اقش اسكەرلەرىنىڭ اۋعانستاننان شەگىنۋ ۋاقىتى كەشەۋىلدەدى. فوتو: interfax.

ماسكەۋ ۋاشينگتوننىڭ اۋعانستاننان اسكەرىن كەرى شەگىندىرۋ مەرزىمىن ۇزارتقانىنا نارازى. بۇنداي پىكىردى ءپۋتيننىڭ اۋعانستان ءىسى بويىنشا ارنايى وكىلى زامير كابۋلوۆ ءبىلدىردى. ونىڭ ايتۋىنشا امەريكالىق اسكەرلەردىڭ كەرى شەگىنۋ مەرزىمىنىڭ ۇزارۋى ەلدەگى بەيبىتشىلىك پروتسەسىنە كەرى اسەر ەتەدى ەكەن. 

بىلتىرعى كەلىسىم بويىنشا اۋعانستاننان اقش اسكەرلەرىنىڭ كەرى شەگىنۋىنە بەرىلگەن شەكتى مەرزىم جاقىنداعاندا، بايدەن اكىمشىلىگى بۇل مەرزىمدى تاعى التى ايعا ۇزارتىپ، 11 قىركۇيەككە دەيىن شىعىپ كەتەمىز دەپ مالىمدەدى. وسى تۇستا تالىپتەر ستامبۋلدا ەرتەڭ، 16 ءساۋىر باستالعالى تۇرعان اۋعانستان تاقىرىبىنداعى كەلىسسوزدەن باس تارتتى. "تاليباننىڭ" مۇنداي شەشىمىن كوپ تاراپ كۇتپەگەن ەدى. كەيبىر ساراپشىلار تالىپتەردىڭ كەلىسسوزدەن باس تارتۋىنىڭ ارتىندا ماسكەۋ تۇرعان بولۋى دا مۇمكىن دەپ بولجام جاساعان.

"اقش اسكەرىنىڭ اۋعانستاننان كەرى شەگىنۋىنىڭ كەشەۋىلدەۋى بەيبىتشىلىك كەلىسىمىن قيىنداتا تۇسەدى. سەبەبى، بۇل اقش پەن "تاليبان" اراسىنداعى كەلىسىمنىڭ اشىق تۇردە تاپتالۋى", – دەدى ءپۋتيننىڭ ارنايى وكىلى كابۋلوۆ. بۇل اقش شەشىمىنە قاتىستى ماسكەۋدڭى رەسمي كوزقاراسى. كابۋلوۆ سونداي-اق بايدەن بيلىگى تالىپتەرگە بۇل شەشىمى تۋرالى تۇسىنىكتەمە بەرۋى كەرەك ەكەن. پۋتين وكىلىنىڭ ءسوزىن جوعارىداعى بولجامدى راستاي تۇسكەندەي.

قازىر، ەۋرازياداعى گەوساياسي جاعداي كۇردەلىدەن دامىپ، شىم-شىتىرىق كۇيدە تۇر. قارا تەڭىز جانە رەسەي مەن ۋكراين شەكاراسىندا اسكەري بەلسەندىلىك الەمدى الاڭداتارلىق دەڭگەيدە. وسى كەزدە اۋعانستان، يران تاقىرىپتارى قايتا وزەكتىلەنە تۇسۋدە. ماسكەۋدىڭ كەيبىر ءبىرتاراپتى قىڭىر شەىمدەرى ءوڭىردىڭ تۇراقتىلىعى مەن قاۋىپسىزدىگىنە كەرى اسەرىن انىق كورسەتىپ جاتىر.

“The Qazaq Times”