بايدەن موديمەن سويلەستى: اقش ءۇندىستاندى قىتايعا قارسى كۇرەسۋدەگى وداقتاسى رەتىندە قالدىردى

كەشە، 8 اقپان اق ءۇيدىڭ جاڭا باسشىسى بايدەن ءۇندىستان پرەمەر-ءمينيسترى نارەندرا موديگە قوڭىراۋ شالىپ، كوروناۆيرۋسقا قارسى بىرلەسىپ كۇرەس جۇرگىزۋ، كليمات وزگەرىستەرىنە قارسى شارالاردى قابىلداۋ تۋرالى سويلەسكەن. بۇلارعا قوسا قازىر جاھاندىق گەوساياساتتا ماڭىزدى بولا تۇسكەن ءۇندى-تىنىق مۇحيت ايماعىنداعى قاۋىپسىزدىك ماسەلەسى تۋرالى دا كەڭەسكەن.

اق ءۇيدىڭ ءباسپاسوز قىزمەتى ەكى ليدەر اراسىنداعى ديالوگ مەيلىنشە اشىق ءارى اۋقىمدى تاقىرىپتار قامتىلعانىن باسا جازعان. بايدەن مەن مودي وڭىردەگى حالىقارالىق سۋ جولدارىنىڭ اشىقتىعى جانە تەڭىز تاسىمالىنىڭ قاۋىپسىزدىگىن قامتاماسىز ەتۋدە ورتاق قادامدار جاساۋ تۋرالى پىكىرلەرى ءبىر جەردەن شىققان. بۇعان قوسا، «تورتتىك ديالوگ» (اقش، اۋستراليا، جاپونيا جانە ءۇندىستان اراسىنداعى جوبا) ارقىلى قاۋىپسىز ايماق قۇرۋ مەحانيزمىن جۇزەگە اسىرۋدى ىلگەرلەتۋ تۋرالى دا ءسوز قوزعاعان.

ءۇندى-تىنىق مۇحيتى ايماعىنداعى قىتايدىڭ سىن-قاتەرلەرىنە قارسى ۇندىستانمەن وداق قۇرۋ، ءۇندىستان قاتىسقان «تورتتىك ديالوگ» ارقىلى وڭىرلىك قاۋىپسىزدىك مەحانيزمىن جۇزەگە اسىرۋ جوبالارى ترامپ اكىمشىلىگى كەزىندە قابىلدانعان بولاتىن. بۇل جوبادا امەريكا قۇراما شتاتتارى، جاپونيا، اۆستراليا جانە ءۇندىستاننىڭ ورتاق مەحانيزمى قىتايدىڭ بارعان سايىن اگرەسسيۆتى سىرتقى ەكسپانسياسىنا جاۋاپ رەتىندە قاۋىپسىزدىك سالاسىنا قولدانىلدى. بايدەن ترامپتىڭ كوپتەگەن ساياساتتارىن سىنعا العانىمەن ونىڭ ءۇتما بويىنشا اۋقىمدى ستراتەگياسىنىڭ مۇراگەرى بولىپ قالدى.

اق ءۇي كەزەكتى ءباسپاسوز بايانىندا: «بايدەن مىرزانىڭ قادامى قۇراما شتاتتاردىڭ قىتايدىڭ قاۋىپ-قاتەرىنە قارسى كۇرەسۋدە ءۇندىستاندى قامتىعان وڭىردەگى وداقتاستارىن كۇشتەرىن بىرىكتىرۋگە كۇش سالاتىندىعىن، سول ارقىلى وداقتاستارىمىز بەن سەرىكتەرىمىزدىڭ قاۋىپسىزدىگىن قامتاماسىز ەتۋگە كوڭىل بولەتىنىن كورسەتەدى»، – دەلىنگەن.

قازىر، ءۇندىستان مەن قىتاي قاتىناسى شەكارا قاقتىعىسىنا بايلانىستى قايشىلىقتى كۇيدە تۇر. بۇل قۇراما شتاتتاردىڭ ۇندىستانمەن ىنتىماقتاستىعىن تەرەڭدەتۋگە ۇلكەن مۇمكىندىكتەر جاراتۋدا.

“The Qazaq times”