فوتو: dw.com

ۇلىبريتانيادا كارانتين مەرزىمى 8 ناۋرىزعا دەيىن ۇزارتىلدى. پرەمەر-مينيستر بوريس دجونسون ۆيرۋستىڭ جاڭا شتاممى تىركەلگەن 22 مەملەكەت ازاماتتارىنا بريتانياعا كىرۋگە تىيىم سالدى.

ەندى ۇلىبريتانياعا «قىزىل تىزىمدەگى» ەلدەردەن كەلۋشىلەر قوناق ۇيلەردە وقشاۋلانادى. تىزىمگە مۋتاتسياعا ۇشىراعان ۆيرۋستىڭ جاڭا تۇرلەرى انىقتالعان 30 مەملەكەت ەنگەن. جولاۋشىلار پتر-تەستتىڭ تەرىس ناتيجەسىن كورسەتكەننىڭ وزىندە ۇكىمەت ۇسىنعان قوناق ۇيدە 10 كۇن بويى سىرتقا شىقپاي وقشاۋلانۋى مىندەتتى. ولار ازىق-تۇلىك جانە باسقا دا كەرەك-جاراقتارمەن قامتاماسىز ەتىلەدى. بىراق بارلىعىنىڭ اقىسىن ءوز قالتالارىنان تولەۋى كەرەك. مۇنداي قاتاڭ شەكتەۋلەر پاندەميا باستالعالى بولعان ەمەس.

سونىمەن قاتار، دالەلدى سەبەبى بولماعان ادامدارعا وزگە ەلدەرگە ساياحاتتاۋعا تىيىم سالىنادى. ءار ادام دەكلاراتسيا تولتىرىپ، شەتەلگە بارۋ سەبەبى ءجىتى تەكسەرىلەدى. ەڭبەك دەمالىسى دالەلدى سەبەپ بولىپ ەسەپتەلمەيدى. شەكتەۋ تالاپتارى بويىنشا ۇلىبريتانياعا ءوز ازاماتتارى مەن زاڭدى رەزيدەنتتەر عانا كىرە الادى.

پاندەميا باستالعالى مۇندا 3,72 ميلليون كەيس تىركەلىپ، 100 مىڭنان استام ادام كوز جۇمعان. بۇل ستاتيستيكا بويىنشا ەۋروپادا انتيرەكورد ورنادى. قازىر كوروناۆيرۋستىڭ مۋتاتسياعا ۇشىراعان ءتۇرىن ياعني «بريتاندىق ۆيرۋس» جۇقتىرعاندار سانى كۇرت اسقان.

"The Qazaq Times"