اۋن سان سۋ چجي. فوتو: ۆۆس

اسكەري توڭكەرىس كەزىندە ۇتقىندالعان ميانما وپپوزيتسياسىنىڭ جەتەكشىسى اۋن سان سۋ چجي اپاتتاردىڭ الدىن الۋ تۋرالى زاڭدى بۇزدى دەپ ايىپتالدى. بۇرىن ول راتسيانى زاڭسىز تاسىمالداۋ، قاۋىپتى قۇرالداردى زاڭسىز ساقتاۋ جانە پايدالانعانى ءۇشىن ايىپتالعان.

ميانما قارۋلى كۇشتەرى سايلاۋ وتكىزۋگە دايىن ەكەنىن ايتتى. دەگەنمەن، بريگادير گەنەرال زاۋ مين تۋن اسكەري كۇشتەر ۇزاق ۋاقىت بيلىكتە بولعىسى كەلمەيتىنىن ايتتى. سونىمەن قاتار، ول بيلىكتى سايلاۋدا جەڭىسكە جەتەتىن پارتياعا تاپسىرۋعا ۋادە بەردى.

1 اقپاندا ميانما اسكەريلەرى ەلدە توڭكەرىس جاساپ، بيلىكتەگى اۋن سان سۋ چجي مەن بىرنەشە ساياساتكەردى ۇيقاماققا العان. اسكەريلەر بىلتىر قاراشادا وتكەن پارلامەنت سايلاۋىنىڭ ناتيجەسىمەن كەلىسپەگەن ەدى. بىلتىرعى سايلاۋدا اۋنگ سان سۋ چجي باسقاراتىن دەموكراتياشىلاردىڭ ۇلتتىق ليگاسى پارتياسى جەڭىمپاز دەپ تانىلعان. اسكەريلەر سايلاۋ ءادىل وتپەدى دەپ سانايدى.

2017 جىلعا دەيىن ميانمانىڭ راكحاين شتاتىندا ءبىر ميلليون روحيندجا مۇسىلماندارى ءومىر سۇرگەن. بىراق حالقىنىڭ باسىم بولىگى بۋددا ءدىنىن ۇستاناتىن ميانما ولاردى زاڭسىز يمميگرانتتار دەپ، ازاماتتىق بەرۋدەن باس تارتقان. روحيندجالار ۇزاق جىلدار بويى قىسىم كورىپ كەلە جاتقاندارىنا بىرنەشە رەت شاعىمدانعان.

2017 جىلى روحيندجا اسكەريلەرى راكحاين شتاتىندا بىرنەشە شابۋىل ۇيىمداستىرعان. سول جىلى ميانمانىڭ راكحاين شتاتىندا اسكەريلەر يسلام ءدىنىن ۇستاناتىن مىڭداعان روحيندجانى ولتىرگەن. ايماقتان 700 مىڭنان استام روحيندجا ميانمامەن كورشىلەس جاتقان بانگلادەشكە قاشقان. ەل بيلىگى راكحاينداعى اسكەريلەردىڭ ارەكەتىن «ەل تاۋەلسىزدىگىنە قاۋىپ توندىرەتىن ەكسترەميستەرمەن كۇرەس» دەپ اتادى. ميانمانىڭ بۇل ارەكەتى بەيبىتشىلىك سالاسى بويىنشا نوبەل سىيلىعىن العان اۋن سان سۋ ءچجيدىڭ دە بەدەلىنە نۇقسان كەلتىردى.

2019 جىلى افريكاداعى گامبيا ەلى ميانمانى «روحيندجا مۇسىلماندارىنا گەنوتسيد جاسادى» دەپ ايىپتاپ، گااگاداعى سوتقا شاعىمداندى. بۇۇ حالىقارالىق تريبۋنالى ەكىنشى دۇنيەجۇزىلىك سوعىستان بەرى الەمدەگى ءۇش وقيعانى – 1970 جىلى كامبودجاداعى مەملەكەتتىك تەرروريزمدى، 1994 جىلعى رۋانداداعى وقيعانى، 1995 بوسنياداعى سرەبرەنيتسا قىرعىنىن – گەنوتسيد دەپ تانىعان.

"The Qazaq Times"