ساياسي داعدارىس: يتاليا پرەمەر-ءمينيسترى وتستاۆكاعا كەتپەك

يتاليا ۇكىمەتىنىڭ توراعاسى دجۋزەپپە كونتە ءوز ەركىمەن وتستاۆكاعا كەتەتىنىن جاريالادى. بۇل تۋرالى كيدجي ۇكىمەت سارايىنىڭ ءباسپاسوز قىزمەتى حابارلادى.

ANSA اگەنتتىگىندەگى مالىمدەمەدە: «سەيسەنبى مينيسترلەر كەڭەسىنىڭ وتىرىسى وتەدى. جيىن كەزىندە ۇكىمەت توراعاسى دجۋزەپپە كونتە وتستاۆكاعا كەتەتىنىن جاريالايدى. وسىدان كەيىن ول ءتيىستى مالىمدەمەنى رەسپۋبليكا پرەزيدەنتى سەردجو ماتتارەللاعا جولدايدى»، – دەلىنگەن.

وتكەن اپتادا كواليتسيالىق ۇكىمەتكە كىرەتىن «يتاليا ۆيۆا» پارتياسى دجۋزەپپە كونتە كابينەتىنەن 2 ءمينيسترىن شىعارىپ الاتىنىن مالىمدەگەن. سالدارىنان قازىر ءۇش پارتيادان قۇرالعان ۇكىمەتتىك وداق پارلامەنتتەگى باسىمدىعىنان ايىرىلىپ، ەلدە قايتا سايلاۋ ءوتۋى مۇمكىن.

پارتيا جەتەكشىسى ماتتەو رەنتسي بولسا كيكىلجىڭگە پرەمەر-مينيستر دجۋزەپپە كونتەنىنىڭ ەكونوميكالىق ساياساتى سەبەپ دەيدى. ول ۇكىمەت باسشىسىنىڭ ەۋرووداقتىڭ ەل ەكونوميكاسىن قالپىنا كەلتىرۋگە بولگەن قارجىسىنا قاتىستى ساياساتى دۇرىس ەمەس دەپ سىنعا الۋدا. بىراق ماسەلەنى شەشۋ ءۇشىن كەلىسسوز جۇرگىزۋگە دايىن ەكەنىن ايتادى.

داعدارىستىڭ ۋشىعۋىنا سەبەپكەر «يتاليا ۆيۆا» پارتياسىنىڭ ليدەرى، ەكس-پرەمەر رەنتسي وپپوزيتسياعا ءوتىپ، كونتەگە سەنىم بىلدىرمەيتىنىن ايتتى. پارتيانىڭ بۇل شەشىمىن دەمپارتيا وكىلدەرى سىنعا الىپ، ەلدەگى ساياسي داعدارىستىڭ ارتۋىنا سەبەپكەر رەتىندە ايىپتاپ وتىر.

"The Qazaq Times"