بەلارۋس ەۋرووداقتىڭ «شىعىس سەرىكتەستىگى» كەلىسىمىنەن شىقتى. بۇعان وداق قۇرامىنداعى ەلدەردىڭ مينسككە سانكتسيا سالۋى سەبەپ.

رەسمي مينسك ەو-نىڭ ەلدەگى وكىلىن شاقىرىپ، بىرقاتار جوبالاردان باس تارتاتىنىن ەسكەرتكەن.

ەۋروپالىق وداق بەلارۋسكە قارسى ەكونوميكالىق سانكتسيالاردى 24 ماۋسىمدا ەنگىزدى. سانكتسيالار، ەڭ الدىمەن، مۇناي ونىمدەرىن ەكسپورتتاۋعا تىيىم سالۋدى قامتيدى. تەمەكى ونەركاسىبىنە ارنالعان ينگرەديەنتتەردى، ينتەرنەتتى باسقارۋعا ارنالعان تەحنولوگيالار مەن باعدارلامالىق جاساقتامانى جەتكىزۋگە تىيىم سالىنادى. ەۋروپالىق ينۆەستورلارعا ءۇش ايدان استام مەرزىمگە بەلارۋستىڭ مەملەكەتتىك قۇرىلىمدارىنا، كومپانيالارىنا جانە مەملەكەت قاتىساتىن بانكتەرگە نەسيە بەرۋگە تىيىم سالىنادى.

22 ماۋسىمدا بەلارۋستە 78 ادام مەن سەگىز مەكەمە ەۋروپالىق وداقتىڭ ەكونوميكالىق سانكتسياسىنا ىلىكتى. قارا تىزىمگە ەنگەندەر قاتارىندا دەپۋتاتتار، پروكۋرورلار، سۋديالار جانە لۋكاشەنكونىڭ ۇلى دميتري مەن كەلىنى ليليا بار.

سانكتسيالىق تىزىمگە ەنگەندەردىڭ ەسەپشوتتارى بۇعاتتالىپ، ۆيزا بەرىلمەيدى. ەۋروپا وداعى سانكتسيانى وتكەن ايدا بەلارۋس رەجيمىنىڭ Ryanair ۇشاعىن ماجبۇرلەپ مينسكىگە قوندىرىپ، وپپوزيتسيالىق جۋرناليست رومان پروتاسەۆيچتى ۇستاعانىنا جاۋاپ رەتىندە سالدى.

نەگىزىنەن ەۋروپالىق وداق سانكتسيالارىنىڭ بۇل بلوگى ۇزاق ۋاقىتتان بەرى جالعاسىپ كەلەدى. 23 مامىردا Ryanair اۋە كومپانياسىنىڭ گرەكيادان ليتۆاعا بارا جاتقان FR497 رەيسى كەنەتتەن باعىتىن وزگەرتىپ، مينسكىگە قونۋعا ءماجبۇر بولعان. وسى جاعدايدان كەيىن ەۋرووداق پەن اقش سانكتسيا ەنگىزدى. بەلارۋس بيلىگى ارنايى اسكەري ۇشاق جىبەرىپ، رەيستە بومبا بولۋى مۇمكىن دەپ Ryanair ۇشاعىن مينسكىگە بۇرعان. بورتتان بومبا تابىلمادى، ەسەسىنە بەلارۋس پوليتسياسى ۇشاقتا بولعان وپپوزيتسيالىق جۋرناليست، NEXTA Live Telegram ارناسىنىڭ نەگىزىن قالاۋشىلاردىڭ ءبىرى، جۋرناليست رومان پروتاسەۆيچتى تۇتقىندادى. ۇشاقتى بۇرۋعا بەلارۋس رەجيمىنىڭ باسىندا وتىرعان الەكساندر لۋكاشەنكونىڭ ءوزى بۇيرىق بەرگەن.

"The Qazaq Times"