قارىم-قاتىناستىڭ ەڭ ناشار كەزىندەگى العاشقى قول الىسۋ. فوتو: اپ.

اقش پرەزيدەنتى جوۋ بايدەن مەن رەسەي پرەزيدەنتى ۆلاديمير پۋتين بۇگىن، 16 ماۋسىم سارسەنبى كۇنى جەنەۆا قالاسىندا كەزدەستى. كەزدەسۋگە دەيىن دە جانە كەزدەسۋ بارىسىندا دا تاراپتاردىڭ قانداي دا ءبىر ءىرى كەلىسىمنەن ۇمىتتەرى از بولدى.

قازىرگى اقپارات قۇرالدارىندا بار مالىمەتتەر بويىنشا، كەزدەسۋ بىرنەشە ساعاتقا سوزىلعان. الدىمەن ەكى ەلدىڭ پرەزيدەنتى جانە اقش مەملەكەتتىك حاتشىسى مەن رەسەي سىرتقى ىستەر مينيسترلەرىنىڭ الدىن-الا كەزدەسۋلەرى وتكەن. ودان كەيىن تاراپتار كەڭەيتىلگەن قۇرامدا قايتا جولىققان.

كەزدەسۋدەن بۇرىن بايدەن كومانداسىنان ءبىر شەنەۋنىك جۋرناليستەرگە بەرگەن پىكىرىندە، بايدەن مەن پۋتين اراسىنداعى رەسمي باس قوسۋدان جوعارى ناتيجە كۇتىلىپ وتىرماعانىن، بار بولعانى تاراپتار ءوز ەلگىلەرىن كەرى شاقىرىپ الۋدان باس تارتۋعا كەلىسۋ بويىنشا عانا ماقسات قۇرىلىپ وتىرعانىن ايتىپ وتكەن ەدى.

اقش-رەسەي قارىم-قاتىناسىنىڭ ناشارلاۋىنا بايلانىستى اقش ەلشىسى دجون سالليۆان مەن رەسەي ەلشىسى اناتولي انتونوۆ وسى جىلدىڭ باسىندا كەرى شاقىرىلدى. بۇل ەكەۋى دە بۇگىن جەنەۆادا بولادى دەگەن اقپارات بۇدان بۇرىن تاراعان.

اقش ۇكىمەتىنىڭ جوعارى لاۋازىمدى قىزمەتكەرى بايدەننىڭ كەلىسسوزدەردەگى ماقساتتارىنا مىنالار دەپ كورسەتكەن ەدى:  اقش پەن رەسەي ىنتىماقتاسا الاتىن ايماقتاردى ىزدەۋ; اقش-تىڭ نەگىزگى ۇلتتىق مۇددەلەرىن ناقتى كورسەتىپ، «رەسەيدىڭ اقش مۇددەلەرىنە قايشى كەلەتىن ارەكەتتەرىنە جاۋاپ بەرۋ.

بايدەن مەن ءپۋتيننىڭ ەكى ەلدىڭ پرەزيدەنتتەرى رەتىندە العاش كەزدەسۋىنىڭ ناتيجەسى، ساياسي باعاسى تۋرالى ايتۋ قازىرشە ەرتە. دەگەنمەن، تاراپتاردىڭ كەزدەسۋى اقش-رەسەي قاتىناسىنىڭ «ەڭ ناشار تۇسىندا» (پۋتين وسىلاي باعالاعان) كەزدەسۋىنىڭ ساياسي ءمانى تەرەڭ.

“The Qazaq Times”