىز تۇسىندىك. قولايسىز كۇن رايى مەن ءتيىمسىز بولجاۋ سالدارىنان ماڭعىستاۋ مەن قىزىلورداداعى احۋال ۋشىعىپ تۇر. ماڭعىستاۋ وبلىسىندا قىرىلعان مال سانى 3 مىڭعا جەتتى. مينيسترلىك پەن اكىمدىكتەر ءتيىستى شارالار قابىلدامادى. ناقتى جانە ءبىرىزدى جۇمىس جۇرگىزىلمەدى. سولاردىڭ كىناسىنەن اۋىر شارۋاشىلىعى شاراسىز كۇيگە ءتۇستى. كەرى بايلانىستىڭ جوقتىعىنان فەرمەرلەر تىكەلەي مەنەن كومەك سۇراي باستاۋعا ءماجبۇر بولدى. ارينە، قۋاڭشىلىق – تابيعي قۇبىلىس، ونى جاقسى تۇسىنەمىن. مۇنداي قيىن جاعدايدا جاۋاپتى مينيسترلىك تەز ارادا جەدەل جانە شەشىمدى تۇردە ارەكەت ەتۋى كەرەك ەدى. بىراق مينيسترلىك بۇل شارۋانى اتقارا المادى. سوندىقتان وسى سالاعا جاۋاپتى ادام – مينيستر ساپارحان وماروۆ وتستاۆكاعا كەتۋى كەرەك»، – دەدى توقاەۆ ۇكىمەت جيىنىنداعى سوزىندە.

ارادا ءبىر ساعات وتەر-وتپەس اقوردا ءباسپاسوز قىزمەتى توقاەۆتىڭ جارلىعىمەن اۋىل شارۋاشىلىعى ءمينيسترى ساپارحان وماروۆ وتستاۆكاعا كەتكەنى جونىندە رەسمي اقپارات تاراتتى. بيىلعى جازدا وتستاۆكا ارقالاعان وماروۆ مينيستر لاۋازىمىنا 2019 جىلعى اقپان ايىندا تاعايىندالعان ەدى.

وڭتۇستىك-باتىس وڭىرلەرىندەگى قۋاڭشىلىق پەن جەم-ءشوپ قورىنىڭ جەتكىلىكتى دايىندالماۋى سەبەپتى جاپپاي مال قىرىلىپ جاتىر. وتكەن اپتادا ۆەدومستۆو مال قىرعىنى توقتاعانىن، قاجەتتى امالدار جاسالىپ جاتىر دەگەن. دەسە دە احۋال ءالى دە قالىپقا كەلمەگەنىن جەلىدەگى حاباردان كورۋگە بولادى. جەرگىلىكتى حالىق لاجسىزدىقتان مالىن جاپپاي ساتۋعا ءماجبۇر. ساراپشىلار مۇنىڭ سالدارى الداعى كۇزدە اۋىل شارۋاشىلىعى ونىمدەرى ايتارلىقتاي قىمباتتايدى دەپ قاۋىپتەنەدى.

"The Qazaq Times"