Nwr Otan ökili Däulet Käribektiñ jazbaşa ötiniş jazıñızdar degen sözine kelise almay twrğan analar. Foto: Azattıq radiosı

Bir top äyel astana äkimdiginiñ ğimaratında bes künnen beri tünep jür.

Düysenbi 22 aqpan küni elordada 50-60 şaqtı äyel üş talappen «Nwr Otan» partiyasınıñ bas keñsesine barğan. «Baspana», «Deputattar şıqsın» dep wrandatqan narazılar partiya qızmetkerleriniñ aqparat qwraldarın zalğa kirgizbeuine qarsılıq tanıtqan. Arağa uaqıt salıp jinalğandar aldına şıqqan partiyanıñ qalalıq bölimşesi törağasınıñ birinşi orınbasarı Däulet Käribektiñ «swraqtarıñızdı jazbaşa qaldıñızdar» degenine qanağattanbağan analar äkimdikke bettegen.

«Nwr Otanda» tünegen köp balalı ana

Ğimaratta 35 jastağı köp balalı äyel Aqbayan Jalmwrzaeva qalıp qoyuğa mäjbür bolğanın aytadı. Onıñ sözinşe, 17 jıldan beri astana twrğını, üy kezegine 3,5 jıl bwrın 2882-şi orında tirkelgen. «13 jıl boyı kündiz şeneunikterdiñ üyin tazalap, tünde qaqağan ayazda gül satıp kün körip keldik» degen tört balanıñ anasın karantin şekteui men qımbatşılıq qajıtqan.

«Aldıma 64 adamdı qosıp jiberdi, däleldey almay qaldım. Qazir şamamen 1714-şi orında twrmız. Qwrılıs salasında jwmıs isteytin joldasım qazir auruhanada. Päter jaldarda, qwday keşirsin, eki balamız ğana bar dep aytuğa tura keledi. Üy iesi kelip qalğanda ekeuin jihazğa jasırıp qoyamız. 80 mıñ teñge köleminde alatın ataulı äleumettik kömek kündelikti işim-jemnen artılmaydı. Kenjemniñ keyingi birneşe ayğa balabaqşanıñ aqısın töley almay otırmın. Baspana jäne şağın şarua jürgizuge pavilion almaq edim, soğan kömek swrap barmağan jerim joq. Balaeva, Düysenovadan bastap ministrdiñ eşbiri qalğan joq, 109 deputatqa qos-qostan jazdım. «Şeşemiz», «Qatıramız» degenmen eşqanday nätije joq», – deydi  Jalmwrzaeva.

Köp balalı jas äyel Aqbayan Jalmırzaeva Nwr Otan ğimaratında tört balasımen tünep jatqan säti. Foto: keyipkerden

«Nwr Otan» ökilderinen «jartı bölke nan men eki staqan şay» swrap alğan. Köp balalı jas ananıñ aytuınşa, tört balasımen partiya filalınıñ dälizinde qaluğa mäjbür bolğan oğan №51 mekteptiñ wjımınan, yuvenaldı policiyadan kelgender «balaların beyimdeu ortalığına alıp ketetin» aytıp qoqan-loqı körsetken. Almatı audanı äkiminiñ orınbasarı Araylım Elimsarina da aşınğan anamen til tabısa almağan. Qızmetkerler sırttan tağam ala kelgen adamdı äueli kirgizbey bögegen. Qazirgi tañda Jolmırzaevanıñ densaulıq jağdayı naşarlap, medicinalıq kömekke jügingen.

Äkimdikte tünegen analar talabı

Alğaşqı küni keşkisin elorda äkimi Kölginovtiñ kömekşisi Däuren Babamwratov analarmen jarıqtı söndirip qoyıp söylesken, jükti äyeldiñ swrauına qaramastan därethana esigin qwlıptap tastağan. Sodan beri äkimdik ğimaratında mäjilis deputattarınıñ keluin, köpti tolğandırğan mäsele köñil bölip, «saylau aldındağı sertin orındasın» degen talappen dälizde tünep keledi. Onı äyelderdiñ Facebook jelisinde üzdiksiz jürip jatqan tikeley efir  jazbalarınan köruge boladı.

Analar apta basınan beri mınaday negizgi üş talaptı köterip otır:

  • «Ana men kbala apitalı retinde otbasına tabısına qaramay är balağa 42,5 mıñ teñge tağayındalsın»
  • «Konstituciyanıñ 25-babında közdelgendey äleumettik osal top otbasılarına baspana-twrğın üy berilsin»
  • «Halıq ızasın tudırğan dästürli-wlttıq mädenietimizge jat bala qwqığı turalı zañ jobası qaralımnan mülde alınıp tastalsın»

Sonımen qosa, olar mäsele köterip közge tüsken analardı qudalamauğa ündedi. Sonıñ mısalı retinde narazı analar tobınıñ belsendisi Feruza Ordabekovanıñ «ädiletsiz qamalğanın», sondıqtan dereu bosatıluın swraydı.

Astana policiyası 22 aqpan jalğızbastı ana Feruza Ordabekovanı joldan küştep wstap äketken. Sol küni mamandandırılğan audanaralıq äkimşilik sotı üşinşi ret 10 künge qamauğa şeşim şığarğan. Sot Ordabekovanı 25 qañtarda ministrlikter üyi aldında «koronavirusqa qarsı vakcinağa qarsılıq bildirip, zañsız şarağa» qatısqandıqtan  Äkimşilik kodekstiñ 488-bap 11-böligi («Beybit jiın ötkizu tärtibin bwzu») boyınşa kinäli dep tapqan.

Analar Prezident äkimşiligine, Almatı audanı sotına, Europa Parlamentine şağım tüsirgen.

 «Analardı masıl, tegin düniege qwmar etip körsetkisi keledi. «Batpan qwyrıq, batpan qwyrıq, aydalada jatqan qwyrıq» dep tegin baspana swrap otırğamız joq. Twraqtı jwmıs bolsa, sonı istep, üydiñ aqısın birtindep öteymiz. «Habar»-dıñ 30 jıldıq ertegisine toydıq. Bwl jekelegen mäsele emes, äleumettik jüyeli mäsele. Qağazğa jazıp aladı da qwrğap uädemen şığarıp saladı. Endi ondayğa könbeymiz. Qorqıtıp-ürkituge üyrenip aldıq. Barlığımızdıñ babamızdan ortaq amanat bolıp qalğan elimizdiñ jerinen öndirilip jatqan baylıqtan devidend üles emes, är balağa 42,5 mıñ teñge beruin swrap otırmız», – deydi narazılardıñ biri jalğızbastı ana Aynwr Ömirzaq.

Ömirzaq äkimdiktiñ «kimniñ dauısı qattıraq şıqsa, sonıñ mäselesin şeşip beruge» ädettengenin aytadı. Bwl narazılıqtıñ bwrınğıdan özgeşe boluınıñ bir körinisi –  «jabulı qazan jabulı» küyinde qalmas üşin jeke bas mäselesin emes, jüyeli mäsele qozğaymız deydi.

«Halıq qızmetşileri bolğan soñ soğan layıq jwmıs istesin», «Mäsele şeşilmeyinşe, alğan betimizden qaytpaymız» deydi narazılar.

Wjımdıq ötiniş hatı Prezident äkimşiliginiñ bölim meñgeruşisi Tamara Düysenovanı analardıñ qolınan hatı alıp ketuge şaqırdı.

“The Qazaq Times”