فوتو: https://xs.uz

ارگەنتينادا رەسەيلىك «سپۋتنيك V» ۆاكتسيناسىن قابىلداعان ەكى ادامنىڭ ترومبوتسيتتەرى ازايىپ، قانسىراۋ جاعدايى تىركەلگەن.

ارگەنتينانىڭ دەنساۋلىق ساقتاۋ مينيسترلىگى جاريالاعان ەسەپتە جالپى 1,5 ملن دوزانىڭ جاناما اسەرى جازىلعان. اتالعان ەكپەدەن كەيىن 2 3 804 جاعدايدا جاناما اسەر تىركەلگەن. ەكپەدەن كەيىن دەنە قىزۋىنىڭ كوتەرىلۋى، باس اۋرۋى، تۇماۋعا ۇقساس بەلگىلەر، ۋكول سالىنعان جەردىڭ ءىسۋى سياقتى بەلگىلەر بايقالعان.

مالىمەتتەر بويىنشا، رەسەيلىك ۆاكتسينامەن بايلانىستى سيرەك كەزدەسەتىن جەتى جاعداي تىركەلگەن: جوعارىدا ايتىلعان ترومبوتسيتوپەنيادان بولەك، انافيلاكسيانىڭ بەس جاعدايى (قاۋىپتى اللەرگيالىق رەاكتسيا) انىقتالعان.

بۇعان دەيىن «سپۋتنيك V» ەكپەسىن قابىلداعان ارگەنتينا پرەزيدەنتى البەرتو فەرناندەس كوروناۆيرۋسپەن اۋىرعان. پتر تەستى وڭ ناتيجە كورسەتكەن سوڭ ول وقشاۋلانىپ، ەكى اپتاعا جۋىق بۋەنوس-ايرەس ماڭىنداعى Quinta de Olivos پرەزيدەنتتىك رەزيدەنتسياسىندا بولدى. 14 ساۋىردە ونىڭ دارىگەرلەرى فەرناندەستىڭ ساۋىعىپ، قىزمەتىنە ورالاتىنىن حابارلادى. بۇل مالىمدەمەدەن كەيىن حالىقتى رەسەيلىك ۆاكتسيناعا دەگەن كۇمانى ارتقان. بىراق ارگەنتينا پرەزيدەنتى «الاڭداۋعا نەگىز جوق، جاپپاي ۆاكتسيناتسيالاۋ جۇرگىزىلۋى ءتيىس» دەدى.

رەسەي «سپۋتنيك V» ۆاكتسيناسىن تولىق كلينيكالىق سىناقتان وتكىزبەي جاتىپ جاپپاي ۆاكتسينالاۋعا رۇقسات ەتكەن بولاتىن. ماسكەۋدىڭ بۇل قادامى ەل ىشىندە دە، الەم ەلدەرى اراسىندا دا پىكىرتالاسقا جول اشىپ ەدى. روسزدراۆنادزور باسشىسى اللا سامويلوۆا بۇعان دەيىن «سپۋتنيك V» ەگىلگەندەر اراسىندا بىردە-ءبىر ترومبوز انىقتالمادى دەپ مالىمدەگەن. رەسەي دەنساۋلىق ساقتاۋ مينيسترلىگى پرەپاراتتى سالعاننان كەيىن تۋىندايتىن جاناما اسەر جايلى ستاتيستيكا جاريالاعان جوق.

9 ساۋىردە سلوۆاكيا ۇكىمەتى دە رەسەيلىك ەكپەگە كۇمان كەلتىرەتىنىن مالىمدەدى. سەبەبى، كلينيكاعا دەيىنگى جانە كلينيكالىق زەرتتەۋلەردە قولدانىلعان ۆاكتسينالار سلوۆاكياعا جىبەرىلگەن پارتيالاردىڭ سيپاتتامالارىنا سايكەس كەلمەگەنى ءمالىم بولدى. ياعني ۆاكتسينانى ساتىپ الۋ كەزىندە جاساسقان كەلىسىمشارتتاعى تولىق مالىمەتتەر كەلتىرىلگەن قۇجاتتى رەسەي تارابى ۇسىنباعان. دەرەكتەردىڭ شامامەن 80%-ى جوق.

