6 شىلدە بولعان نارازىلىق شاراسىندا داۋىس ۇلعايتقىشپەن سويلەپ تۇرعان بەلسەندى ىرىسبەك توقتاسىن. فوتو: QT كۇلتەگىن اسپانۇلى

كەشە، 6 شىلدەدە الماتىداعى بالۋان شولاق اتىنداعى سپورت سارايىنىڭ ماڭىنداعى نارازىلىق شاراسى كەزىندە ۇستالعان  "دەمپارتيا" بەلسەندىلەرى ىرىسبەك توقتاسىن مەن داۋرەن دوستياروۆ 10 كۇنگە قامادى. الماتىنىڭ مامانداندىرىلعان اۋدانارالىق اكىمشىلىك سوتى ولارعا "ۇساق بۇزاقىلىق" بابى بويىنشا (اكىمشىلىك كودەكستىڭ 434-باپ، 1-تارماعى) ۇكىم شىعارعان. 

سوت قاۋلىلارىندا ەكى جاۋاپكەر 6 شىلدەدە ساعات 16.00 شاماسىندا اباي داڭعىلى مەن بايتۋرسىنوۆ كوشەسىنىڭ قيىلىسىنداعى ميتينگىدە "بىلاپىت سويلەپ، اينالاسىنداعىلارعا سىيلاماۋشىلىق ءبىلدىردى" دەپ جازىلعان. وسىلايشا بۇل ازاماتتار "قوعامدىق ءتارتىپتى جانە تۇلعالاردىڭ تىنىشتىعىن بۇزدى" دەپ كورسەتىلگەن قاۋلىدا. ىرىسبەك توقتاسىن تاعىلعان ايىپتى مويىنداماعان. ال دوستياروۆ جارتىلاي مويىنداعان.

دوستياروۆ جانە توقتاسىنمەن بىرگە ۇستالعان ءۋاليحان سۇيلەيمەنوۆ ەسىمدى بەلسەندى دە قامالعان.

"دەمپارتيا" جەتەكشىسى جانبولات مامايدىڭ ايەلى، بەلسەندى ينگا يمانبايدىڭ سوزىنە قاراعاندا، بوستاندىق اۋداندىق پوليتسيا باسقارماسى ءۇش ادامنىڭ 10 تاۋلىككە قامالعانىن ايتقانمەن "ولاردىڭ قازىر ناقتى قاي يزولياتوردا وتىرعانىن بىلە الماي وتىرمىز" دەيدى. 6 شىلدەدە تۇندە بەلسەندىلەر بوستاندىق اۋداندىق پوليتسيا باسقارماسى وكىلدەرىنىڭ سوزىنە سۇيەنىپ، قاسكەلەڭدەگى ۋاقىتشا قاماۋ يزولياتورىنا بارعان كەزدە ونداعىلار بەلسەندىلەردىڭ جوق ەكەنىن ايتقان. لوباچەۆسكيدەگى ۋاقىتشا قاماۋ يزولياتورى دا بەلسەندىلەردىڭ ولاردا ەمەس ەكەنىن ايتقان.

6 شىلدەدە ەلدە بۇرىنعى پرەزيدەنت نۇرسۇلتان نازارباەۆتىڭ تۋعان كۇنى اتاپ ءوتىلىپ جاتقان شاقتا "دەمپارتيانىڭ" ونداعان وكىلى اباي مەن بايتۇرسىنوۆ كوشەلەرىنىڭ قيىلىسىندا ميتينگ جاساماق بولعان. بىراق پوليتسيا ولاردى كەتتلينگە الىپ، شەرۋ جاساپ جۇرۋىنە مۇمكىندىك بەرمەدى. پوليتسيامەن تەكەتىرەس كەزىندە بىرنەشە ادام جاراقات العان. پوليتسيا "دەمپارتيا" بەلسەندىلەرىن 10 ساعاتقا جۋىق قورشاۋدا ۇستاپ تۇرعان.

"The Qazaq Times"