ورالدا ميتينگ وتكەن كۇنى ەكى بەلسەندى ۇستالدى

كەشە، 6 شىلدەدە ورالدا ەكپەنى مىندەتتەۋگە قارسى وتكەن ميتينگكە شىققان بەلسەندىلەر ميرا احمەتوۆا مەن ۆاسيلي حاسانوۆ ۇستالدى. ولار پوليتسيا بولىمشەسىندە بىرنەشە ساعات بولعان. بۇل تۋرالى ازاتتىق راديوسى حابارلادى.

– الاڭعا جاقىن (مىندەتتى ەكپەگە قارسى ميتينگ وتەدى دەلىنگەن مانشۇك مامەتوۆا اتىنداعى الاڭ) جەردەگى ايالدامادان تۇسكەن كەزدە مەنى ۇستاپ، قالالىق بولىمشەگە جەتكىزدى. بىرنەشە ساعات ۇستاپ، تەرگەدى، – دەدى ۆاسيلي حاسانوۆ ازاتتىق تىلشىسىنە.

ميرا احمەتوۆانىڭ سوزىنە قاراعاندا، ونى پوليتسيا كەشكى ساعات التى جارىم شاماسىندا ءۇيىنىڭ ماڭىنان ۇستاعان. وعان پوليتسياعا شاقىرتۋ قاعازى بەرىلمەگەن.

– مەنى كەشكى ساعات وندار شاماسىندا بوساتتى، وقاسوۆتىڭ ءىسى (جەرگىلىكتى بەلسەندى ورىنباي وقاسوۆتىڭ ۇستىنەن 405-باپ بويىنشا قوزعالعان ءىس) بويىنشا ۇستادى. ۇزاق ۋاقىت قۇر بوسقا ۇستاپ، ءبىر ساعات قانا تەرگەدى، – دەدى ازاتتىققا ميرا احمەتوۆا.

باتىس قازاقستان وبلىسى پوليتسيا دەپارتامەنتى ءباسپاسوز قىزمەتىنىڭ مامانى ءمولدىر سىرعاليەۆا 6 شىلدە كۇنى ۇستالعاندار تۋرالى ازاتتىق ءتىلشىسىنىڭ سۇراعىنا بەلسەندىلەر "ورال قالاسى پوليتسيا باسقارماسىنا كۋاگەر رەتىندە جەتكىزىلدى، تەرگەۋدەن كەيىن بوساتىلدى" دەپ ايتتى.

بىراق ول قىلمىستىق-پروتسەسسۋالدىق كودەكستىڭ 201-بابىنا سۇيەنە وتىرىپ (سوتقا دەيىنگى تەرگەۋ امالدارىنىڭ مالىمەتتەرىن جاريالاماۋ) ەكى بەلسەندىنى پوليتسيانىڭ قانداي ءىس بويىنشا بولىمشەگە جەتكىزگەنىن ايتپادى.

شەتەلدە قۋعىندا جۇرگەن بۇرىنعى بانكير مۇحتار ءابليازوۆ جاقتاستارىن 6 شىلدەدە بيلىككە قارسى نارازىلىققا شىعۋعا شاقىرعان. تۋعان ەلىندە ول قىلمىستىق باپتار بويىنشا كىنالى دەپ تانىلىپ، ومىرلىك تۇرمە جازاسىنا كەسىلگەن. بۇرىنعى بانكيردىڭ ءوزى تاعىلعان ايىپتاردى جوققا شىعارىپ، ءوزىنىڭ ساياسي سەبەپپەن قۋدالانىپ جاتقانىن ايتقان.

"The Qazaq Times"