"ناۋرىز-ايتىس" مەرەكەلىك شاراسىنا قاتىسقان اقىندار. فوتو: شىمكەنت قالاسىنىڭ مادەنيەت باسقارماسى
ناۋرىز مەيرامى مەن تاۋەلسىزدىكتىڭ 30 جىلدىعىنا وراي شىمكەنت قالاسىندا وتكەن ايتىستىڭ بيۋدجەتى مەن جۇمسالۋ بارىسى بۇلىڭعىر. مەگاپوليستىڭ مەملەكەتتىك قىزمەتكەرى ءانشى ساكەن مايعازيەۆ ۇيىمداستىرعان مەرەكەلىك شارانىڭ جاي-جاپسارىنا ءۇڭىلىپ، 40 ميلليوننىڭ بايانىن انىقتاۋعا تىرىستىق.
قالالىق مادەنيەت باسقارماسىنىڭ جەلىدەگى پاراقشاسىندا جاريالانعان دەرەككە ساي، وسى جۇما-سەنبى كۇندەرى وتكەن «ناۋرىز-ايتىس» سايىسىنا 16 اقىن قاتىسقان. ەكى كۇنگە جوسپارلانعان شارا بيۋدجەتتەن قارجىسىنا ۇيىمداستىرىلعان. پاندەميا شاعىندا وتكەن مەرەكەلىك شاراعا جۇمسالعان قاراجاتتىڭ سوماسىن مەملەكەتتىك ساتىپ الۋ پورتالىنان ىزدەستىرىپ كوردىك.

Facebook جەلىسىنەن الىنعان سكرين-فوتو

ساكەن مايعازيەۆ باسقاراتىن شىمكەنت قالالىق مادەنيەت ءۇيى وسى ايتىستى وتكىزۋ ءۇشىن «Quraq Group» جشس-مەن كەلىسىم-شارت جاساسقان. قۇنى 40 ميلليون تەڭگە. كەلىسىم شارتقا مايعازيەۆتىڭ ءوزى قول قويعان. تەندەر «تىكەلەي ءبىر كوزدەن ساتىپ الۋ» تاسىلىندە وتكەن. دەمەك مايعازيەۆ باسقاراتىن مەكەمە ايتىس وتكىزۋ ءۇشىن پورتالدا ەشقانداي حابارلاندىرۋ جاريالاماعان، تاپسىرىستى ورىنداۋشى رەتىندە بىردەن «Quraq Group» كومپانياسىن تاڭداپ العان.

مەملەكەتتىك ساتىپ الۋ وپەراتسياسى تۋرالى جالپى مالىمەت. سكرين-فوتو: goszakup.gov.kz

ونەرپاز-شەنەۋنىك باسقاراتىن مەكەمەنىڭ مەيىرى ءتۇسىپ، 16 اقىندى ەكى كۇن ايتىستىرىپ، 40 ملن تەڭگەگە قارىق بولعالى تۇرعان «Quraq Group» كومپانيا جونىندە اشىق دەرەككوزدەردەگى اقپاراتتاردان كورۋگە بولادى.

ساتىپ الۋعا قاتىسقان تاراپتار. سكرين-فوتو: goszakup.gov.kz

بىلتىر 8 شىلدە شىمكەنت قالاسىندا رەسمي تۇردە تىركەلگەن. باستىعى – 27 جاستاعى ساعىنتاەۆ باقداۋلەت باتىرحانۇلى دەگەن ازامات. ستاتيستيكا كوميتەتىنىڭ سايتىندا بۇل كومپانيا جيھاز جاساۋمەن اينالىساتىنى جازىلعان. وسى ۋاقىتقا دەيىن مەملەكەتكە ءبىر تيىن سالىق تولەمەگەن. كومپانيانىڭ رەسمي تىركەلگەنىنە 9 ايعا جۋىق ۋاقىت وتسە دە، ءالى جۇمىس ىستەمەگەنىن بىلدىرەدى.

كونتراگەنتتەردى تەكسەرۋگە ارنالعان pk.uchet.kz رەسۋرسىنان

وسى تۇستا ساكەن مايعازيەۆكە «جيھاز جاساۋمەن اينالىساتىن ءارى بۇعان دەيىن ەشقانداي جۇمىس ىستەمەگەن كومپانياعا ايتىس وتكىزۋدى قالاي سەنىپ تاپسىردىڭىزدار؟ بۇل كومپانيانى تاڭداردا نە نارسەنى نەگىزگە الدىڭىزدار؟» دەگەن سۇراق تۋادى.

