كورنەكى سۋرەت. فوتو: Zakon.kz

قازاقستاندا قاڭتار ايىنىڭ العاشقى جارتىسىندا 11 مىڭنان ناۋقاس تىركەلدى. 14 قاڭتاردا كوروناۆيرۋس جۇققان 835 ادام، 13 قاڭتاردا كوروناۆيرۋس پنەۆمونياسىنا شالدىققان 76 ادام انىقتالعان. قازىر ەلدە 23,7 مىڭ ادام (U07.1 نەمەسە كۆي+ بويىنشا 11 922, U07.2 نەمەسە كۆي- بويىنشا 11 812) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – الماتى قالاسى (131), اتىراۋ (85), پاۆلودار (75), استانا (74), قوستاناي (73), الماتى (69) مەن اقمولا (68) وبلىستارىندا. وتكەن تاۋلىكتە 666 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 6 ادام ومىردەن وتكەن.

#U07.2  الدىڭعى كۇنى، ياعني قاڭتاردىڭ 13-ءى كوروناۆيرۋس پنەۆمونياسىنا جاتاتىن 76 ناۋقاس جانە ءبىر ءولىم جاعدايى تىركەلگەن. 112 ادام ەمدەلىپ شىققان.

#جالپى  تاۋلىكتىك كورسەتكىش كۇن سايىن ارتىپ كەلەدى. سارسەنبى كۇنى 910 ناۋقاس تىركەلگەن. دەنمين-ءنىڭ رەسمي مالىمەتىنشە, ەمدەلىپ جاتقان 23 524 ناۋقاستىڭ 6142-ءسى اۋرۋحانادا، 17 592-ءسى امبۋلاتورلىق باقىلاۋدا. احۋالى ناشار 285 ناۋقاستىڭ اراسىندا 76 ادامنىڭ جاعدايى قاتتى قيىنداعان. جانە 47 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

مينيسترلىك وتكەن ايدا رەسمي حابارلامانىڭ فورماسىن جاڭارتتى. وندا اۋىرىپ جاتقان بالالار تۋرالى اقپارات الىنىپ تاستالعان.

اقپارات مينيسترلىگىنىڭ coronavirus2020.kz سايتى مەن دەنساۋلىق ساقتاۋ مينيسترلىگىنىڭ اقپارات رەسۋرستارىندا جاريالانعان دەرەكتەر بىرنەشە ايدان بەرى قاتە بەرىلىپ كەلگەنى جايلى ماتەريالدار جاريالاپ، اقپارات قۇرالدارىنا ەسكەرتكەنبىز. 26 جەلتوقساننان باستاپ مينيسترلىك كەمشىلىگىن مويىنداپ، ستاتيستيكانىڭ مەرزىمىن كورسەتىپ جاريالاۋعا كوشتى.

پاندەميا مودەراتورى – مينيسترلىك تەك سەنبى-جەكسەنبىدە عانا ەمەس، مەرەكە كۇندەرى دە ستاتيستيكانى تولىقتاي جۇرگىزۋگە قاۋقارسىز. ماسەلەن، جەلتوقسان ايىنىڭ 1, 16, 17, 18-ءى ءجان 19-ىنا، 1-4, 7 قاڭتارعا تيەسىلى دەرەكتەر ەسەلەپ كەمىگەن. كۇزدىڭ ورتاسىندا سول كەزدەگى دەنمين-ءنىڭ رەسمي-ەرىكتى وكىلى باعدات قوجاحمەتوۆ ەكىنشى تولقىندا دەمالىس كۇنىنە قاراماستان ستاتيستيكانى تولىق كولەمدە جۇرگىزۋگە ۋادە بەرگەن ەدى. بىراق ءىس جۇزىندە ولاي بولماي شىقتى. 

The Qazaq Times رەداكتسياسى تومەندەگى كەستەنى ەڭ شىنايى نۇسقا دەپ سانايدى.

9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭىن بيىل قاڭتار جانە اقپان ايلارىنا سايكەس كەلەدى دەگەن.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 165 مىڭنان، 1 تامىزدان بەرگى كوروناۆيرۋس پنەۆمونياسى 46,5 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 211 مىڭعا جەتسە، ال ۇلتتىق ستاتيستيكادا 212 مىڭعا جۋىقتاعان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. حالىقارالىق ۇيىم تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ دياگنوزى بويىنشا جاڭا انىقتالعان ناۋقاستار مەن قايتقاندار، ايىعىپ شىققانداردىڭ ايماقتارداعى كورسەتكىشى كۇندەلىكتى جاريالانادى، ال كۆي- دەرەگى تەك جيىنتىق ماندە بەرىلەدى. كوروناۆيرۋس پنەۆمونياسىنىڭ ايماقتارعا تارالۋى جونىندەگى ەسەپ مينيستر و باستا ايتقانداي كۇندەلىكتى نە اپتاسىنا ەمەس، ون كۇندە ءبىر رەت، ونىڭ وزىندە ۆەدومستۆو سايتىنا فايل فورماتىندا جۇكتەلىپ كەلەدى.

ازىرگە ۆيرۋس تارالۋ قاتەرى جاعىنان اقمولا جانە قوستاناي وبلىستارى – قىزىل، استانا مەن الماتى قالاسى، سقو، بقو، اتىراۋ، پاۆلودار وڭىرلەرى – سارى ايماقتا تۇر. قىزىل ايماققا ەنگىزىلگەن وبلىستارعا قاراعاندا ەكى اپتادان كۇننەن بەرى اۋرۋ ەڭ كوپ تىركەلىپ جاتقان الماتى قالاسىنىڭ نەلىكتەن سارعىشتانىپ تۇرعانى بەلگىسىز.

پاندەميا باستالعالى جالپى ۆيرۋس جۇققانداردىڭ 3735-ءى (كۆي+ / U07.1 – 2386, كۆي- / U07.2 – 533, ىلەسپە اۋرۋلاردان – 816) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 816 ادامدى جالپى ستاتيستيكاعا قوسىپ ەسەپتەمەيدى. بۇعان قارسى كەيبىر ساراپشىلاردىڭ پىكىرىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قوعامدا بىلتىرعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 51-ءشى ورىندا تۇر.

"The Qazaq Times"