تۇرعىمباەۆقا اشىق حات: ساتيرا – قىلمىس ەمەس!

Factcheck سايتى ساتيرالىق ماتەريالدار جاريالاعانى ءۇشىن ءىستى بولعان تەمىرلان ەڭسەبەكتىڭ تەرگەلۋىنە بايلانىستى ىشكى ىستەر مينيسترلىگىنە اشىق ۇندەۋ جاريالادى. The Qazaq Times رەداكتسياسى دا اتالعان ۇندەۋگە قوسىلادى.

15 مامىردا Instagram الەۋمەتتىك جەلىسىندە ساتريالىق ماتەريال جاريالايتىن @qaznews24 ساتيرالىق پابليگىنىڭ جەتەكشىسى تەمىرلان ەڭسەبەكتىڭ ۇيىندە پوليتسيا ءتىنتۋ جۇرگىزگەن. كەيىننەن ونى الماتى پوليتسيا دەپارتامەنتىندە بىرنەشە ساعات بويى تەرگەگەن. رەسمي مالىمەت بويىنشا، بويىنشا تەرگەۋ قىلمىستىق كودەكستىڭ 274-بابى بويىنشا (كورىنەۋ جالعان اقپارات تاراتۋ) جۇرگىزىلىپ جاتىر.

ۇندەۋ جولداعان وزگە دە اۆتورلار سىندى ءبىز دە ادامداردى قۋدالاۋدىڭ ورنىنا مەدياساۋاتتىلىقتى ارتتىرۋ قاجەت دەپ سانايمىز. پوليتسيادان ەڭسەبەكتى قۋدالاماۋدى، «جالعان اقپارات تاراتۋ» بابىن رەپرەسسيا ماقساتىندا پايدالانباۋدى، ەڭسەبەك ءىسىنىڭ اشىق جۇرگىزىلۋىن، وندا زۇلىم وي بولماعانىن دالەلدەيتىن كۋالىكتىڭ ءبارىن ەسەپكە الۋدى تالاپ ەتەمىز.

ۇندەۋ ءماتىنى تومەندەگىدەي:

قۇرمەتتى ەرلان زامانبەكۇلى، 2021 جىلدىڭ 15 مامىرىندا Instagram-دا @qaznews24 ساتيرا پاراقشاسىنىڭ اكىمشىسى تەمىرلان ەڭسەبەك ۇستالدى. ونىڭ ۇيىنە ءتىنتۋ جۇرگىزىپ، كەيىن ونى الماتىداعى پوليتسيا دەپارتامەنتىنە جەتكىزىپ، بىرنەشە ساعات جاۋاپ العان. پوليتسيانىڭ رەسمي حابارلاماسى بويىنشا، تەرگەۋ قر قك 274-بابى بويىنشا ءجۇرىپ جاتىر. ءبىز ساتيرالىق پاراقشا اۆتورى تەمىرلان ەڭسەبەكتى قاماۋعا الىپ، ونى جالعان اقپارات تاراتتى دەپ ايىپتاۋ، كەم دەگەندە، ورەسكەل قاتە، ال شىن مانىندە، قازاقستان رەسپۋبليكاسى كونستيتۋتسياسىنىڭ 20-بابىن بۇزۋ دەپ ەسەپتەيمىز.

ساتيرا – قىلمىس ەمەس. بۇكىل الەمدە ساتيرا مەن سىن، ونىڭ ىشىندە مەملەكەتتىڭ لاۋازىمدى تۇلعالارىنا قاتىستى ايتىلسا قالىپتى نارسە رەتىندە قابىلدانادى جانە كەرىسىنشە، قوعام دامىعانىنىڭ، پىكىر ەركىندىگى قۇقىعى ساقتالعانىنىڭ بەلگىسى.