بيۋدجەتى قوماقتى ايتىستىڭ كورەرمەندەرى كوپ بولعان جوق. فوتو: قالالىق مادەنيەت باسقارماسى

ايتپاقشى، 16 اقىن قاتىساتىن، جۇلدە قورى شامامەن 6 ملن تەڭگە بولاتىن ايتىسقا 40 ملن تەڭگە كوپ ەمەس پە دەگەن ساۋال ويلاندىرادى. بىزدىڭشە، وتە كوپ. ولاي دەۋگە تولىق نەگىز بار. ويتكەنى 26 اقپاندا تاراز قالاسىندا دا ايتىس وتكەن ەدى. ونى ۇيىمداستىرعان جامبىل وبلىسىنىڭ مادەنيەت باسقارماسىنا قاراستى «وبلىستىق حالىق شىعارماشىلىعى ورتالىعى» ايتىستى وتكىزۋ ءۇشىن بيۋدجەتتەن شامامەن 4 ملن تەڭگە جۇمساعان. ال ول ايتىستىڭ جۇلدە قورى 7,2 ملن تەڭگە شاماسىندا (بۇل اقشا قايدان بولىنگەنى بەلگىسىز، بىراق YouTube پورتالىندا جاريالانعان ماراپاتتاۋ راسىمىندەگى بەينەجازباداعى تابىستالعان سەرتيفيكاتتاردان ەسەپتەۋگە بولادى – اۆت.). سوندا تارازداعى ايتىسقا بارلىعى 11,2 ملن تەڭگە جۇمسالىپ تۇر. جارايدى، قازىلىق جاساعان 7 ادامعا جانە ايتىستى جۇرگىزگەن ءجۇرسىن ەرمانعا شامامەن 2 ملن تەڭگەدەي گونورار بەرىلدى دەلىك. سوندا بارلىعى 13,2 ملن تەڭگە بولادى. جان-جاقتان كەلگەن اقىندار مەن قازىلاردىڭ جولاقىسىن قوسا قاراستىرساق، بارلىعى 15 ملن تەڭگەگە جۋىقتايدى. بۇل – ءبىر اي بۇرىن عانا تارازدا وتكەن ايتىستىڭ شىعىنى.
شىمكەنتتە ءوتىپ جاتقان ايتىس 2 كۇنگە سوزىلاتىندىقتان، شىعىنى قوماقتى دەگەن كۇننىڭ وزىندە 5 ملن قارجى كەتكەن بولار. سوندا شاراعا 20 ملن جۇمسالادى دەسە دە، كوڭىلگە قونىمدى، ويعا سىيىمدى بولار ما ەدى؟ ايتپاقشى، تارازداعى ايتىسقا 22 اقىن قاتىسقان، ال شىمكەنتتە – 16 اقىن.

اكىم ورىنباسارى شىڭعىس مۇقان قۇتتىقتاۋ ءسوزىن سويلەپ تۇر. فوتو: قالالىق مادەنيەت باسقارماسى

P.S. ايتىسقا 40 ملن تەڭگە بولىنگەنىن اقىندار دا، قازىلار دا بىلمەيتىن شىعار. سەنبى شىمكەنتتەگى «تۇركىستان» سارايىندا ايتىستىڭ فينالى وتەدى.
ايبەك قاليەۆ، اسپانبەك شۇعاتاەۆ، مەيىربەك سۇلتانحان، شۇعايىپ سەزىمحان، كازىرەت بەرديحان، قاجىمۇحان ابزالوۆ، نۇرلان ەسەنقۇلوۆ، راۋان كايداروۆ جانە باۋىرجان شيرمەدينۇلى سياقتى ءسوز بارىمتاشىلار قاتىساتىن ايتىستا «ەلىم» دەپ ەڭىرەيتىن شايىرلاردىڭ قايسىبىرى بولماسىن فينالدا وسى ماسەلەنى قوزعاپ، شىڭعىس مۇقان مەن ساكەن مايعازيەۆتەن 40 ملن تەڭگەنىڭ ەسەبىن سۇرار دەگەن ۇمىتتەمىز.