قىتاي ۇكىمەتى شىڭجاڭداعى از ساندى ۇلتتارعا گەنوتسيد جاسالدى دەگەن ايىپتى تەرىستەدى. بەيجىڭ بيلىگى شىڭداڭداعى ۇيعىر جانە وزگە دە از ساندى ۇلتتار ءدىني نانىم-سەنىم بوستاندىعىنان شەكتەلگەن جوق دەپ مالىمدەدى. بۇنداي مالىمدەمەنى قىتاي ءسىم باسشىسى ۋاڭ ي جاساعان.

قىتاي رەسميى اتالعان مالىمدەمەنى كەشە، 22 اقپان كۇنى وتكەن بۇۇ-نىڭ ادام قۇقىعى كەڭەسىنىڭ جيىنىندا جاساعان. ونىڭ سوزىنشە بەيجىڭ بيلىگى شىڭجاڭداعى ەتنيكالىق ازشىلىقتاردىڭ ۇلتتىق، ءدىني جانە ادام قۇقىعىن شەكتەپ وتىرعان جوق.

الايدا، قىتاي سىرتقى ىستەر ءمينيسترى مۇنداي مالىمدەمە جاساۋدان بۇرىن بريتانيا، كانادا جانە گەرمانيا سىرتقى ىستەر مينيسترلىكتەرى تاراپىنان قىتاي ۇكىمەتىنىڭ شىڭجاڭداعى ساياساتىن ايىپتاعان مالىمدەمەلەر جاسالعان بولاتىن. ۋاڭ يدىڭ مالىمدەمەسى ولارعا قارسى جاۋاپ رەتىندە جاسالعانى بەلگىلى. قىتاي ۇكىمەتى شىڭجاڭداعى رەجيمدىك زورلىق-زومبىلىق ارەكەتتەرىن جوققا شىعارۋعا تىرىسقانىمەن، ساياسي لاگەرلەر اتالىپ ۇلگىرگەن «تاربيەلەۋ ورتالىقتارىنداعى» از ساندى ۇلتتارعا جاسالعان قيناۋ، جازالاۋ تۋرالى مالىمەتتەر كوبىرەك تاراپ كەتكەن.

ايتا كەتەيىك، قىتاي ءسىم باسشىسىنىڭ مالىمدەمەسىمەن ءبىر ۋاقىتتا كانادا ۇكىمەتى دە كوممۋنيستىك قىتاي بيلىگىنىڭ شىڭجاڭداعى ارەكەتىن گەنوتسيد دەپ تانيتىن شەشىمىن جاريا ەتتى.   

“The Qazaq Times”