فرانتسيا پرەزيدەنتى ەممانۋەل ماكرون. فوتو: ەرا

فرانتسيا كوروناۆيرۋستىڭ الدىن الۋ ماقساتىندا شەكتەۋ شارالارىن قاتاڭداتتى. ەلدە وڭتۇستىك افريكا رەسپۋبليكاسىندا شىققان كوروناۆيرۋستىڭ جاڭا شتامىنىڭ تەز تارالۋىنا بايلانىستى ەلگە كىرۋ ءتارتىبى وزگەرەدى. ەندى ەۋرووداقتان بولەك ەلدەردىڭ ازاماتتارى وسى رەسپۋبليكاعا بارسا، ءبىر اپتا كارانتينگە جابىلادى. ەلدىڭ پرەمەر-ءمينيسترى جان كاستەكس ۇسىنعان شارالاردىڭ نەگىزگى مازمۇنى وسىنداي.

جاڭا جىلدىق مەرەكەلەردەن كەيىن فرانتسيادا ۆيرۋس جۇقتىرعاندار سانى كۇر ارتقان. سارسەنبىدە ءبىر تاۋلىك ىشىندە 23 مىڭ كەيس تىركەلدى. بۇل ءبىر اي بۇرىن بولجانعان ساناقتان بەس ەسە كوپ. قازىر ەلدە 2,8 ميلليوننان استام ادام ادامنان كوروناۆيرۋس انىقتالعان. 10 اي ىشىندە قاۋىپتى دەرت 69 مىڭنان استام ادامنىڭ ولىمىنە سەبەپ بولدى.

فرانتسيادا شەكتەۋلەردىڭ قاتاڭداتۋدىڭ بىردەن-ءبىر سەبەبى – «بريتاندىق» جانە «وڭتۇستىك افريكالىق كوروناۆيرۋس» شتامداردىڭ پايدا بولۋى. كۇن سايىن ۆيرۋستىڭ بريتاندىق نۇسقاسى 300-گە جۋىق ادامنان انىقتالىپ جاتىر. وسىعان بايلانىستى 16 قاڭتاردان باستاپ رەسپۋبليكا اۋماعىندا كەم دەگەندە 15 كۇنگە كونمەنداتتىق ساعات ەنگىزىلەدى (18:00-دەن 06:00-گە).

ۇيىمدار مەن كاسىپورىنداردا قاشىقتىقتان جۇمىس ىستەۋ ەرەجەلەرى وزگەرىسسىز قالادى. كينوتەاترلار مەن مۇراجايلار ۋاقىتشا جابىلادى. جاڭا شارا ەرتەڭنەن باستاپ كۇشىنە ەنىپ 15 كۇنگە سوزىلادى. مۇنداي ءتارتىپ وسى ۋاقىتقا دەيىن ۆيرۋس ەڭ كوپ تارالعان 25 دەپارتامەنتتە قولدانىلىپ، ونداعى دەرتتى جۇقتىرۋ دەرەگى ءبىرشاما باسەڭدەگەن بولاتىن.

شەكاراداعى باقىلاۋ دا ايتارلىقتاي كۇشەيتىلىپ جاتىر. بۇدان بىلاي ەۋروپالىق وداقتان تىس ەلدەردەن كەلگەن بارلىق ساياحاتشىلار كوروناۆيرۋسقا تەست تاپسىرىپ، 1 اپتاعا كارانتينگە جاتقىزىلادى. 7 كۇننەن سوڭ قايتادان پتر تەست تاپسىرۋى ءتيىس.

فرانتسيادا الداعى دۇيسەنبىدەن باستاپ 700 ۆاكتسينالاۋ ورتالىعى جۇمىس ىستەيدى. 75 جاستان اسقان قارتتارمەن قاتار سوزىلمالى اۋرۋى بار ازاماتتار دا ەگىلەدى. قاڭتاردا ەلدىڭ 1 ميلليونعا جۋىق تۇرعىنى ۆاكتسينا قابىلداماق. اقپاننىڭ سوڭىنا دەيىن جالپى سانى 2,5 ملن ادمعا ەكپە ەگىلەدى. مامانداردىڭ پىكىرىنشە، ۆاكتسيناتسيا اۋرۋدىڭ پايدا بولۋىن عانا ەمەس، سونىمەن قاتار ۆيرۋستىڭ تارالۋىن دا بولدىرماۋى كەرەك.

"The Qazaq Times"