ميانماداعى اسكەري توڭكەرىسكە قارسى شەرۋلەر جاپپاي جۇمىس تاستاۋعا ۇلاستى

ميانماداعى اسكەريلەردىڭ بيلىكتى باسىپ الۋىنا قارسى نارازىلىق سوڭى جاپپاي جۇمىس تاستاۋعا ۇلاستى. ءىرى قالالاردا ون مىڭداعان نارازىلار كوشەلەردى يەلەدى. بۇل ميانما تاريحىنداعى ەڭ ءىرى نارازىلىق جۇرىستەرى بولىپ قالدى.

ميانمانىڭ اسكەري بيلىگى نارازىلىققا شىققان حالىققا قاتاڭ ەسكەرتۋ جاساۋدا. وتكەن اپتادا نارازىلىق شاراسىندا كىسى ولمىدەرى دە بولدى. بيرما قارۋلى كۇشتەرى نارازىلىق شاراسى تاراماسا كىسى ءولىمى كوبەيەتىنىن ايتىپ قورقىتۋدا. ەكى كۇن بۇرىن بولعان نارازىلىق شاراسىندا شەرۋشىلەر مەن پوليتسيا اراسىندا قاقتىعىس بولىپ كەمىندە ەكى ادام كوز جۇمدى.

اسكەري بيلىك بولسا نارازىلىق شاراسىن ۇيىمداستىرۋشىلار قاقتىعىسقا يتەرمەلەپ جاتقانىن ايتتى. نارازى جۇرت بيلىكتى حالىققا قايتارۋدى، ەلدىڭ داۋىسىنا قۇرمەت ەتۋدى، بۇرىنعى پرەزيدەنت اۋن سان سۋ ءچيدى بوساتىپ، «دەموكراتيا ءۇشىن ۇلتتىق ليگا» پارتياسىنىڭ جەتەكشىلەرىن قاماۋدان بوساتۋىن تالاپ ەتۋدە. سوعان قاراماستان اسكەري بيلىكتىڭ اۋن سان سۋ چيگە تاققان ايىپتارى بارعان سايىن كوبەيىپ، ونى قاماۋعا الۋ ۋقىتى ۇزارا ءتۇستى.

حالىقارالىق قاۋىمداستىق پەن بىرقاتار شەت مەملەكەتتەر اسكەري بيلىكتى قارۋ قولدانۋىن ايىپتاپ، ەلدىڭ لەگيتيمدى بۇرىنعى بيلىگىن، ونىڭ جەتەكشىلەرىن بوساتۋعا شاقىردى.

ال، الەۋمەتتىك جەلىگە تاراپ جاتقان سۋرەتتەردەن ميانمانىڭ ەڭ ءىرى قالالارىندا يىنترەسكەن ادامداردىڭ توبى ورتالىق كوشەلەردى يەلەپ العانىن كورۋگە بولادى. ساراپشىلار، اسكەري بيلىك حالىقتان مۇنداي سالماقتى قارسىلىق كۇتپەگەنىن ايتۋدا.

“The Qazaq Times”