حالقىمىزدىڭ ۇلتتىق ونەرى – ايتىس تا ساتيرا مەن سىننان تۇرادى، پىكىر ەركىندىگى – ۇلتتىق ءداستۇر مەن ماقتانىشىمىز. ءسوز بوستاندىعىن قامتاماسىز ەتۋ – قازاقستان ءوز موينىنا العان حالىقارالىق مىندەتتەردىڭ ءبىرى.

qaznews24 ساتيرالىق اككاۋنتىنىڭ اۆتورى قاجەتتى ەسكەرتۋدىڭ ءبارىن جازىپ قويعان، وعان قاجەت دالەل بار، ۇسىنۋعا دايىنبىز. ەڭسەبەكتىڭ ساتيراسىن شىنايى جاڭالىق رەتىندە تاراتقان جەرگىلىكتى ءانونيمدى پاراقشالاردىڭ يەلەرى ءۇشىن ول جاۋاپ بەرمەيدى (وعان دا كۋالىك پەن دالەل بار).

ايتا كەتەيىك، ەڭسەبەكتىڭ ساتيراسىن شىنايى جاڭالىق رەتىندە تاراتقان پاراقشالاردىڭ اۋديتورياسى ەڭسەبەكتىڭ پاراقشاسىنداعى ادام سانىنان ون ەسە، ءتىپتى كەيبىرى ءجۇز ەسە اسىپ كەتەدى. بۇل پاراقشا اكىمشىلەرىنىڭ قاساقانا ارەكەتى ەمەس، مەدياساۋاتتىڭ تومەندىگىنەن ساتيرا كونتەنتتىڭ شىنايى جاڭالىق رەتىندە جاپپاي تاراپ كەتۋىنە سەبەپ بولدى.

فاكتچەكەر رەتىندە ءبىز ۇنەمى فەيكپەن كۇرەسەمىز جانە جالعان اقپارات قوعامعا، ناقتى ءبىر تۇلعاعا تىكەلەي قاۋىپ توندىرمەسە ونىمەن رەپرەسسيالىق شارالار ارقىلى ەمەس، مەدياساۋاتتى ارتتىرۋ ارقىلى كۇرەسۋ قاجەت ەكەنىن تۇسىندىك.

qaznews24 اككاۋنتىنان تاراعان اقپاراتقا كەلەر بولساق، ەشكىمگە ماتەريالدىق تا، باسقالاي دا شىعىن كەلگەن جوق. ال بارلىق جاريالىم ويدان شىعارىلعانىن اشىق مالىمدەگەن پاراقشا اكىمشىسى ساتيرا كونتەنت تۋرالى جازىلعان ديسكلەيمەردى وقىماي نەمەسە الىپ تاستاپ، ساتيرانى فەيككە اينالدىرعان ادامداردىڭ ارەكەتىنە جاۋاپ بەرە المايدى.

سونداي-اق، پوليتسيا قازاقستان قوعامى ءۇشىن شىن مانىندە قاۋىپتى دەزينفورماتسيانى جۇيەلى تۇردە تاراتاتىن ادامدار مەن جەلىلى پاراقشالاردىڭ اتاۋىن وتە جاقسى بىلە تۇرا (دالەلدەر مەن باسقا دا دەرەكتەر Factcheck.kz پەن Masa.Media بىرلەسىپ جاساعان زەرتتەۋدە جاريالاندى) ولاردى ەمەس، ەشكىمگە زيانى جوق ساتيرا پاراقشا اۆتورىن قر قك 274-بابى بويىنشا جاۋاپقا تارتقانىنا ءبىز نارازىمىز.

تەمىرلان ەڭسەبەكتى قر قك 274-بابى بويىنشا ايىپتاۋ ورىنسىز جانە جەلىدەگى بەلسەندى، شىن مانىندە جالعان اقپارات تاراتۋشىلاردىڭ جاۋاپقا تارتىلمايتىنىن انىق كورسەتەدى. سونداي-اق 274-باپتى رەپرەسسيالىق ماقساتتا پايدالانۋعا مۇمكىندىك بەرەدى، بۇل قازىرگى دەموكراتيالىق قوعامدا جول بەرۋگە بولمايتىن دۇنيە! ءبىز ءىستىڭ بارىنشا اشىق جۇرگىزىلۋىن جانە تەمىرلان ەڭسەبەكتىڭ ارەكەتىندە زۇلىم وي بولماعانىن دالەلدەيتىن كۋالىكتىڭ ءبارى ەسەپكە الىنۋىن، ساتيرالىق پاراقشا اۆتورىنا تاعىلعان ايىپتاردىڭ الىنۋىن تالاپ ەتەمىز.

"The Qazaq Times"