قارۋلى كۇش قولدانام دەگەن ترامپ نەگە سوزىنەن قايتتى؟

اقش ۇكىمەتى الەمدى دۇرلىكتىرىپ، «انە اتتى، مىنە اتاتىن بولدى» دەپ داۋرىققان سولتۇستىك كورەيانىڭ التىنشى رەتكى يادرولىق سىناعى، پەنتاگون بولجاعان ۋاقىتتا بولماي قالدى. الايدا، سولتۇستىك كورەيا ماسەلەسىندە ترامپ ۇكىمەتى وڭتۇستىك كورەيا مەن قىتايعا قاراتا قىسىمىن ودان ارى ارتتىرىپ وتىر. اق ءۇي سولتۇستىك كورەيا قاۋىپى جاڭا دەڭگەيگە جەتتى، ءبىز وعان قارسى تۇرۋ ءۇشىن دە تىڭ كوزقاراس ورناتۋىمىز كەرەك دەگەن جاڭا ۇران كوتەردى.

ۋاشينگتون تارابى سول.كورەيا ماسەلەسىندە الەمدىك اسكەري ارەكەتتەردەن باسقا جولمەن شەشۋدى قىتاي بيلىگىنىڭ موينىنا ارتىپ وتىر. ماقسات – كورەي تۇبەگى ماسەلەسىن شەشۋدە قىتاي سالماعىن ارتتىرۋ دەپ كورسەتتى. ونىڭ تاعى ءبىر ءمانى كورەي تۇبەگىندەگى تۋىلۋى مۇمكىن سوعىستىڭ تاريحي جاۋاپكەرشىلىگىن ءبولىسۋ.

اق ءۇي ۇلتتىق قاۋىپسىزدىك كەڭەسشىسى H.R. McMaster «ABC News» ارناسىنىڭ «وسى اپتا» (This Week) باعدارلاماسىندا اتالعان ماسەلە تۋرالى ءوز كوزقاراسىن ءبىلدىردى. ونىڭ ويىنشا اقش ۇكىمەتى مەن ونىڭ وڭىردەگى وداقتاستارى (بۇرىنعى وڭ.كورەيا، جاپونيا، كەيىنگى كەزدە ورتاقتاسۋعا يلانعان قىتاي) ءۇشىن، تۇبەك جاعدايى قىل ۇستىندە تۇر دەۋگە بولادى. «انىعىن ايتۋ كەرەك، قازىر تاراپتار اسكەري ءىس-قيمىلدان وزگە قانداي دا ءبىر ءونىمدى شەشۋ جولى تابىلا قالسا، قۋانا كەلىسىم بەرگەلى تۇر»، – دەيدى اق ءۇي كەڭەسشىسى،

اقش پەن سول.كورەيا اراسىندا قارۋلى كۇشپەن جاۋاپتاسۋعا از-اق قالعان دا، اق ءۇي جوعارى لاۋازىمدىلارى كەنەتتەن بوساي قالدى. بۇل ولاردىڭ جەكسەنبى كۇنى جاريالاعان پىكىرلەرىنەن بايقالدى. مىسال رەتىندە اقش پرەزيدەنتىنىڭ وتكەن اپتاداعى سوزدەرىن الۋعا بولادى. اپتانىڭ باس شەنىندە: «ەگەر قىتاي سول.كورەيا ىسىندە قولداۋشىلىق تانىتپاسا، وندا اقش قارۋلى كۇش قولداناتىن بولادى»، – دەپ ايبارلانعان ترامپ، جەكسەنبى كۇنى Twitter پاراقشاسىنا: «اقش ءالى دە بولسا سابىرلىقپەن كۇتۋگە بار»، – دەپ جازعان بولاتىن.

“The Qazaq Times”