ءبىر توپ ايەل استانا اكىمدىگىنىڭ عيماراتىندا بەس كۇننەن بەرى تۇنەپ ءجۇر.

دۇيسەنبى 22 اقپان كۇنى ەلوردادا 50-60 شاقتى ايەل ءۇش تالاپپەن «نۇر وتان» پارتياسىنىڭ باس كەڭسەسىنە بارعان. «باسپانا»، «دەپۋتاتتار شىقسىن» دەپ ۇرانداتقان نارازىلار پارتيا قىزمەتكەرلەرىنىڭ اقپارات قۇرالدارىن زالعا كىرگىزبەۋىنە قارسىلىق تانىتقان. اراعا ۋاقىت سالىپ جينالعاندار الدىنا شىققان پارتيانىڭ قالالىق بولىمشەسى توراعاسىنىڭ ءبىرىنشى ورىنباسارى داۋلەت كارىبەكتىڭ «سۇراقتارىڭىزدى جازباشا قالدىڭىزدار» دەگەنىنە قاناعاتتانباعان انالار اكىمدىككە بەتتەگەن.

«نۇر وتاندا» تۇنەگەن كوپ بالالى انا

عيماراتتا 35 جاستاعى كوپ بالالى ايەل اقبايان جالمۇرزاەۆا قالىپ قويۋعا ءماجبۇر بولعانىن ايتادى. ونىڭ سوزىنشە، 17 جىلدان بەرى استانا تۇرعىنى، ءۇي كەزەگىنە 3,5 جىل بۇرىن 2882-ءشى ورىندا تىركەلگەن. «13 جىل بويى كۇندىز شەنەۋنىكتەردىڭ ءۇيىن تازالاپ، تۇندە قاقاعان ايازدا گۇل ساتىپ كۇن كورىپ كەلدىك» دەگەن ءتورت بالانىڭ اناسىن كارانتين شەكتەۋى مەن قىمباتشىلىق قاجىتقان.

«الدىما 64 ادامدى قوسىپ جىبەردى، دالەلدەي الماي قالدىم. قازىر شامامەن 1714-ءشى ورىندا تۇرمىز. قۇرىلىس سالاسىندا جۇمىس ىستەيتىن جولداسىم قازىر اۋرۋحانادا. پاتەر جالداردا، قۇداي كەشىرسىن، ەكى بالامىز عانا بار دەپ ايتۋعا تۋرا كەلەدى. ءۇي يەسى كەلىپ قالعاندا ەكەۋىن جيھازعا جاسىرىپ قويامىز. 80 مىڭ تەڭگە كولەمىندە الاتىن اتاۋلى الەۋمەتتىك كومەك كۇندەلىكتى ءىشىم-جەمنەن ارتىلمايدى. كەنجەمنىڭ كەيىنگى بىرنەشە ايعا بالاباقشانىڭ اقىسىن تولەي الماي وتىرمىن. باسپانا جانە شاعىن شارۋا جۇرگىزۋگە پاۆيليون الماق ەدىم، سوعان كومەك سۇراپ بارماعان جەرىم جوق. بالاەۆا، دۇيسەنوۆادان باستاپ ءمينيستردىڭ ەشبىرى قالعان جوق، 109 دەپۋتاتقا قوس-قوستان جازدىم. «شەشەمىز»، «قاتىرامىز» دەگەنمەن ەشقانداي ناتيجە جوق»، – دەيدى  جالمۇرزاەۆا.

كوپ بالالى جاس ايەل اقبايان جالمىرزاەۆا نۇر وتان عيماراتىندا ءتورت بالاسىمەن تۇنەپ جاتقان ءساتى. فوتو: كەيىپكەردەن

«نۇر وتان» وكىلدەرىنەن «جارتى بولكە نان مەن ەكى ستاقان شاي» سۇراپ العان. كوپ بالالى جاس انانىڭ ايتۋىنشا، ءتورت بالاسىمەن پارتيا فيلالىنىڭ دالىزىندە قالۋعا ءماجبۇر بولعان وعان №51 مەكتەپتىڭ ۇجىمىنان، يۋۆەنالدى پوليتسيادان كەلگەندەر «بالالارىن بەيىمدەۋ ورتالىعىنا الىپ كەتەتىن» ايتىپ قوقان-لوقى كورسەتكەن. الماتى اۋدانى اكىمىنىڭ ورىنباسارى ارايلىم ەلىمسارينا دا اشىنعان انامەن ءتىل تابىسا الماعان. قىزمەتكەرلەر سىرتتان تاعام الا كەلگەن ادامدى اۋەلى كىرگىزبەي بوگەگەن. قازىرگى تاڭدا جولمىرزاەۆانىڭ دەنساۋلىق جاعدايى ناشارلاپ، مەديتسينالىق كومەككە جۇگىنگەن.

اكىمدىكتە تۇنەگەن انالار تالابى

العاشقى كۇنى كەشكىسىن ەلوردا اكىمى كولگىنوۆتىڭ كومەكشىسى داۋرەن بابامۇراتوۆ انالارمەن جارىقتى ءسوندىرىپ قويىپ سويلەسكەن، جۇكتى ايەلدىڭ سۇراۋىنا قاراماستان دارەتحانا ەسىگىن قۇلىپتاپ تاستاعان. سودان بەرى اكىمدىك عيماراتىندا ءماجىلىس دەپۋتاتتارىنىڭ كەلۋىن، كوپتى تولعاندىرعان ماسەلە كوڭىل ءبولىپ، «سايلاۋ الدىنداعى سەرتىن ورىنداسىن» دەگەن تالاپپەن دالىزدە تۇنەپ كەلەدى. ونى ايەلدەردىڭ Facebook جەلىسىندە ۇزدىكسىز ءجۇرىپ جاتقان تىكەلەي ەفير  جازبالارىنان كورۋگە بولادى.

