Johnson & Johnson ۆاكتسيناسى قاۋىپسىز بە؟

ەۋروپاداعى ءدارى-دارمەكتەر جونىندەگى اگەنتتىك Johnson & Johnson ۆاكتسيناسىن قاۋىپسىز دەپ مالىمدەدى.

اتالعان اگەنتتىكتىڭ اتقارۋشى ديرەكتورى ەمەر كۋك: «Johnson & Johnson ۆاكتسيناسىنىڭ ارتىقشىلىعى ترومبتاردى ءتۇزىلۋ قاۋپىنەن باسىم بولىپ تۇر. پرەپاراتتىڭ قاعازىندا بۇل تۋرالى ارنايى ەسكەرتۋ جانە دەنساۋلىق ساقتاۋ جۇيەسىنىڭ ماماندارى ءۇشىن اقپارات بەرىلەدى. كوپ جاعدايدا اتالعان ۆاكتسينا كوروناۆيرۋس سالدارىنان اۋرۋحاناعا تۇسۋدەن جانە قايتىس بولۋدان قورعاي الادى»، – دەيدى. بۇل حاباردان كەيىن ەۋروكوميسسيا باسشىسى ۋرسۋلا فون دەر ليايەن «ەۋرووداقتا ۆاكتسينالاۋ ناۋقانىن ىسكە اسىرۋ ءۇشىن جاقسى جاڭالىق» ەكەنىن ايتتى.

14 ساۋىردە اقش-تا ازىق-تۇلىك پەن ءدارى-دارمەك ساپاسىن باقىلاۋ باسقارماسى مەن اۋرۋلاردى باقىلاۋ ورتالىعى Johnson & Johnson كومپانياسىنىڭ ۆاكتسيناسىن قولدانۋدى توقتاتۋدى ۇسىنعان. سەبەبى اتالعان ەكپەنى قابىلداعان 6 ادامدا قاننىڭ ۇيۋى تىركەلىپ، بىرەۋى كوز جۇمعان.

قاڭتاردا بەلگيالىق Janssen (Johnson & Johnson برەندىنە تيەسىلى) كومپانياسى وندىرگەن كوروناۆيرۋسقا قارسى ەكپەسىنىڭ ءبىر دوزاسى سىناق كەزىندە 66% تيىمدىلىك كورسەتكەن. كومپانيا بيىل ءبىر ميلليارد دوزا شىعارۋدى جوسپارلاعان. سىناق ناتيجەسى انىقتالعاننان كەيىن اقش بۇل كومپانياعا الدىن الا 100 ميلليون دوزاعا، كانادا 38 ميلليون دوزاعا، ۇلىبريتانيا 30 ميلليون دوزاعا تاپسىرىس بەرگەن.

بۇعان دەيىن ەۋروپا ەلدەرى AstraZeneca ەكپەسىن دە ساتىپ الۋدان باس تارتقان. سەبەبى «پرەپاراتتىڭ قان اينالىمىن ناشارلاتىپ، ترومبىلاردىڭ تۇزىلۋىنە ىقپال ەتەدى» دەگەن بولجامدار ايتىلدى. كانادادا اتالعان ەكپەنى 55 جاستان اسقاندارعا سالۋعا تىيىم سالىندى.

"The Qazaq Times"