سلوۆاكيا مەن ۆەنگريا ەۋروپانىڭ ءدارى-دارمەكتى رەتتەۋ اگەنتتىگىنىڭ شەشىمىن كۇتپەي، رەسەيدەن 2 ميلليون دوزا ۆاكتسينا ساتىپ الۋ جونىندە كەلىسىمگە وتىرعان. ەلگە «سپۋتنيكتى» جەتكىزۋگە بايلانىستى كەلىسپەۋشىلىكتەر ءبىر ايدان بەرى جالعاسىپ كەلەدى. ءتورت پارتيالىق باسقارۋشى كواليتسياداعى سەرىكتەستەردىڭ قارسىلىعىنا قاراماستان، سول كەزدە پرەمەر-مينيستر بولعان ماتوۆيچ جاسىرىن تۇردە دەنساۋلىق ساقتاۋ مينيسترىنە رەسەيمەن كەلىسىم جاساسۋدى جانە ۆاكتسينا ساتىپ الۋدى تاپسىرعان. ناتيجەسىندە التى مينيستر، ونىڭ ىشىندە پرەمەر بولعان ءماتوۆيچتىڭ ءوزى وتستاۆكاعا كەتتى.

مامانداردىڭ پىكىرىنشە «سپۋتنيك V» ۆاكتسيناسى كوروناۆيرۋسقا قارسى جۇمىس ىستەۋى بريتانيادا شىعارىلعان Oxford/AstraZeneca مەن بەلگيادا جاسالعان Janssen ۆاكتسيناسىنا ۇقساس. ياعني، جەڭىلدەتىلگەن ساسىق تىماۋ ۆيرۋسى ارقىلى كوروناۆيرۋستىڭ ءبىر بولىگىن ادامنىڭ يمۋندىق جۇيەسىنە جەتكىزەدى. سونىڭ ناتيجەسىندە ادامنىڭ يمۋندىق جۇيەسى كوروناۆيرۋسقا قارسى كۇرەسۋگە قابىلەتتە بولماق.

The Lancet باسىلىمى مامانداردىڭ زەرتتەۋ ناتيجەسىن العا تارتا وتىرىپ «سپۋتنيك V»-ءتىڭ ونىمدىلىگىن، قاۋىپسىزدىگى Pfizer, Oxford / AstraZeneca, Moderna جانە Janssen قاتارلى كوروناۆيرۋسقا قارسى ۆاكتسينالاردىڭ قاتارىنا قويۋعا بولادى دەگەن.

قازاقستاندا اتالعان ۆاكتسينا 1 اقپاننان باستاپ سالىنا باستادى. دەگەنمەن، «سپۋتنيك V» تۋراسىندا ازاماتتاردىڭ پىكىرى ءارتۇرلى.

ايتا كەتەيىك...

ءساۋىردىڭ باسىندا ەۋروپانىڭ ءدارى-دارمەك جونىندەگى اگەنتتىگى بريتان/شۆەد كومپانيالارى بىرلەسىپ وندىرگەن AstraZeneca ەكپەسى ەگىلگەن كەيبىر ادامداردىڭ اعزاسىندا ترومبوزداردىڭ پايدا بولۋى ەكپەمەن بايلانىستى ەكەنىن راستادى. 15 ناۋرىزدا نيدەرلاند بيلىگى AstraZeneca ەكپەسىنىڭ جاناما اسەرى تۋرالى حابارلانعاننان كەيىن، وسى پرەپاراتپەن حالىقتى ۆاكتسيناتسيالاۋ پروتسەسىن توقتاتىپ تاستادى. ال وعان دەيىن يرلانديا، يسلانديا، دانيا جانە نورۆەگيا وسىنداي شەشىم قابىلداعان بولاتىن.

ماماندار AstraZeneca ەكپەسىمەن قاتار، بەلگيالىق Janssen (Johnson & Johnson برەندىنە تيەسىلى) كومپانياسى وندىرگەن كوروناۆيرۋسقا قارسى ەكپەدەن باس تارتۋعا شاقىرىپ وتىر. كەشە اقش-تا ازىق-تۇلىك پەن ءدارى-دارمەك ساپاسىن باقىلاۋ باسقارماسى مەن اۋرۋلاردى باقىلاۋ ورتالىعى Johnson & Johnson كومپانياسىنىڭ ۆاكتسيناسىن قولدانۋدى توقتاتۋدى ۇسىندى. اتالعان ەكپەنى قابىلداعان 6 ادامدا قاننىڭ ۇيۋى تىركەلىپ، بىرەۋى كوز جۇمعان. بىراق قاننىڭ ۇيۋى ناقتى نەدەن بولعانى ازىرگە دالەلدەنگەن جوق. اقش-تا قازىرگە دەيىن تۇرعىندارعا وسى ۆاكتسينانىڭ 6,8 ميلليون دوزاسى سالىنعان.

"The Qazaq Times"