ءۇستىرتتى لاداح ايماعىنداعى اسكەرلەر. فوتو; VOA.

قىتاي مەن ءۇندىستان شەكارا جانجالىنا بايلانىستى مىڭداعان اسكەرلەرىن تاۋلى شەكارا ايماقتارىنا ورنالاستىرىپ، شەكارالىق قاقتىعىس قاۋپىندە تۇرعان بولاتىن. سوڭعى كۇندەرى تالاستى شەكارا ماڭىنداعى قىتاي اسكەرلەرىنىڭ سانىندا وزگەرىستەر بولعانى تۋرالى ۇندىستاندىق اقپارات قۇرالدارى حابارلاپ جاتىر. قىستىڭ قاتتى سۋىعىنان تاراپتار ءبىر ءبولىم اسكەرلەرىن ايماقتان شىعارۋعا ءماجبۇر بولعان.  سونىڭ وزىندە ەكى تاراپتىڭ شامامەن 100 ساربازى ءالى دە تالاستى ايماقتا قالىپ وتىر.

ءۇندىنىڭ Hindustan Times باسىلىمى كەشە (12 قاڭتار) جوعارى لاۋازىمدى شەنەۋنىكتەرگە سىلتەمە جاساي وتىرىپ، قىتاي تارابى داۋلى لاداح شەكارا ايماعىنان شامامەن 10 مىڭ اسكەرىن شىعارىپ كەتكەنىن جازدى. اتالعان باسىلىم حابارىندا، قىتاي اسكەري كۇشتەرىنىڭ بۇل ارەكەتى اۋا-رايىنىڭ كۇرت وزگەرۋىنە بايلانىستى ەكەنى ايتىلعان. ءۇندىستان ساراپشىلارىنىڭ پىكىرىنشە، قازىرگى ۋاقىتتا لاداح ايماعىن قوسقاندا تالاستى شەكارالاردا تۇرعان ءۇندى-قىتاي ساربازدارىنىڭ جالپى سانى 100 مىڭ ادام شاماسىندا.

ءۇندى-قىتاي شەكاراسىنداعى اسكەري قوزعالىستار ءۇندىستان، تايۋان جانە وڭتۇستىك شىعىس ازيا ەلدەرىنىڭ اقپارات قۇرالدارىندا جازىلىپ، ءتۇرلى تالداۋ مەن ساراپتاما جاسالىپ جاتىر. VOA اگەنتتىگى ساراپشىلاردىڭ سوزىنە سىلتەمە بەرىپ، قىتايدىڭ 10 مىڭ اسكەرىن ايماقتان شىعارۋى داعدارىستى شەشۋگە دەگەن قادامى ەمەس دەپ كورسەتتى. سەبەبى، ءۇندىستان تارابى دا بۇدان ەرتەرەك وسىنداي قادامدار جاساعان. ايتالىق، سۋىق اۋا رايىنا قاراتا الدىنعى شەپتەگى اسەرلەردىڭ ارناۋلى رەزەرۆىن الىپ تاستاعان بولاتىن.

لاداح ايماعىنداعى قىتاي مەن ءۇندىستاننىڭ اسكەري تەكە-تىرەسى 9 اي بويى جالعاسىپ جاتىر. ءۇندىستان باسىلىمدارىنىڭ مالىمەتىنشە، لاداح تاۋلى ايماقتارىندا كۇندىزگى اۋا تەمپەراتۋراسى -10س° مەن -16س°  اراسىندا، تۇندە  -19 بەن -26 س° اراسىندا. تەڭىز دەڭگەيىنەن 5000 مەتر بيىك ايماقتا، سونداي-اق تەمپەراتۋرا ورتا ەسەپپەن -30 تسەلسيدە بولاتىن ورتادا ماتەريالدىق-تەحنيكالىق جابدىقتاۋى قيىندىقتارعا تاپ بولدى.

وسىدان بۇرىن ءۇندىستاننىڭ مۋر اتتى وتستاۆكاداعى گەنەرالى Indian Defence Review باسىلىمىنا جاريالاعان ماقالاسىندا ءۇندىستان بۇعان دەيىن اتالعان لاداح ايماعىندا ەشقاشان مۇنشالىق كوپ سانداعى اسكەردى ورنالاستىرىپ كورمەگەنىن، بىلايشا ايتقاندا وڭىردەگى گەوگرافيالىق شارتقا تولىق دايىندىعى جوق ەكەنىن سىناعان ەدى. ول بۇل قارسىلىق ارەكەتتەرى ءۇندىستاننىڭ قىسقى اسكەري رەزەرۆىنە اۋىر سالماق سالىپ جاتقانىن، تىرشىلىك ەتۋ شارتى تومەن ءۇستىرتتى وڭىردەگى اسكەرلەردى ورنالاستىرۋدىڭ بولىپ كورمەگەن دەڭگەيدە قيىندىقتار الىپ كەلەتىنىن ەسكەرتكەن. ارينە، تاپ وسىنداي قيىنشىلىققا قىتاي تارابى دا تاپ كەلىپ جاتقانى ءسوزسىز.

قوس تاراپ بۇل قارسىلاسقان داعدارىستى شەشۋ ءۇشىن 8 مارتە اسكەري كەلىسسوز وتكىزدى، سەگىزىنەن دە ناتيجە شىققان جوق. الداعى كەزدەسۋدىڭ قاشان وتەتىنى دە انىق ەمەس. ال، ءۇندىستان قورعانىس مينيسترلىگى ءوز قارۋلى كۇشتەرىنىڭ لاداح ايماعىندا پوزيتسياسىن بەكەم ساقتاپ تۇراتىنىن مالىمدەدى. بۇل ۇستانىمدارىن ايگىلەۋ ءۇشىن ءۇندىستان قارۋلى كۇشتەرىنىڭ جوعارى اسكەري شەندىلەرى كەزەگىمەن قارۋلى قاقتعىس قاۋپى سەيىلمەگەن لاداح ايماعىنان بارىپ، جاۋنگەرلەرىنىڭ جاعدايىن ءبىلىپ قايتىپ ءجۇر. وسىنىڭ ءوزى تاراپتار اراسىنداعى قايشىلىقتىڭ تاياۋ ارادا شەشىم تاپپايتىنىن كورسەتسە كەرەك.

“The Qazaq Times”