پوليتسيا الماتى قالاسىندا ورتالىق دەمالىس جانە مادەنيەت ساياباعىنىڭ الدىندا بىرنەشە بەلسەندىنى اۆتوزاكقا سالىپ اكەتتى*.

پاركتىڭ باس قاقپاسىنا كىرەبەرىس تۇستا ساعات 13.00 شاماسىندا 4-5 ايەل «ساياسي تۇتقىندارعا بوستاندىق!»، «ەۋروپارلامەنت قارارى ورىندالسىن!»، «قىمباتشىلىق توقتاسىن!»، «قىتاي ەكسپانسياسىنا قارسىمىن»، «قىتايدىڭ 55 زاۋىتى سالىنباسىن» دەپ ۇرانداستى. نارازىنىڭ ءبىرى «باعانىڭ ءوسۋى نازارباەۆتىڭ كىناسى» دەگەن جازۋى بار پلاكاتتى اشىپ ۇلگەردى. ولار پىكىرىن ايتا بەرگەن بويدا اينالانى تورۋىلداپ جۇرگەن پوليتسيا قىزمەتكەرلەرى سويلەۋگە مۇرشا بەرمەستەن بىردەن اۆتوزاكقا كۇشتەپ مىنگىزدى.

ۇستاۋ بارىسىندا ازاماتتىق ۇلگىدە كيىنگەن ءارى ماسكامەن بۇركەنگەن بەلگىسىز ونشاقتى ەر ادام جۋرناليستەردىڭ فوتو-ۆيدەوكامەرالارىن كولەگەيلەپ، كاسىبي قىزمەتىنە كەدەرگى جاسادى. پوليتسەيلەرگە ءامىر بەرىپ جۇرگەن الماتى قالالىق پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى نۇرلان الماسبەكوۆكە ۇقساس «پولكوۆنيك» جۋرناليستەردىڭ ۋاجىنە مويىن بۇرىپ قارامادى، قىلمىستىق كودەكستىڭ 158-بابى بويىنشا ءجۋرناليستىڭ كاسىبىنە ناقتى كەدەرگى جاسالعانىن كوزگە ىلمەدى. قۇقىق قورعاۋ ورگاندارى وكىلدەرىنىڭ ەشبىرى تىلشىلەردىڭ ەسكەرتۋىنە قاراماستان ەشقانداي شارا قولدانبادى. ادەتتە مۇنداي ءادىس استانا، شىمكەنتتە جانە ءوڭىر ورتالىقتارىندا ءجيى قولدانىلۋشى ەدى.

پولكوۆنيك پەن بەلسەندىلەر. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

قولشاتىر جايعان «تيتۋشكالار» اقپارات قۇرالدارىنىڭ قىزمەتكەرلەرىنە جاعدايدى تاسپالاۋعا كەدەرگى جاساپ باقتى. 1 مامىر 2021 جىل. ورتالىق ساياباق. الماتى قالاسى. فوتو: QT

بەلگىلەنگەن اۋماقتا كۇندىزگى 11.00-دەن باستاپ ءموبيلدى ينتەرنەت ءوشىرىلدى. جىبەك جولى كوشەسىنەن ورىن تەپكەن اربات ماڭىندا ءبىر قوسىلىپ، ءبىر ءوشىپ تۇردى. كەيبىر جۇرگىنشىلەردىڭ ەمىن-ەركىن ءجۇرىپ-تۇرۋىنا كەدەرگى جاسادى. گوگول مەن قالداياقوۆ كوشەلەرىنىڭ قيىلىسىنان ساياباقتىڭ اۋزىنا دەيىنگى ارالىقتا قوعامدىق كولىكتەردىڭ قوزعالىسى شەكتەلدى.

نارازىلىق اكتسياعا قاتىسۋعا كەلگەن ايەلدەر. 1 مامىر 2021 جىل. ورتالىق ساياباق. الماتى قالاسى. فوتو: QT

بۇعان دەيىن قازاقستان استاناسىنىڭ سوتى «ەكسترەميستىك»، ال ەۋروپارلامەنت «بەيبىت» ۇيىم دەپ تانىعان قۋعىنداعى بانكير، وپپوزيتسيالىق ساياساتكەر مۇحتار ءابليازوۆ 1 مامىر كۇنى ءىرى قالالاردا  «قازاقستاننىڭ دەموكراتيالىق تاڭداۋى» قوزعالىسى جاقتاستارىن بەيبىت ميتينگكە شىعۋعا شاقىرعان. بىراق قازاقستاننىڭ كەيبىر پروكۋرورلارى اكتسيا سانكتسيالانباعانىن جانە زاڭسىز ەكەنىن ەسكەرتكەن.

بەلسەندىنىڭ كەيبىرى اۆتوزاكقا كۇشتەپ كىرگىزىلدى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

«بولماي قالعان اكتسياعا» كەلگەندەر ساياسي تۇتقىنداردى بوستاتۋدى، ەۋروپارلامەنتتىڭ اقپان ايىندا قابىلداعان قارارىن ورىنداۋدى، «قىتاي ەكسپانسياسىن» جانە قىمباتشىلىقتى توقتاتۋدى تالاپ ەتتى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

«قوشاتىرلىلاردىڭ» ءبىرى كامەرانى جابۋعا تىرىسىپ تۇر. 1 مامىر 2021 جىل. ورتالىق ساياباق. الماتى قالاسى. فوتو: QT

«قولشاتىر» ۇستاعاندار تىلشىلەردىڭ اقپارات قۇرالىنا كەدەرگى جاساپ جاتقانى، مۇنىڭ زاڭسىز ەكەنىن ايتقانىن ەلەمەي، العان بەتىنەن قايتپادى. اۆتوزاك جىلجىپ كەتكەنشە بوگەدى. 1 مامىر 2021 جىل. ورتالىق ساياباق. الماتى قالاسى. فوتو: QT

ۇستاۋ كەزىن بۇركەپ-جاسقاۋعا تىرىسقان «قولشاتىرلىلاردىڭ» تاعى بىرەۋى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

جۋرناليست كاسىبي قىزمەتىنە كەدەرگى جاساماۋىن تالاپ ەتكەنىمەن، «قولشاتىرلىلار» بۇعان قۇلاق اسپادى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

پولكوۆنيك «قاپتاعان قاپ-قارا قولشاتىردى» كورە تۇرا جۋرناليستەردىڭ قۇقىعىن قورعاۋعا ەمەس، كوبىنە اكتسيا قاتىسۋشىلارىن ۇستاۋعا كوپ ءمان بەردى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

ساياباققا تاياۋ جەردە تۇراتىن كەيبىر ازاماتتار اينالىپ وتۋگە ءماجبۇر بولدى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

اربات توڭىرەگى تۇگەل قورشالعان، اۋماقتى پوليتسەيلەر مەن اكىمدىك قىزمەتكەرلەرى باقىلادى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

گوگول كوشەسىنىڭ ساياباق كىرەبەرىسىنە دەيىنگى بويىندا كەمىندە 4-5 اۆتوزاك بولدى. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

ءابليازوۆ «ميتينگ وتەدى» دەپ كورسەتكەن ساياباق «دەزينفەكتسيالاۋعا» جابىلعانى حابارلانعان. 1 مامىر 2021 جىل. الماتى قالاسى. فوتو: QT / كۇلتەگىن اسپانۇلى

*اقپارات تولىقتىرىلدى

"The Qazaq Times"