بەلارۋستە لۋكاشەنكونىڭ زاڭنامالىق قۇزىرەتىن شەكتەۋ جوسپارلانىپ جاتىر

بەلارۋس پرەزيدەنتىنىڭ زاڭ شىعارۋ فۋنكتسياسىن شەكتەۋ جوسپارلانىپ جاتىر. ەگەر قۇجات قابىلدانسا، پرەزيدەنت زاڭدىق كۇشى بار جارلىقتاردى شىعارۋ مۇمكىندىگىنەن ايىرىلادى.

كونستيتۋتسيالىق كوميسسيانىڭ توراعاسى، بەلارۋس كونستيتۋتسيالىق سوتىنىڭ باسشىسى پەتر ميكلاشەۆيچ: «پارلامەنتتىڭ زاڭ شىعارۋ فۋنكتسياسىن نەعۇرلىم تولىق ىسكە اسىرۋى ماقساتىندا كونستيتۋتسيادان رەسپۋبليكا وكىلدەر پالاتاسى مەن كەڭەسىنىڭ پرەزيدەنتكە زاڭدىق كۇشى بار دەكرەتتەر شىعارۋعا زاڭنامالىق وكىلەتتىكتەر بەرۋىن كوزدەيتىن ەرەجەلەردى الىپ تاستاۋدى ۇسىنامىن»، – دەدى. مۇنىمەن قاتار، بيلىك ءترانزيتى دە تالقىلاندى. بىراق «ەۋروپانىڭ سوڭعى ديكتاتورى» اتانعان لۋكاشەنكونىڭ ءوزى ەلدە بيلىك ءترانزيتى جۇزەگە اسپايتىنىن كەسىپ ايتقان.

بۇعان دەيىن 9 مامىردا بەلارۋس پرەزيدەنتى الەكساندر لۋكاشەنكو «ەگەمەندىك پەن كونستيتۋتسيالىق قۇرىلىستى قورعاۋ تۋرالى» جارلىققا قول قويعان. رەسمي قۇجاتتا: «مەملەكەت باسشىسى قاستاندىق، تەررور شابۋىلى، سىرتقى اگرەسسيا جانە باسقاداي كۇش قولدانۋ سالدارىنان قازا بولعان جاعدايدا مەملەكەتتىك ورگانداردىڭ بارلىعى جانە ولاردىڭ باسشىلارى قاۋىپسىزدىك كەڭەسىنىڭ شەشىمىنە ساي ارەكەت ەتەدى، كەڭەس وتىرىسىنا پرەمەر-مينيستر توراعالىق ەتەدى. بۇعان قوسا ەل اۋماعىندا دەرەۋ توتەنشە نە اسكەري جاعداي جاريالانادى»، – دەلىنگەن.

بەلارۋس كونستيتۋتسياسى بويىنشا، پرەزيدەنت قايتىس بولعان نەمەسە قىزمەتىن اتقارۋ قابىلەتىنەن ايىرىلعان جاعدايدا ونىڭ مىندەتىن اتقارۋ پرەمەر-مينيسترگە جۇكتەلەدى دەپ كورسەتىلگەن، ال قاۋىپسىزدىك كەڭەسىنە بەرىلەتىنى جايلى ەشتەڭە جازىلماعان.

"The Qazaq Times"