دجو بايدەن جانە ۆلاديمير پۋتين. فوتو: https://uainfo.org

اقش كونگرەسمەندەرى پرەزيدەنت دجو بايدەننەن رەسەيدە ازات ەۋروپا جۋرناليستەرىن قۋدالاۋ،قىسىم كورسەتۋ ازايماعان جاعدايدا، سانكتسيا ەنگىزۋدى سۇرادى.

22 قاڭتاردا جازىلعان حاتتا وكىلدەر پالاتاسىنىڭ مۇشەلەرى سونداي-اق ازاتتىق راديوسىنىڭ بەلارۋس قىزمەتىنە قولداۋ بىلدىرۋگە دە شاقىرعان. حاتتا رەسمي وكىلدەر بايدەننەن رەسەيدى جازالاۋ ءۇشىن ءتيىستى زاڭداردى قولدانۋ كەرەكتىگىن جازعان. ياعني عالامدىق ماگنيتسكي زاڭى مەن امەريكا قارسىلاستارىنا سانكتسيا ارقىلى توتەپ بەرۋ تۋرالى زاڭ ماسكەۋگە ەكونوميكالىق سانكتسيا ەنگىزۋ كەزىندە قارالادى.

اتالعان زاڭدار كەيىنگى توعىز جىلدا رەسەي شەنەۋنىكتەرىنە قارسى ءجيى قولدانىلدى. سانكتسيا تىزىمىنە ىلىنگەندەردىڭ اقش-تاعى مۇلكى بۇعاتتالىپ، ولارعا اقش-قا كەلۋگە ۆيزا بەرىلمەيدى.

بۇگىن ەۋرووداق ەلدەرى دە رەسەيدەگى ادام قۇقىقتارىنىڭ تاپتالۋىنا بايلانىستى سانكتسيا ەنگىزۋ ماسەلەسىن تالقىلاپ جاتىر. ەستونيا، لاتۆيا جانە ليتۆا سىرتقى ىستەر مينيسترلەرى ەو-نى رەسەيلىك شەنەۋنىكتەرگە قارسى سانكتسيالار سالۋعا شاقىردى. پولشا پرەزيدەنتى اندجەي دۋدا بريتاندىق Financial Times گازەتىنە بەرگەن سۇحباتىندا: «سانكتسيالار – حالىقارالىق قۇقىقتى ساقتاۋدىڭ جالعىز جولى» دەپ مالىمدەدى. رەسەيگە قارسى قارا ءتىزىم جاساۋدى اقش مەملەكەتتىك دەپارتامەنتى دە قولدادى.

كرەمل سىنشىسى، وپپوزيتسيونەر الەكسەي ناۆلانىيدىڭ تۇتقىندالۋىنان كەيىن بيلىككە قارسى وتكەن نارازىلىق اكتسيالارى كەزىندە 3500-دەن استام ادام ۇستالعان. 23 قاڭتار كۇنى بولعان ميتينگىلەرگە ناۆالنىيدىڭ ءوزى شاقىرعان بولاتىن. ول بۇل ۇندەۋىن 18 قاڭتار كۇنگى سوت وتىرىسىنىڭ الدىندا جولداعان. كەيىنىرەك ونىڭ شتابى ناقتى كۇندى حابارلادى.

ميتينگ كۇنى جانە ونىڭ قارساڭىندا رەسەي بيلىگى ناۆالنىي جاقتاستارىن ۇستاپ، ءتىنتىپ، ولارعا دەگەن قىسىمدى كۇشەيتتى. الەكسەي ناۆالنىي قاماۋعا الىنعاننان ەكى كۇن وتكەن سوڭ ونىڭ شتابى «ءپۋتيننىڭ سارايى» اتالاتىن ەكى ساعاتتىق زەرتتەۋ ءفيلمىن جاريالادى. Youtube جەلىسىندە جاريالانعان زەرتتەۋ وسى ۋاقىتقا دەيىن 85 ميلليوننان استام قارالىم جينادى.

"The Qazaq Times"