حالىقارالىق داۋ: «بەلاۆيا» ەۋروپاعا ۇشپايتىن بولدى

مينسكىدە بولعان وقيعاعا بايلانىستى بەلارۋستىڭ «بەلاۆيا» اۋە تاسىمالداۋشىسى بۇگىننەن باستاپ 8 ەلگە ۇشپايتىن بولدى.

ەندى 27 مامىر مەن 30 قازان ارالىعىندا مىنا 12 باعىت بويىنشا رەيستەر ورىندالمايدى. بۇل – ۆارشاۆا، ميلان، امسترەدام، ريم، ماينداعى فرانكفۋرت، بەرلين، ميۋنحەن، گاننوۆەر، ۆەنا، بريۋسسەل، بارسەلونا مەن كالينينگراد. اتالعان باعىتتار بويىنشا بيلەت ساتىپ الىپ قويعان جولاۋشىلارعا ءبىر جىل ىشىندە ونىڭ تولىق قۇنى قايتارىلادى. بۇعان دەيىن كومپانيا شۆەتسيا، ۇلىبريتانيا، فرانتسيا، ليتۆا مەن ۋكرايناعا دا ساپارلارىن توقتاتقان ەدى. نەگىزى بلۋمبەرگ اگەنتتىگىنىڭ حابارالۋىنشا، بىلتىر «بەلاۆيا» 210 ميلليون دوللار پايدا تاپقان.

23 مامىردا بەلارۋس ارنايى قىزمەتى ليتۆاعا باعىت العان جولاۋشى ۇشاعىنا «بومبا قويىلدى» دەگەن حاباردى جەلەۋ ەتىپ، رومان پروتاسەۆيچ وتىرعان كوممەرتسيالىق ۇشاقتى مينسكىگە قونۋعا ماجبۇرلەدى. بورتتان بومبا تابىلمادى، ەسەسىنە بەلارۋس پوليتسياسى ۇشاقتا بولعان وپپوزيتسيالىق جۋرناليست، NEXTA Live Telegram ارناسىنىڭ نەگىزىن قالاۋشىلاردىڭ ءبىرى، جۋرناليست رومان پروتاسەۆيچتى تۇتقىندادى. ۇشاقتى بۇرۋعا بەلارۋس رەجيمىنىڭ باسىندا وتىرعان الەكساندر لۋكاشەنكونىڭ ءوزى بۇيرىق بەرگەن.

كەيىننەن بريۋسسەلدەگى كەزدەسۋدە ەۋروپا وداعىنا مۇشە 27 ەلدىڭ ليدەرلەرى بەلارۋس بيلىگىنە تاعى دا سانكتسيا سالۋعا كەلىستى. ەۋرووداق ليدەرلەرى حالىقارالىق ازاماتتىق اۆياتسيا ۇيىمىن (ICAO) وقيعانى تەرگەۋگە شاقىردى. بۇل ۇيىم ۇشاقتىڭ مينسكىگە قونۋىن چيكاگو كونۆەنتسياسى بويىنشا اۋە تاسىمالىنىڭ حالىقارالىق ەرەجەسىنە قايشى ارەكەت دەپ اتادى.

ەو Ryanair وقيعاسى بولماي تۇرىپ بەلارۋسكە سانكتسيالاردىڭ ءتورتىنشى پاكەتىن دايىندالىپ جاتقان ەدى. ونىڭ ىشىندە وپپوزيتسيا وكىلدەرىن قۋدالاعانى ءۇشىن جەكە جانە زاڭدى تۇلعالارعا ۆيزا بەرۋگە تىيىم سالۋ، اكتيۆتەرىن بۇعاتتاۋ سەكىلدى شەكتەۋلەر بار. باتىس ەلدەرى مەن وپپوزيتسيا بىلتىر تامىزدا وتكەن پرەزيدەنت سايلاۋىن زاڭسىز سانايدى. بۇل سايلاۋدا الەكساندر لۋكاشەنكو جەڭىسكە جەتتى دەپ جاريالانعانىمەن، حالىق مەن باتىس ەلدەرى سايلاۋ ادىلەتسىز ءوتتى دەيدى.

"The Qazaq Times"