فوتو: tildacdn.com

الەمدە كوروناۆيرۋس جۇقتىرعاندار سانى 113 ميلليونعا جەتتى. دۇنيەجۇزىلىك دەنساۋلىق ساقتاۋ ۇيىمى ۆيرۋستىڭ تارالۋى باسەڭدەي باستاعانىن حابارلادى. سوعان قاراماستان، ءولىم-ءجىتىم سانى انتيرەكوردتىق كورسەتكىشكە جەتكەن امەريكادا توتەنشە جاعداي رەجيمى تاعى ءبىر جىلعا ۇزارتىلدى. ال ۆاكتسيناتسيا جۇرگىزىلىپ جاتقان ەۋروپانىڭ بىرقاتار ەلدەرى كارانتين شەكتەۋلەرىن جەڭىلدەتپەك.

وسى اپتادا ەۋروكوميسسيا بەلگيا، دانيا، فينليانديا، گەرمانيا، ۆەنگريا مەن شۆەتسيا بيلىگىن شەكاراداعى ءبىر جاقتى شەكتەۋلەردى الىپ تاستاۋدى ۇسىندى. بۇل ايماقتارداعى كارانتيندىك ەرەجەلەر كوروناۆيرۋستىڭ بريتاندىق شتامى كەڭ تاراي باستاعان سوڭ ەنگىزىلگەن بولاتىن. ەندى ەۋروكوميسسيا وكىلى كريستيان ۆيگاند وداق ەلدەرى ىشىندەگى تاۋار تاسىمالى مەن حالىقتىڭ قوزعالىسىنا قولايلى جاعداي جاساۋ كەرەك دەيدى.

يۋنەسكو وكىلدەرى 130-دان استام ەلدەرىنىڭ تۇرعىندارى، ونىڭ ىشىندە ەڭ وسال توپتارى COVID-19 ۆاكتسيناسىنىڭ العاشقى دوزاسىن الماعانىن ايتىپ، دابىل قاعىپ وتىر. ساراپشىلاردىڭ بولجامىنشا، ۆاكتسيناتسيا جۇرگىزىلمەگەن جاعدايدا پاندەميانى جەڭۋ قيىنعا سوعۋى مۇمكىن.

بۇگىن امەريكا پرەزيدەنتى دجو بايدەن پاندەميانىڭ الدىن الۋ ماقساتىندا تج رەجيمىن كەلەسى جىلعا جەيىن ۇزارتۋ تۋرالى قۇجاتقا قول قويدى. اقش-تا ۇلتتىق توتەنشە جاعداي رەجيمى بىلتىر 13 ناۋرىزدا جاريالانعان. بايدەن ماقۇلداعان قۇجات 1 ناۋرىزدان باستاپ كۇشىنە ەنەدى. الەمدە ءولىم-ءجىتىم سانىنىڭ 18%-دان استامى امەريكادا تىركەلگەن. 23 اقپاندا امەريكادا كوروناۆيرۋستان قايتىس بولعان ازاماتتاردى ازا تۇتۋ كۇنى بوپ جاريالاندى. ەل پرەزيدەنتى دجو بايدەن تىكەلەي ەفيردە: «بۇگىن بىزدە وتە قارالى، جانعا باتارلىق كەزەڭ – 500 071 ادام قايتىس بولدى. پاندەميانىڭ ءبىر جىلىندا اجال قۇشقان امەريكالىقتار سانى ءبىرىنشى دۇنيەجۇزىلىك سوعىستى، ەكىنشى دۇنيەجۇزىلىك سوعىستى جانە ۆەتنام سوعىسىن قوسا العانداعى سانعا قاراعاندا – كوپ»، – دەدى.

الداعى كۇندەرى ۇلىبريتانياداعى قاتاڭ كارانتين بىرتىندەپ جەڭىلدەتىلەدى. پرەمەر-مينيستر بوريس دجونسون ءتيىستى قۇجاتقا قول قويدى. بۇعان دەيىن ۇلىبريتانيادا قاۋىپ توبىنداعى 15 ميلليونعا جۋىق ادام ۆاكتسينا قابىلداعان. ۇكىمەت جاپپاي ۆاكتسيناتسيالاۋ ۆيرۋس جۇقتىرۋ قاۋپىن تومەندەتەدى دەيدى. بىراق، عالىمدار ۇكىمەتتى شەكتەۋ شارالارىن الۋعا اسىقپاۋعا شاقىردى. كارانتين جەڭىلدەتىلگەن جاعدايدا، مەكتەپتەر 8 ناۋرىزدان باستاپ اشىلماق. سونىمەن قاتار، سول كۇننەن باستاپ ەكى ءۇيدىڭ ەكى ادامىنا كەزدەسۋگە رۇقسات ەتىلەدى.

ال شۆەتسيا ۇكىمەتى، كەرىسىنشە، كارانتيندى قاتاڭداتپاق. جاڭا ەرەجەگە ساي مەيرامحانا، كافە، مەن بارلاردىڭ جۇمىس ىستەۋ ۋاقىتى قىسقارتىلادى. ءىرى ساۋدا ورىندارىنداعى ادام سانىنا دا شەكتەۋ قويىلدى. حالىقتىڭ ماسكا تاعۋىنا دا باسا ءمان بەرىلىپ وتىر. سونىمەن قاتار 2006 جىلعا دەيىن تۋعان بالالار ءۇشىن سپورتتىق جارىستار ۋاقىتشا ۇيىمداستىرىلمايدى.

بىلتىر COVID-19 پاندەمياسىنا بايلانىستى ەڭبەك نارىعىندا قىسقارتىلعان جۇمىس ورىندارىنىڭ سانى قارجى داعدارىسى بولعان 2009 جىلعا قاراعاندا ءتورت ەسە كوپ. رەسمي مالىمەتتەر بويىنشا، جۇمىس ساعاتى، ياعني ناقتى اتقارىلعان جۇمىس 8,8%-كە قىسقارعان. بۇل 255 ملن جۇمىس ورنىنىڭ قىسقارعانىنا تەڭ.

امەريكا قاۋىپسىز، كوروناۆيرۋس اۋرۋىنىڭ الدىن الاتىن جانە قايتا ەگىلۋدى قاجەت ەتپەيتىن Johnson & Johnson شىعارعان Covid-19 ۆاكتسيناسىن ماقۇلداۋعا دايىن. ساراپشىلاردىڭ پىكىرىنشە، جاڭا ۆاكتسينا Pfizer جانە Moderna پرەپاراتتارىنا بيۋدجەتتىك بالاما بولا الادى. سەبەبى ولاردان ايىرماشىلىعى – ونى ارنايى توڭازىتقىشتا ەمەس، قاراپايىم توڭازىتقىشتا ساقتاۋعا بولادى. اقش، وڭتۇستىك افريكا جانە برازيلياداعى الدىن الا كلينيكالىق زەرتتەۋلەر كورسەتكەندەي، جاڭا ۆاكتسينا 85%-دان استام اۋىر جاعدايلاردىڭ الدىن الادى. بىراق كوروناۆيرۋستىڭ ورتاشا جانە جەڭىل ءتۇرى ءۇشىن ونىڭ تيىمدىلىگى 66%-دان اسپايدى. سونىمەن قاتار سىناققا قاتىسقانداردىڭ ەشبىرى ۆاكتسيناتسيادان كەيىنگى 28 كۇن ىشىندە قايتىس بولماعان جانە اۋرۋحاناعا تۇسپەگەن.

"The Qazaq Times"