فوتو: پوليت.رۋ

كەشە كەشتە قىتاي سىرتقى ىستەر مينيسترلىگى حابارلاما جاريالاپ كورەي تۇبەگى شيەلەنىسى باقىلاۋدان شىعىپ كەتكەنىن ەسكەرتتى. وسىدان بۇرىن سولتۇستىك كورەيا ەڭ جوعارى باسشىسى كيم چەن ىن وزدەرىنىڭ كەز-كەلگەن ۋاقىتتا يادرولىق سىناق جاساي بەرەتىنىن ايتقان ەدى. بۇعان قارسى اقش-تىڭ اۋىر اسكەري تەحنيكاسى «كارل ۆينسون» اۆياماتكاسى تۇبەكتىڭ ماڭىنا كەلگەن ەدى.

قىتايدىڭ سىرتقى ىستەر ءمينيسترى ۆاڭ ي (Wang Yi) قازىرگى تۇبەك جاعدايىن: «اقش-وڭتۇستىك كورەيا جانە سولتۇستىك كورەيا اراسى وتكىر قايشىلىقتا، كورەي تۇبەگى سىلكىنىس ۇستىندە، كوپ ۇزاماي سۇراپىل سوعىس داۋىلى تۇرادى»، – دەپ باعالاعان.

قىتاي جاعى بارلىق تاراپتى قايتالاي كەلىسىمگە شاقىرىپ وتىر. تۇبەكتە سوعىس تۋىلسا تاريحي جاۋاپكەرشىلىگى كىم كىمگە بولسا دا اۋىر بولاتىنى انىق. قازىرگى قيىن جاعدايدىڭ ءبىرى ءار تاراپ قارسى جاعىن تاريحي جاۋاپكەرشىلىگى اۋىر سوعىس سيتۋاتسياسىن تۋدىرۋعا يتەرمەلەپ وتىر. كورەي تۇبەگىندە سوعىس بىلتەسى ءبىر رەت تۇتانار بولسا، ونى ءوشىرۋدىڭ اسا قيىنعا سوعاتىنى بارىنە دە تۇسىنىكتى.

ترامپ ۇكىمەتى سولتۇستىك كورەيانى اۋىزدىقتاۋ ءۇشىن قىتاي مەن وڭتۇستىك كورەياعا قىسىم ءتۇسىرىپ وتىرعانى دا بەلگىلى. اسىرەسە بەيجىڭنەن سولتۇستىك كورەيا تۋرالى رەسمي شەكتەۋلەرىن بەكىتۋدى تالاپ ەتىپ وتىر. رەسمي بەيجىڭ ءوزىنىڭ ۇزاق جىلدىق ساياسي وداقتاسى سولتۇستىك كورەياعا شەكتەۋ سالمايىن دەسە وزىنە تۇسەتىن ەكونوميكالىق سانكتسيالاردىڭ قىسىمىنان الاڭدايدى. سانكتسيالار مەن ءتۇرلى قىسىمدار تۇراقسىزدىقتاردى جانە سوعىستى الىپ كەلسە، سولتۇستىك كورەيا ۇكىمەتىنىڭ قۇلاۋىنا دا اكەلىپ سوعۋى بەك مۇمكىن. ءبىر ەسەپتەن العاندا، بۇل – كورەي تۇبەگىندەگى شيەلەنىستى شەشۋدىڭ تۇپكى تياناعى.

بۇگىن سولتۇستىك كورەيادا ەلدىڭ قۇرۋشىسى كيم ير سەننىڭ تۋعانىنا 105 جىل جانە «كۇن مەرەكەسى» تويلانۋدا. كوپتەگەن ەلدەر وسى كۇندى سول.كورەيانىڭ التىنشى رەتكى يادرولىق سىناعىن جاسايتىن كۇنى دەپ بولجاعان. سولتۇستىك كورەيانىڭ التىنشى رەتكى يادرولىق سىناعى – كورەي تۇبەگىندەگى سوعىس بىلتەسىن تۇتاتۋشى. يادرولىق قارۋمەن تۇتانعان وتتىڭ ءسونۋى قيىن.

ەستاي بوجان

“The Qazaq Times”