وڭتۇستىك كورەيانىڭ بارلاۋ اگەنتتىكتەرى سولتۇستىك كورەيا حاكەرلەرىنىڭ اقش-تاعى Pfizer Pharmaceuticals كومپانياسىنىڭ كومپيۋتەرلىك جۇيەسىنە شابۋىل جاساپ، جاڭا كوروناۆيرۋس ۆاكتسيناسى تۋرالى اقپاراتتى ۇرلاماقشى بولعانىن مالىمدەدى. بۇل تۋرالى كەشە، 16 اقپان كۇنى وڭتۇستىك كورەيالىق «يونحاپ» اقپاراتتىق اگەنتتىگى حابارلادى.

وڭتۇستىك كورەيا اقپارات قۇرالدارىنىڭ حابارىندا حاكەرلىك شابۋىل ناقتى قاشان بولعانى جانە سولتۇستىك كورەيالىق حاكەرلەر ماقساتىنا جەتە الدى ما، جوق، بۇل تۋرالى تولىق مالىمەت جوق. قازىرشە بۇل ماسەلە تۋرالى اقش مەملەكەتتىك دەپارتامەنتى مەن Pfizer Pharmaceuticals كومپانياسى رەسمي مالىمدەمە جاساماعان.

بۇل سولتۇستىك كورەيانىڭ العاشقى حاكەرلىك شابۋىلى ەمەس جانە سوڭعىسى دا بولمايتىنى انىق. بۇعان دەيىن دە سولتۇستىك كورەيا باتىس ەلدەرىنەن كوروناۆيرۋس ۆاكتسيناسىنا قاتىستى مالىمەتتەردى ۇرلادى دەپ ايىپتالعان ەدى. سولتۇستىك كورەيا وسىعان دەيىن ەلدە كوروناۆيرۋسپەن ءبىر دە ءبىر ناۋقاس تىركەلمەدى دەپ كەلگەن ەدى.  بىراق، شەتەلدىك اقپارات قۇرالدارى جابىق كوممۋنيستىك رەجيمدەگى ەلدە كوروناۆيرۋسقا قاتىستى مالىمەتتەر جاسىرىلىپ وتىر دەپ سانايدى.

“The Qazaq Times”