كورنەكى كوللاج. استانا اكىمدىگى جانە ونىڭ باسشىسى التاي كولگىنوۆ. فوتو: اشىق دەرەككوز

الەۋمەتتىك جەلىلەردەگى Ras Aitamyn زەرتتەۋ ارناسى ەلوردا "قىزىل ايماققا" ەنىپ، كوروناۆيرۋس ىندەتى ءورشىپ جاتقان تۇستا استانا اكىمدىگىنىڭ مەملەكەتتىك باعدارلامالار پروپاگانداسى مەن ۆيرۋسپەن كۇرەستى باق-تا ناسيحاتتاۋ ءۇشىن بيۋدجەتتەن 287,5 ميلليون تەڭگە جۇمساماق جوسپارىن انىقتادى.

"مەملەكەتتىك ساياساتتىڭ الەۋمەتتىك ماڭىزدى جانە باسىم باعىتتارىن ىسكە اسىرۋ، ونىڭ ىشىندە كوروناۆيرۋس ينفەكتسياسىمەن كۇرەس جايلى گازەتتە جانە باسىلىم سايتىندا اقپاراتتىق ماتەريالدار ازىرلەۋ" اتتى تەندەردى ەلوردانىڭ اكتيۆتەر مەن مەملەكەتتىك ساتىپ الۋ باسقارماسى جاريالاپ ۇيىمداستىرىپ جاتىر، ال تاپسىرىس بەرۋشى – استانانىڭ ىشكى ساياسات باسقارماسى.

تەندەر ءورىستىلدى جانە قازاقتىلدى باسىلىمدارعا ارنالعان ەكى لوتتان تۇرادى. 287 ملن 510 مىڭ 428 تەڭگە ءورىستىلدى جانە قازاقتىلدى باسىلىمعا تەڭدەي بولىنبەك.

تەندەردى ۇتىپ العان باسىلىم ەڭ الدىمەن ەلباسى، پرەزيدەنت، پارلامەنت، ۇكىمەت، ەلوردا اكىمدىگى مەن ءماسليحاتتىڭ جۇمىسى جانە پرەزيدەنت جولداۋىنداعى مىندەتتەردىڭ ىسكە اسىپ جاتقانىن ناسيحاتتايدى. سونىمەن قاتار "دەنساۋلىق ساقتاۋ سالاسىنداعى ء(دارى-دارمەكپەن قامتاماسىز ەتۋىن جاقسارتۋ، مەديتسينالىق ءبىلىم بەرۋدى مودەرنيزاتسيالاۋ) مەملەكەتتىك ساياساتتىڭ الەۋمەتتىك ماڭىزدى جانە باسىم باعىتتارىن ىسكە اسىرۋ مەن ەلوردادا كورونوۆيرۋس ينفەكتسياسىنا قارسى قابىلدانىپ جاتقان ءىس-شارالاردى، قوعامدىق ساقتىق شارالاردى، حالىقتى ۆاكتسيناتسيالاۋعا اقپاراتتىق قولداۋ" كورسەتەدى.

ءونىم بەرۋشى تاۋەلسىزدىكتىڭ 30 جىلدىعى مەن ابدەن جاۋىر بولىپ، تىزەسى شىققان باعدارلامالار – "ەڭبەك", "نۇرلى جەر", "نۇرلى كوش", "رۋحاني جاڭعىرۋ", ت.ب. جايلى ماقالالار جاريالايدى.

استانا اكىمدىگىنە تۇنەگەن كوپبالالى جانە مۇمكىندىگى شەكتەۋلى بالالارى بار انالاردىڭ الدىنا شىعۋعا جاراماعان، ۋاجدەرىن تىڭداماعان كولگىنوۆتىڭ اكىمدىگى "حالىقتىڭ الەۋمەتتىك وسال توپتارىن، انا مەن بالانى قورعاۋعا ارنالعان شارالار" مەن تىڭداۋشى مەملەكەت" تۇجىرىمداماسى جايلى ماتەريالدارعا دا تاپسىرىس بەرىپتى.

سونىمەن قاتار اقپارات قۇرالى بىلتىر قورداي جانجالىنان كەيىن باسى داۋعا قالىپ، سىنعا الىنعان قازاقستان حالقى اسسامبلەياسىنىڭ ءىس-شارالارى مەن "ماڭگىلىك ەل" ۇلتتىق پاتريوتتىق يدەياسىن جانە ازاماتتىق ۇستانىم بويىنشا قازاقستاندىق بىرەگەيلىك پەن بىرلىكتى ناسيحاتتايدى.

ءونىم بەرۋشى ىشكى ساياسات باسقارماسىنىڭ تاپسىرىسىمەن ماالالار نەگىزىندە 10-30 سەكۋندتىق بەينەروليكتەر ازىرلەپ، Youtube پلاتفورماسىندا جاريالايدى.

تەندەرگە قاتىساتىن باسىلىمنىڭ ءبىر جولعى تارالىمى – 5 000 دانادان كەم ەمەس، جيىلىگى – اپتاسىنا 3 رەتتەن كەم ەمەس، اپتالىق تارالىمى - 15 000-نان كەم ەمەس، 8 بەتتەن كەم ەمەس، فورماتى – D2 بولۋى ءتيىس. بۇل تالاپتارعا اكىمدىككە قاراستى "Elorda Aqparat" جشس-عا كىرەتىن "استانا اقشامى" مەن "ۆەچەرنيايا استانا" باسىلىمدارى ساي كەلەدى. بۇل تەندەردى وسى ەكى باسىلىم الادى دەپ توپشىلايمىز. كولگىنوۆتىڭ اكىمدىگى پاندەميا باستالعالى بەرى ءبىر جىلدىڭ ىشىندە "Elorda Aqparat" جشس-عا 506 ميلليون تەڭگە كولەمىندە تەندەر بولگەن.

جالپى، استانا اكىمدىگى پاندەميا باستالعالى بەرى پروپاگانداعا 1,3 ميلليارد تەڭگە جۇمساعان.

وسىلايشا استانا اكىمدىگى كوروناۆيرۋسپەن كۇرەسۋ ءۇشىن بيۋدجەتتىڭ 684 مىڭ دوللاردان استام قارجىسىن دەنساۋلىق ساقتاۋ سالاسى، توسەك ورىندار قورىنا باعىتتاۋ ورنىنا پروپاگانداعا جۇمساماق.

"The Qazaq Times"