كانتسلەر انگەلا مەركەلدىڭ شەشىمىمەن گەرمانيادا كارانتين مەرزىمى 28 ناۋرىزعا دەيىن ۇزارتىلدى. ەگەر كەيستەر ازايسا، ايماقتاردا كارانتين جەڭىلدەتىلەدى.

8 ناۋرىزدان كەيىن 100 مىڭ تۇرعىنعا شاققاندا ناۋقاستار سانى 50 ادامنان اسپاعان وڭىرلەردە مۋزەيلەر، گالەرەيالار، باقتار، كىتاپ جانە گۇل ساتاتىن دۇكەندەر، سونداي-اق باۋ-باقشا زاتتارىنا ارنالعان بازارلار اشىلادى. تەك تۇتىنۋشىلار كەلەتىنىن الدىن الا ەسكەرتۋى ءتيىس. سونىمەن قاتار، 2 اپتادان كەيىن COVID-19 ۋشىقپاعان جاعدايدا تەاترلار، كونتسەرت، وپەرا زالدارىنا جانە كينوتەاترلارعا بارۋعا رۇقسات بەرىلمەك.

انگەلا مەركەل: «بىرنەشە ساعات تالقىلاي كەلە توقتالعانىمىز – ساياساتكەرلەردىڭ قازىرگى مىندەتى الداعى ۋاقىتتا اقىلعا قونىمدى قادامدار جاساۋ. ايتپەسە، ەۋروپادا ءبىز ساباق الاتىن مىسالدار جەتەرلىك. كەيبىر ەلدەر قاتەلىك جاساپ، ىندەتتىڭ تارالۋىنىڭ ءۇشىنشى تولقىنىنا ۇرىندى. مۇنداي قاۋىپ بىزدە دە بار. سوندىقتان 2021 جىلدىڭ كوكتەمى بىلتىرعى كوكتەمنەن جاقسى جاعىنان مۇلدە وزگەشە بولۋى كەرەك.»، – دەيدى

سوڭعى ءبىر اپتادا كوروناۆيرۋستىڭ بريتاندىق شتامى تاعى 5 ەلدە تىركەلگەن. قازىر ۆيرۋستىڭ بۇل ءتۇرى تابىلعان ەلدەردىڭ قاتارى 106-عا جەتسە، وڭتۇستىكافريكالىق شتام 56 مەملەكەتتە تابىلعان. ال برازيليالىق شتامم 29 ەلدە تىركەلگەن.

بۇعان دەيىن دۇنيەجۇزىلىك دەنساۋلىق ساقتاۋ ۇيىمى COVID-19-دىڭ تۇرلەنۋى قالىپتى جاعداي ەكەنىن ايتقان بولاتىن. دەگەنمەن، ءبىر اپتانىڭ ىشىندە كوروناۆيرۋسقا شالدىققانداردىڭ سانى بۇعان دەيىنگى كەزەڭمەن سالىستىرعاندا 7%-عا ارتقان. ىندەت اسىرەسە ەۋروپا ەلدەرىندە، وڭتۇستىك شىعىس ازيا، سولتۇستىك جانە وڭتۇستىك امەريكادا ۋشىعىپ تۇر.

"The Qazaq Times"