ەۋروپاداعى اۋرۋلاردىڭ الدىن الۋ جانە باقىلاۋ ورتالىعى جاپپاي ۆاكتسيناتسيالاۋ مەن «COVID-تولقۇجات» ماسەلەسىن تالقىلادى. قازىرگە دەيىن ەۋرووداققا مۇشە مەملەكەتتەر كوروناۆيرۋسقا قارسى پرەپاراتتىڭ 8 ميلليون دوزاسىمەن قامتاماسىز ەتىلگەن.

ۆاكتسينا تاسىمالداۋ بويىنشا ەۋروپادا بىرقاتار قيىندىقتار ورىن العان. سول سەبەپتى جالپى حالىقتىڭ 2-3%-ىنا عانا ەكپە ەگىلگەن. سىناقتىڭ بارلىق فازاسىنان ءساتتى وتكەن AstraZeneca ەۋرووداق ەلدەرىنە ۆاكتسينانىڭ 40 ميلليون دوزاسىن جەتكىزبەك بۇل ۋاعدالاسقان مولشەردەن 9 ميلليونعا كوپ. اقپاننىڭ ورتاسىنا دەيىن Pfizer جانە BioNTech كومپانيالارى دا ەكپەنى تولىق مولشەردە جەتكىزۋى ءتيىس.

جاپپاي ۆاكتسيناتسيالاۋ باستالعان ەۋرووداق ەلدەرى «COVID-تولقۇجات» ەنگىزۋ ماسەلەسىن تالقىعا العان. ۆاكتسينا قابىلدادى دەگەن قۇجاتتى ەنگىزۋگە دۇنيەجۇزىلىك دەنساۋلىق ساقتاۋ ۇيىمى قارسىلىق بىلدىرگەنمەن، ەۋرووداق ەلدەرى مەن رەسەي بۇل ماسەلەنى قاراستىرىپ جاتىر. ماسەلەن، يسپانيا بيلىگى باستامانى قولدايتىنىن جەتكىزدى. ويتكەنى ەل ەكونوميكاسى تۋريزمگە تاۋەلدى.

بىلتىر يسپانيانىڭ ساياحات سالاسى سوڭعى جارتى عاسىرداعى ەڭ اۋىر جىلعا تاپ بولدى. پيرەنەي تۇبەگىنە كەلگەن شەتەلدىك ساياحاتشىلار سانى 80 پروتسەنتكە ازايعان. گرەكيا بيلىگى دە وسىنداي سەرتيفيكات ەنگىزۋ باستاماسىن قولداپ وتىر. سەبەبى ەللادا ەلىندە دە ءتۋريزمنىڭ ەكونوميكاداعى ۇلەسى جوعارى. قولداۋشىلار قاتارىندا پولشا مەن دانيا دا بار.

ال فرانتسيا مەن رۋمىنيا بيلىگى كەرىسىنشە، بۇل يدەيانى قۇپتامايتىندارىن ايتقان. اتالعان قۇجات ۆاكتسيناتسيالاۋ تۋرالى انىقتامانى الماستىرادى. قولىندا ءتيىستى قۇجاتى بار ادامنىڭ شەتەلگە شىعۋى جەڭىلدەپ، وزگە ەلدەن ورالعاندا كارانتيندە وتىرمايدى.

"The Qazaq Times"