ساتىبالدى نارىمبەتوۆ دۇنيەدەن وزدى

بەيسەنبى، 8 شىلدەدە ەرتەڭگىسىن قازاقستاندىق بەلگىلى رەجيسسەر، ستسەناريست، جازۋشى ساتىبالدى نارىمبەتوۆ قايتىس بولدى. 75 جاسىندا دۇنيەدەن وزعان قوعام قايراتكەرىنىڭ قازاسىن كوپشىلىك اۋىر قابىلدادى. قارالى حاباردى مادەنيەت مينيسترلىگى راستادى.

بۇدان بىرنەشە كۇن بۇرىن ارىپتەستەرى وسىزامانعى قازاق كينوماتوگرافيا كوريفەيىنىڭ  اۋىر سىرقاتتانىپ، اۋرۋحانادا جاتقانىن حابارلاعان ەدى.

ساتىبالدى نارىمبەتوۆ وڭتۇستىك قازاقستان وبلىسى (قازىرگى تۇركىستان وبلىسى) كەنتاۋ ماڭىنداعى اششىساي اۋىلىندا 1946 جىلى 7 ناۋرىزدا دۇنيەگە كەلگەن. ماسكەۋ قالاسىنداعى مەملەكەتتىك كينەماتوگرافيا ينستيتۋتىن بىتىرگەن. 1984 جىلى جوعارى رەجيسسەرلىك كۋرستى (گ.ن. دانەليانىڭ شەبەرحاناسى بويىنشا) بىتىرگەن. 1969 جىلدان «قازاقفيلم» ستۋدياسىندا ستسەناريست ءارى كينورەجيسسەر رەتىندە قىزمەت ەتتى. 1970 جىلدان – وسى كينوستۋديانىڭ كينورەجيسسەرى بولدى. ال 2005 جىلدان بەرى شاكەن ايمانوۆ اتىنداعى «قازاقفيلم» اق «دەبيۋت» بىرلەستىگىنىڭ جەتەكشىسى قىزمەتىندە بولىپ كەلدى.

«سوزاقتان شىققان گاملەت»، «قىز جىلاعان»، «مۇستافا شوقاي»، «امانات» سياقتى بەلگىلى كارتينالاردىڭ اۆتورى، سونىمەن قوسا، ىلگەرىدە  «قۇرمانعازى» دەرەكتى فيلمىنە، «زاۋال»، «كۇزگى بۇرالاڭ جول» قىسقا مەتراجدى، «ۇرىن كەلگەن كۇيەۋ»، «كوزىمنىڭ قاراسى»، «جاس اككوردەونشىنىڭ ءومىربايانى»  جانە تاعى باسقا كوركەم فيلمدەرگە رەجيسسەرلىك ەتكەن.

ساتىبالدى نارىمبەتوۆتىڭ قازاسىنا رەداكتسيا ۇجىمى تۋىستارى مەن كورەرمەندەرىنە قابىرعاسى قايىسا كوڭىل ايتادى.

“The Qazaq Times”