قازاقستان قورعانىس مينيسترلىگى "قازاقستان مەن تاجىكستان ۇكىمەتى اراسىنداعى قايتارىمسىز اسكەري كومەك بەرۋ جونىندەگى كەلىسىمدى راتيفيكاتسيالاۋ تۋرالى" زاڭ جوباسىن ازىرلەدى. زاڭ جوباسىن پارلامەنت بەكىتسە، قازاقستان تاجىكستانعا اسكەري كومەك رەتىندە 3 ميلليوننان استام قارۋ-جاراق بەرەدى.

قورعانىس مينيسترلىگىنىڭ حابارلاۋىنشا، بۇل كەلىسىمگە حالىقارالىق شارتتارعا سايكەس بيىل قول قويىلعان.

اسكەري تەحنيكا جامبىل وبلىسىنىڭ وتار ستانتسياسىنداعى اسكەري اۋماقتان الىنىپ، تەمىر جول ارقىلى دۋشانبەنىڭ روحاتي ستانتسياسىنا جەتكىزىلمەك. كەلىسىمگە سايكەس اسكەري مۇلىكتەن سالىق الىنبايدى. تاجىكستان تارابى شىعىندى ءوز موينىنا الادى.

جۋىردا قازاقستان پرەزيدەنتى قاسىم-جومارت توقاەۆ رەسمي ساپارمەن تاجىكستانعا بارعان. وندا ەكى ەل پرەزيدەنتىنىڭ كەزدەسۋى بارىسىندا ساۋدا-ەكونوميكالىق قاتىناستى نىعايتۋ، ينۆەستيتسيا تارتۋ، كولىك-ترانزيت مۇمكىندىگىن ارتتىرۋ جونىندە كەلىسىمگە كەلگەن. سونىمەن بىرگە قازاقستاننان وقۋ ورىندارىن اشۋ جونىندە دە تالقىلاعان. دەلەگاتسيا مۇشەلەرى 6 قۇجاتقا قول قويعان. ول قۇجاتتاردىڭ اراسىندا اسكەري كومەك جونىندە كەلىسىم بولماعان.

"The Qazaq Times"