انالار اپتا باسىنان بەرى مىناداي نەگىزگى ءۇش تالاپتى كوتەرىپ وتىر:

  • «انا مەن كبالا اپيتالى رەتىندە وتباسىنا تابىسىنا قاراماي ءار بالاعا 42,5 مىڭ تەڭگە تاعايىندالسىن»
  • «كونستيتۋتسيانىڭ 25-بابىندا كوزدەلگەندەي الەۋمەتتىك وسال توپ وتباسىلارىنا باسپانا-تۇرعىن ءۇي بەرىلسىن»
  • «حالىق ىزاسىن تۋدىرعان ءداستۇرلى-ۇلتتىق مادەنيەتىمىزگە جات بالا قۇقىعى تۋرالى زاڭ جوباسى قارالىمنان مۇلدە الىنىپ تاستالسىن»

سونىمەن قوسا، ولار ماسەلە كوتەرىپ كوزگە تۇسكەن انالاردى قۋدالاماۋعا ۇندەدى. سونىڭ مىسالى رەتىندە نارازى انالار توبىنىڭ بەلسەندىسى فەرۋزا وردابەكوۆانىڭ «ادىلەتسىز قامالعانىن»، سوندىقتان دەرەۋ بوساتىلۋىن سۇرايدى.

استانا پوليتسياسى 22 اقپان جالعىزباستى انا فەرۋزا وردابەكوۆانى جولدان كۇشتەپ ۇستاپ اكەتكەن. سول كۇنى مامانداندىرىلعان اۋدانارالىق اكىمشىلىك سوتى ءۇشىنشى رەت 10 كۇنگە قاماۋعا شەشىم شىعارعان. سوت وردابەكوۆانى 25 قاڭتاردا مينيسترلىكتەر ءۇيى الدىندا «كوروناۆيرۋسقا قارسى ۆاكتسيناعا قارسىلىق ءبىلدىرىپ، زاڭسىز شاراعا» قاتىسقاندىقتان  اكىمشىلىك كودەكستىڭ 488-باپ 11-بولىگى («بەيبىت جيىن وتكىزۋ ءتارتىبىن بۇزۋ») بويىنشا كىنالى دەپ تاپقان.

انالار پرەزيدەنت اكىمشىلىگىنە، الماتى اۋدانى سوتىنا، ەۋروپا پارلامەنتىنە شاعىم تۇسىرگەن.

 «انالاردى ماسىل، تەگىن دۇنيەگە قۇمار ەتىپ كورسەتكىسى كەلەدى. «باتپان قۇيرىق، باتپان قۇيرىق، ايدالادا جاتقان قۇيرىق» دەپ تەگىن باسپانا سۇراپ وتىرعامىز جوق. تۇراقتى جۇمىس بولسا، سونى ىستەپ، ءۇيدىڭ اقىسىن بىرتىندەپ وتەيمىز. «حابار»-دىڭ 30 جىلدىق ەرتەگىسىنە تويدىق. بۇل جەكەلەگەن ماسەلە ەمەس، الەۋمەتتىك جۇيەلى ماسەلە. قاعازعا جازىپ الادى دا قۇرعاپ ۋادەمەن شىعارىپ سالادى. ەندى وندايعا كونبەيمىز. قورقىتىپ-ۇركىتۋگە ۇيرەنىپ الدىق. بارلىعىمىزدىڭ بابامىزدان ورتاق امانات بولىپ قالعان ەلىمىزدىڭ جەرىنەن ءوندىرىلىپ جاتقان بايلىقتان دەۆيدەند ۇلەس ەمەس، ءار بالاعا 42,5 مىڭ تەڭگە بەرۋىن سۇراپ وتىرمىز»، – دەيدى نارازىلاردىڭ ءبىرى جالعىزباستى انا اينۇر ومىرزاق.

ومىرزاق اكىمدىكتىڭ «كىمنىڭ داۋىسى قاتتىراق شىقسا، سونىڭ ماسەلەسىن شەشىپ بەرۋگە» ادەتتەنگەنىن ايتادى. بۇل نارازىلىقتىڭ بۇرىنعىدان وزگەشە بولۋىنىڭ ءبىر كورىنىسى –  «جابۋلى قازان جابۋلى» كۇيىندە قالماس ءۇشىن جەكە باس ماسەلەسىن ەمەس، جۇيەلى ماسەلە قوزعايمىز دەيدى.

«حالىق قىزمەتشىلەرى بولعان سوڭ سوعان لايىق جۇمىس ىستەسىن»، «ماسەلە شەشىلمەيىنشە، العان بەتىمىزدەن قايتپايمىز» دەيدى نارازىلار.

ۇجىمدىق ءوتىنىش حاتى پرەزيدەنت اكىمشىلىگىنىڭ ءبولىم مەڭگەرۋشىسى تامارا دۇيسەنوۆانى انالاردىڭ قولىنان حاتى الىپ كەتۋگە شاقىردى.

“The Qazaq Times”