فوتو: ۆۆس

كوروناۆيرۋستىڭ تارالۋ قارقىنى وسكەن ۇلىبريتانيا شەكتەۋ شارالارىن قاتاڭداتا باستادى. ەندى شەكارانى وتكەن بارلىق ادام 10 كۇندىك كارانتينگە الىنادى.

بەس كۇننەن كەيىن تەست ۆيرۋستىڭ جوعىن كورسەتسە، وقشاۋلانۋ مەرزىمى قىسقارادى. سونداي-اق ەل اۋماعىنا كىرۋ ءۇشىن مەرزىمى 72 ساعاتتان اسپايتىن تەست ناتيجەسى قولدا بولۋ كەرەك. بۇل ەرەجەنى بۇزعاندارعا 500 فۋنت ستەرلينگ ايىپپۇل سالىنادى. بۇل – جاڭا شتامنىڭ وزگە ەلدەردەن كەلۋىنە قارسى قابىلدانىپ وتىرعان شارا.

وتكەن اپتادا دۇنيەجۇزىلىك دەنساۋلىق ساقتاۋ ۇيىمى پاندەميانىڭ ەكىنشى جىلى بىرىنشىسىنەن اۋىر بولۋى مۇمكىن دەپ بولجام جاساعان. بۇعان ۇلىبريتانيادان انىقتالعان مۋتاتسيالانعان ۆيرۋستىڭ تەز تارالۋى سەبەپ. رەسمي مالىمەتتەر بويىنشا، ۆيرۋس ادامدار اراسىندا 70%-عا تەز تارايدى. بىراق قاۋىپتىلىگى جاعىنان بۇرىنعى تۇرىنەن ەرەكشەلەنبەيدى. جاڭا شتامم الدىڭعى كوروناۆيرۋسقا قاراعاندا ادامدارعا تەز جۇعاتىنى انىقتالعان. الەمنىڭ كوپتەگەن ەلى كورولدىكپەن اۋە قاتىناسىن توقتاتىپ، بۇل ەلدەردەن كەلگەن ادامداردى قاتاڭ تەكسەرۋگە كىرىستى.

ازىرگە «بريتاندىق» ۆيرۋس ناقتى وسى ەلدە وزگەرىسكە ۇشىراعان با، ول دا بەلگىسىز. ونىڭ وسى ەلدە يممۋنيتەتى ءالسىز، ۆيرۋسپەن كۇرەسۋگە دارمەنسىز ناۋقاستىڭ اعزاسىندا پايدا بولعانىن نەمەسە بولماسا سىرتتان كەلگەنىن ءالى ەشكىم انىقتاعان جوق.

قازىر مۇندا ۆيرۋس جۇقتىرعاندار سانى 3 ميلليوننان اسىپ، 90 مىڭعا جۋىق ادام قايتىس بولعان.

"The Qazaq Times"